બાળપણથી જ દેખાતી હતી પ્રતિભા

શુભમન ગિલ નાની ઉંમરથી જ પોતાની ઉંમર કરતાં મોટા ખેલાડીઓ સાથે ક્રિકેટ રમતા હતા. વર્ષ 2014માં પંજાબના આંતર-જિલ્લા અંડર-16 (Under-16) ટૂર્નામેન્ટમાં તેમણે 351 રનની શાનદાર ઇનિંગ રમી હતી. આ દરમિયાન નિર્મલ સિંહ સાથે મળીને તેમણે 587 રનની રેકોર્ડ ઓપનિંગ પાર્ટનરશિપ (Opening Partnership) નોંધાવી હતી. ત્યારબાદ વિજય મર્ચન્ટ ટ્રોફીમાં ગિલે અંડર-16 સ્ટેટ ડેબ્યૂ દરમિયાન અણનમ બેવડી સદી (Double Century) ફટકારી હતી. વર્ષ 2017ના અંતમાં તેમણે પંજાબ માટે રણજી ટ્રોફી (Ranji Trophy)માં ફર્સ્ટ ક્લાસ ડેબ્યૂ કર્યું અને પોતાની પહેલી જ મેચમાં અડધી સદી ફટકારી. ત્યાર પછીની મેચમાં તેમના બેટમાંથી 129 રન આવ્યા.

Advertisement

અંડર-19 વર્લ્ડ કપમાં બન્યા પ્લેયર ઓફ ધ ટૂર્નામેન્ટ

સતત શાનદાર પ્રદર્શનના કારણે ગિલને વર્ષ 2018ના અંડર-19 વર્લ્ડ કપ (U-19 World Cup) માટે ભારતીય ટીમનો ઉપકપ્તાન બનાવવામાં આવ્યો હતો. આ ટૂર્નામેન્ટમાં તેમણે પોતાની પ્રતિભાનો જબરદસ્ત પરિચય આપ્યો. ગિલે 6માંથી 5 મેચમાં બેટિંગ કરીને 124ની સરેરાશથી 372 રન બનાવ્યા હતા અને તેમને પ્લેયર ઓફ ધ ટૂર્નામેન્ટ (Player of the Tournament) જાહેર કરવામાં આવ્યા હતા. પાકિસ્તાન સામેની સેમિફાઇનલમાં તેમણે 94 બોલમાં 7 ચોગ્ગાની મદદથી અણનમ 102 રનની યાદગાર સદી ફટકારી હતી.

IPLથી આંતરરાષ્ટ્રીય ક્રિકેટ સુધીનો સફર

શુભમન ગિલને IPL 2018ની હરાજીમાં કોલકાતા નાઈટ રાઈડર્સ (KKR)એ ₹1.8 કરોડમાં પોતાની ટીમમાં સામેલ કર્યો હતો. પોતાની પ્રથમ IPL સીઝનમાં ગિલે 13 મેચમાં 33.83ની સરેરાશથી 203 રન બનાવ્યા હતા. વર્ષ 2019માં તેમને વનડે (ODI) ક્રિકેટમાં ડેબ્યૂ કરવાની તક મળી. ત્યારબાદ ડિસેમ્બર 2020માં ઓસ્ટ્રેલિયા પ્રવાસ દરમિયાન તેમણે 45 અને 35 રનની મહત્વપૂર્ણ ઇનિંગ્સ રમી હતી. આ જ સિરીઝમાં સિડની ખાતે અડધી સદી ફટકાર્યા બાદ ગાબા ટેસ્ટમાં ભારતની ઐતિહાસિક જીતમાં ગિલે 91 રનની શાનદાર ઇનિંગ રમી હતી.

વનડેમાં બેવડી સદી ફટકારનાર સૌથી યુવા ખેલાડી

શુભમન ગિલે માત્ર 23 વર્ષની ઉંમરે વનડે ક્રિકેટમાં બેવડી સદી ફટકારીને મોટો રેકોર્ડ પોતાના નામે કર્યો હતો. ન્યૂઝીલેન્ડ સામેની મેચમાં તેમણે માત્ર 149 બોલમાં 208 રન બનાવ્યા હતા. આ સાથે તેઓ વનડેમાં ડબલ સેન્ચુરી ફટકારનાર સૌથી યુવા બેટર બન્યા હતા.

પહેલા ટેસ્ટ અને પછી વનડે ટીમની કમાન

વર્ષ 2022માં ગુજરાત ટાઇટન્સ (Gujarat Titans)એ ગિલને પોતાની ટીમમાં સામેલ કર્યો હતો. હાર્દિક પંડ્યાના ટીમમાંથી જતાં ગિલને ફ્રેન્ચાઇઝીના કેપ્ટન (Captain)ની જવાબદારી સોંપવામાં આવી. આ પછી રોહિત શર્માએ ટેસ્ટ ક્રિકેટમાંથી નિવૃત્તિ લીધા બાદ ગિલને 2025ના ઇંગ્લેન્ડ પ્રવાસ માટે ભારતીય ટેસ્ટ ટીમનો કેપ્ટન બનાવવામાં આવ્યો. ત્યારબાદ ગયા વર્ષે ઓક્ટોબરમાં તેમને ટીમ ઈન્ડિયાની વનડે કમાન પણ સોંપવામાં આવી હતી. આંકડાઓની વાત કરીએ તો ગિલે ભારત માટે અત્યાર સુધી 43 ટેસ્ટમાં 43.47ની એવરેજથી 3,043 રન બનાવ્યા છે, જેમાં 11 સદી અને 9 અડધી સદી સામેલ છે. વનડેમાં 67 મેચમાં તેમના નામે 3,379 રન છે, જેમાં 9 સદી અને 20 અડધી સદી છે. જ્યારે 36 ટી20 આંતરરાષ્ટ્રીય (T20I) મેચમાં તેમણે 869 રન બનાવ્યા છે, જેમાં 1 સદી અને 3 અડધી સદી સામેલ છે.

2027 વર્લ્ડ કપમાં ગિલની મોટી પરીક્ષા

હવે શુભમન ગિલ સામે સૌથી મોટો પડકાર 2027નો વનડે વર્લ્ડ કપ (ODI World Cup) છે. ભારત છેલ્લી વખત રોહિત શર્માની આગેવાનીમાં વર્લ્ડ કપનો ખિતાબ જીતવામાં સફળ રહ્યું નહોતું. જો 2027માં ભારત ગિલની કેપ્ટનશિપ હેઠળ વર્લ્ડ કપ રમે અને ટ્રોફી જીતવામાં સફળ રહે, તો ગિલ ભારતને વનડે વર્લ્ડ કપ જીતાડનાર ત્રીજા ભારતીય કેપ્ટન બની શકે છે. અત્યાર સુધી માત્ર કપિલ દેવ (1983) અને મહેન્દ્ર સિંહ ધોની (2011)ની કેપ્ટનશિપમાં ભારતે વનડે વર્લ્ડ કપ જીત્યો છે.

આ પણ વાંચો : Ishan Kishan Double Century : 10 વર્ષ બાદ ઈશાન કિશનનો વિરાટ ધમાકો! દબાણ વચ્ચે બેવડી સદી ફટકારી તોડ્યો 31 વર્ષ જૂનો રેકોર્ડ