નાની ટીમો માટે વધ્યું ચેલેન્જ
વર્ષ 2019 અને 2023 ના વનડે વર્લ્ડ કપમાં માત્ર 10 ટીમોએ ભાગ લીધો હતો. ક્રિકેટ નિષ્ણાતો અને ચાહકો લાંબા સમયથી માંગ કરી રહ્યા હતા કે ફૂટબોલની જેમ ક્રિકેટમાં પણ વધુ દેશોને વર્લ્ડ કપ રમવાની તક મળવી જોઈએ. આ માંગને ધ્યાનમાં રાખીને ICC એ 2027 ના વર્લ્ડ કપ (જે સાઉથ આફ્રિકા, ઝિમ્બાબ્વે અને નામીબિયામાં રમાવાનો છે) માટે ટીમોની સંખ્યા વધારીને 14 કરી દીધી. લોકોને લાગ્યું કે આનાથી નાની ટીમોને મોટો ફાયદો થશે. પરંતુ વાસ્તવિકતા એ છે કે ICC એ ટીમો તો વધારી દીધી, પણ ક્વોલિફાય થવાની પ્રક્રિયા એટલી જટિલ બનાવી દીધી છે કે નાની ટીમો માટે મુખ્ય ટૂર્નામેન્ટ સુધી પહોંચવું લોઢાના ચણા ચાવવા સમાન બની ગયું છે.
સુપર સિરીઝનો 'ચક્રવ્યૂહ' અને એસોસિએટ દેશોની મુશ્કેલી
નવા ફોર્મેટમાં સૌથી મોટો વાંધો 'સુપર સિરીઝ' ને લઈને છે. નવા નિયમ મુજબ, વર્લ્ડ કપના ક્વોલિફિકેશન રાઉન્ડમાં રેન્કિંગમાં 12મા, 13મા અને 14મા ક્રમે રહેલી ટીમો વચ્ચે એક 'સુપર સિરીઝ' રમાડવામાં આવશે. આ સુપર સિરીઝની શરત એ છે કે આ 3 ટીમોમાંથી જે ટીમ પ્રથમ ક્રમે આવશે, માત્ર તે જ ટીમ આગળના રાઉન્ડમાં જશે, જ્યારે બાકીની 2 ટીમો સીધી જ વર્લ્ડ કપની રેસમાંથી બહાર થઈ જશે. સ્કોટલેન્ડ અને નેધરલેન્ડ્સનો સીધો તર્ક એ છે કે આ નિયમ એસોસિએટ દેશોના વર્લ્ડ કપમાં આગળ વધવાના રસ્તા સાંકળા કરી દે છે. નાની ટીમોને પહેલાથી જ મોટી ટીમો સામે રમવાની તક ઓછી મળે છે, અને હવે આવા કઠોર નિયમોને કારણે તેમનું વર્લ્ડ કપ રમવાનું સપનું શરૂઆતમાં જ તૂટી શકે છે.
![World Cup 2027 Qualifiers, ICC Associate Nations, Gujarat First]()
સ્કોટલેન્ડ અને નેધરલેન્ડ્સની ICC સાથે મીટિંગ અને ભેદી મૌન
મીડિયા રિપોર્ટ્સ અનુસાર, આ અન્યાયી લાગતા ફોર્મેટ અંગે સ્કોટલેન્ડ, નેધરલેન્ડ્સ અને અન્ય કેટલીક એસોસિએટ ટીમોના બોર્ડ સભ્યોએ ICC સાથે 2 વખત મીટિંગ કરી છે. આ બેઠકોમાં ટીમોએ નવા ફોર્મેટ અંગે સ્પષ્ટતા માંગી હતી અને પોતાની ચિંતાઓ વ્યક્ત કરી હતી. આશ્ચર્યની વાત એ છે કે, આ મીટિંગ્સને 2 સપ્તાહથી વધુનો સમય વીતી ગયો હોવા છતાં, ICC તરફથી આ દેશોને હજુ સુધી કોઈ જ સત્તાવાર જવાબ આપવામાં આવ્યો નથી. કોઈપણ આંતરરાષ્ટ્રીય રમત સંસ્થા માટે આ પ્રકારનું મૌન નિરાશાજનક છે. બોર્ડનું કહેવું છે કે જ્યારે તમે આટલો મોટો ફેરફાર કરો છો, ત્યારે તેમાં પારદર્શિતા (Transparency) હોવી ખૂબ જ જરૂરી છે.
ક્વોલિફાયર મેચો ક્યાં રમાશે? અસમંજસનો માહોલ
વિવાદ માત્ર ફોર્મેટ પૂરતો સીમિત નથી, લોજિસ્ટિક્સ અને તૈયારીઓને લઈને પણ મોટો પ્રશ્ન છે. વર્લ્ડ કપ 2027 શરૂ થવામાં હવે માંડ 18 મહિના જેટલો સમય બાકી રહ્યો છે. સ્કોટલેન્ડ અને નેધરલેન્ડ્સ જેવી ટીમો ક્વોલિફાયર રાઉન્ડમાં પહોંચી ચૂકી છે, પરંતુ આ ક્વોલિફાયર મેચો ક્યા દેશમાં રમાશે તેની હજુ સુધી કોઈ જ જાહેરાત કરવામાં આવી નથી. ક્રિકેટની રમતમાં 'પિચ અને કન્ડિશન' (વાતાવરણ) ખૂબ મોટો ભાગ ભજવે છે. જો ટીમોને એ જ ખબર ન હોય કે તેમને કયા દેશની પિચો પર રમવાનું છે, તો તેઓ તૈયારી કેવી રીતે કરશે? ક્રિકેટ બોર્ડ્સનું સ્પષ્ટ માનવું છે કે આટલા ઓછા સમયમાં વચગાળે નિયમો બદલવા અને વેન્યુ (સ્થળ) અંગે માહિતી ન આપવી એ વ્યાવસાયિક ક્રિકેટના હિતમાં નથી.
આ વિવાદ ક્રિકેટના ભવિષ્ય માટે શું સૂચવે છે?
ઉલ્લેખનીય છે કે, જો ક્રિકેટને ખરા અર્થમાં ગ્લોબલ (વૈશ્વિક) રમત બનાવવી હોય, તો ICC એ નાની ટીમોને પૂરતી તકો અને સાનુકૂળ વાતાવરણ પૂરું પાડવું પડશે. નેધરલેન્ડ્સે પાછલા વર્લ્ડ કપમાં સાઉથ આફ્રિકા જેવી મજબૂત ટીમને હરાવીને સાબિત કર્યું હતું કે જો તેમને તક મળે તો તેઓ મોટો ઉલટફેર કરી શકે છે. પરંતુ, જો ક્વોલિફિકેશન પ્રક્રિયા જ તેમના માટે અશક્ય બનાવી દેવામાં આવશે, તો ક્રિકેટ ક્યારેય 10-12 દેશોની સીમાઓ ઓળંગી શકશે નહીં. હવે જોવાનું એ રહે છે કે ICC પોતાનું મૌન ક્યારે તોડે છે અને સ્કોટલેન્ડ તેમજ નેધરલેન્ડ્સ દ્વારા ઉઠાવવામાં આવેલા આ વ્યાજબી સવાલોનો શું ઉકેલ લાવે છે. સમય ઓછો છે અને ક્રિકેટ બોર્ડ્સની ધીરજ ખૂટી રહી છે. આશા રાખીએ કે 2027 નો વર્લ્ડ કપ વિવાદોથી નહીં, પણ શાનદાર ક્રિકેટથી યાદ રાખવામાં આવે.
આ પણ વાંચો : Cricket : વરસાદ, એક હાર અને બધું જ ખતમ! જાણો 2027ના વર્લ્ડ કપ પહેલા કઈ દિગ્ગજ ટીમ સાથે થયો મોટો ખેલ?
