બેલફાસ્ટના સ્ટોર્મોન્ટ ગ્રાઉન્ડ પર ઇતિહાસ બદલાયો અને ભારતીય બેટિંગનો ફ્લોપ શો
આઈસીસી મેન્સ ટી20 વર્લ્ડ કપ 2026 માં ખિતાબી જીત મેળવ્યા બાદ ભારતીય ક્રિકેટ ટીમ આ ટૂંકા ફોર્મેટમાં પ્રથમ વખત કોઈ મેદાન પર રમવા ઉતરી હતી. સૂર્યકુમાર યાદવના સ્થાને હવે ટીમની કમાન અનુભવી ખેલાડી શ્રેયસ અય્યરના હાથમાં સોંપવામાં આવી છે. પરંતુ કેપ્ટન તરીકે શ્રેયસની આ નવી શરૂઆત બિલકુલ યાદગાર રહી નહોતી. ભારતીય બેટિંગ લાઇનઅપ આયર્લેન્ડના હોમ ગ્રાઉન્ડ પર સાવ સામાન્ય સાબિત થઈ હતી અને આખી ટીમ 18.5 ઓવરમાં જ ધરાશાયી થઈ ગઈ હતી.
20 રનની અંદર ભારતે પોતાની ૩ મહત્વની વિકેટો ગુમાવી
183 રનના ટાર્ગેટ સામે ભારતની શરૂઆત ખૂબ જ નબળી રહી હતી. ઓપનર સંજુ સેમસન માત્ર 5 રન બનાવીને ડેબ્યુટન્ટ બોલર જય મુંદ્રાની ઓવરમાં ક્લીન બોલ્ડ થઈ ગયો હતો. ત્યારબાદ ઇશાન કિશન 1 રન અને કેપ્ટન શ્રેયસ અય્યર માત્ર 3 રન બનાવીને આયર્લેન્ડના બીજા ડેબ્યુટન્ટ ફાસ્ટ બોલર મેથ્યુ હોલાર્ડનો શિકાર બન્યા હતા. માત્ર 20 રનની અંદર ભારતે પોતાની ૩ મહત્વની વિકેટો ગુમાવી દીધી હતી, જેમાંથી ટીમ અંત સુધી બહાર આવી શકી નહોતી.
પાવરપ્લેનો રોમાંચ, અભિષેક શર્માનું શાનદાર પ્રદર્શન
નબળી શરૂઆત વચ્ચે ડાબોડી યુવા ઓપનર અભિષેક શર્માએ એકલા હાથે ક્રીઝ પર આક્રમક વલણ અપનાવ્યું હતું. તેમણે પાવરપ્લેની ઓવરોનો ભરપૂર ફાયદો ઉઠાવતા માત્ર 19 બોલમાં પોતાની તોફાની ફિફ્ટી પૂરી કરી લીધી હતી. પાવરપ્લેના અંતે ભારતનો સ્કોર 68 રન હતો, જેમાં 47 રન તો માત્ર અભિષેકના બેટમાંથી નીકળ્યા હતા. જોકે, અડધી સદી પૂરી કર્યા બાદ જ આગામી બોલ પર તેઓ લિયામ મેકકાર્થીની ઓવરમાં આઉટ થઈ ગયા હતા. અભિષેકે 20 બોલમાં 7 ચોગ્ગા અને 2 છગ્ગાની મદદથી 50 રન બનાવ્યા હતા.
આયર્લેન્ડની બોલિંગનો ઘાતક વળતો પ્રહાર
અભિષેક શર્માના આઉટ થયા બાદ ભારતીય મિડલ ઓર્ડરના બેટર્સ સંપૂર્ણપણે નિષ્ફળ રહ્યા હતા. તિલક વર્મા 19 રન અને વોશિંગ્ટન સુંદર માત્ર 9 રન બનાવીને આઉટ થતાં ભારતનો સ્કોર 100 રનમાં 6 વિકેટ થઈ ગયો હતો. ઓલરાઉન્ડર શિવમ દુબે (25 રન) અને અક્ષર પટેલે (15 રન) સાતમી વિકેટ માટે 35 રનની ભાગીદારી કરીને મેચમાં વાપસી કરાવવાનો થોડો પ્રયત્ન કર્યો હતો, પરંતુ જય મુંદ્રાએ શિવમ દુબેને કોટ એન્ડ બોલ્ડ કરીને ભારતની રહીસહી આશા પર પણ પાણી ફેરવી દીધું હતું .
પ્રથમ ઇનિંગ્સમાં આયર્લેન્ડની વિસ્ફોટક બેટિંગ
આ પૂર્વે ટોસ હારીને પ્રથમ બેટિંગ કરવા ઉતરેલી આયર્લેન્ડની ટીમે 20 ઓવરમાં 9 વિકેટે 182 રનનો સન્માનજનક સ્કોર બનાવ્યો હતો. હર્ષિત રાણાએ શાનદાર બોલિંગ સ્પેલ નાખતા ઓપનર્સ રોસ અડાયર (12 રન) અને ટિમ ટેક્ટર (17 રન) ને વહેલા આઉટ કરીને પાવરપ્લેમાં ભારતને મજબૂત શરૂઆત અપાવી હતી . અર્શદીપ સિંહે હેરી ટેક્ટરને શૂન્ય રને આઉટ કર્યો હતો. પરંતુ આયર્લેન્ડના કેપ્ટન લોર્કન ટકરે 36 બોલમાં 50 રન ફટકારીને અને ગેરેથ ડેલાનીએ 32 બોલમાં 49 રનની તોફાની ઇનિંગ્સ રમીને ટીમને મજબૂત સ્કોર સુધી પહોંચાડી દીધી હતી.
બંને દેશોના જૂના આંકડાઓની સરખામણી
આંતરરાષ્ટ્રીય ક્રિકેટના ઇતિહાસ પર નજર કરીએ તો ભારત અને આયર્લેન્ડ વચ્ચે અત્યાર સુધીમાં કુલ 8 ટી20 મેચો રમાઈ હતી અને તે તમામ 8 મેચો ભારતે જીતી હતી. આયર્લેન્ડ ક્રિકેટના ઇતિહાસમાં ભારત સામે ઇન્ટરનેશનલ લેવલે આ તેમની સૌથી પહેલી અને ઐતિહાસિક જીત છે. આ ઐતિહાસિક મેચમાં 15 વર્ષના ભારતીય યુવા બેટર વૈભવ સૂર્યવંશીને પ્લેઈંગ-11 માં સ્થાન મળ્યું નહોતું, જેના કારણે તેમના ઇન્ટરનેશનલ ડેબ્યૂની રાહ હજુ પણ લંબાઈ ગઈ છે.
આ પણ વાંચો : Shivam Dube Birthday Record : શિવમ દુબેએ જન્મદિવસ પર મચાવ્યો તરખાટ, યુવરાજ-જાડેજાના ખાસ ક્લબમાં એન્ટ્રી
