ભારતને મળી ICC મહિલા ચેમ્પિયન્સ ટ્રોફી 2027ની યજમાની: 14 ફેબ્રુઆરીથી મુંબઈ અને વડોદરામાં રમાશે મુકાબલા

શ્રીલંકા પાસેથી યજમાની છીનવાઈ, ગુજરાતના વડોદરાને પણ મળ્યા મુકાબલા

અગાઉ આ ટૂર્નામેન્ટની યજમાની શ્રીલંકા (Sri Lanka)ને સોંપવામાં આવી હતી. જોકે, શ્રીલંકા ક્રિકેટ બોર્ડમાં જરૂરી વહીવટી અને માળખાકીય સુધારાઓ હજુ ચાલી રહ્યા હોવાથી આઈસીસી દ્વારા સુરક્ષા અને સુવિધાઓને ધ્યાને રાખીને આ ઈવેન્ટ ભારત શિફ્ટ કરવાનો નિર્ણય લેવામાં આવ્યો છે. બાંગ્લાદેશ, દક્ષિણ આફ્રિકા અને ભારત વચ્ચેની વિચારણા બાદ આખરે ભારતના પક્ષમાં અંતિમ મહોર મારવામાં આવી હતી. 6 ટીમો વચ્ચે રમાનારી આ મહત્વપૂર્ણ ટૂર્નામેન્ટના તમામ મુકાબલા મુંબઈના બ્રેબોર્ન સ્ટેડિયમ (Brabourne Stadium, Mumbai) તેમજ ગુજરાતના વડોદરા સ્થિત ઈન્ટરનેશનલ ક્રિકેટ સ્ટેડિયમ (International Cricket Stadium, Vadodara) ખાતે રમાડવામાં આવશે.

ICC ચેરમેન જયભાઇ શાહનું મોટું નિવેદન

આ ઐતિહાસિક જાહેરાત પર આઈસીસીના ચેરમેન જયભાઇ શાહ (ICC Chairman Jay Shah)એ જણાવ્યું હતું કે, "આઈસીસી મહિલા ચેમ્પિયન્સ ટ્રોફી 2027 મહિલા ક્રિકેટ માટે એક રોમાંચક અને નવો અધ્યાય છે. પ્રથમ સંસ્કરણ તરીકે તે વિશ્વની શ્રેષ્ઠ ટીમોને હાઈ-ક્વોલિટી સ્પર્ધા માટે એક મંચ પર લાવશે. હવે જ્યારે દર વર્ષે મહિલા ક્રિકેટમાં કોઈને કોઈ મોટી વૈશ્વિક ઈવેન્ટ યોજાશે, ત્યારે વિશ્વભરના ફેન્સ અને મહિલા ખેલાડીઓ માટે રમતને નવી ગતિ અને ઊર્જા મળશે."

T20 ફોર્મેટમાં 16 મેચ: સેમિફાઇનલ વિના સીધો ફાઈનલ જંગ

પુરુષોની ચેમ્પિયન્સ ટ્રોફી વનડે (ODI) ફોર્મેટમાં રમાય છે, પરંતુ મહિલા ચેમ્પિયન્સ ટ્રોફીનું આયોજન ફટાફટ T20 ફોર્મેટ (T20 Format)માં કરવામાં આવશે. આ ટૂર્નામેન્ટમાં યજમાન ભારત ઉપરાંત ઓસ્ટ્રેલિયા, ઇંગ્લેન્ડ, ન્યુઝીલેન્ડ, દક્ષિણ આફ્રિકા અને શ્રીલંકા સહિતની 6 મજબૂત ટીમો ભાગ લેશે. રાઉન્ડ-રોબિન લીગ ફોર્મેટ હેઠળ તમામ ટીમો એકબીજા સામે એક-એક મેચ રમશે. આ ટૂર્નામેન્ટમાં કોઈ સેમિફાઇનલ મેચ નહીં હોય. 15 દિવસ ચાલનારા આ મુકાબલામાં કુલ 16 મેચ રમાશે અને ગ્રુપ સ્ટેજ પૂર્ણ થયા બાદ પોઈન્ટ ટેબલની ટોપ-2 ટીમો વચ્ચે સીધો ખિતાબી ફાઇનલ મુકાબલો રમાશે.

આ પણ વાંચો: Afghanistan T20 Series: BCCI એ અફઘાનિસ્તાન T20 સીરીઝ માટે ભારતીય ટીમની જાહેરાત કરી, બુમરાહની વાપસી