લોસ એન્જલસ ઓલિમ્પિક 2028 માં ક્રિકેટની ઐતિહાસિક વાપસી અને નિયમો
અમેરિકાના લોસ એન્જલસમાં વર્ષ 2028 માં યોજાનારા ઓલિમ્પિક ગેમ્સમાં સત્તાવાર રીતે ક્રિકેટની વાપસી થવા જઈ રહી છે. આ અગાઉ વર્ષ 1900 માં માત્ર એક જ વાર ઓલિમ્પિકમાં ક્રિકેટ રમાયું હતું, જેમાં બ્રિટન અને ફ્રાન્સ વચ્ચે એકમાત્ર મેચ રમાઈ હતી. લાંબા સમય બાદ ટી20 ફોર્મેટની વધતી લોકપ્રિયતાને કારણે ક્રિકેટને ફરીથી આ વૈશ્વિક મંચ પર સ્થાન મળ્યું છે, જે રમત જગત માટે એક ઐતિહાસિક ક્ષણ છે.
મેન્સ અને વુમન્સની 6-6 દેશોની ટીમ લઈ શકશે ભાગ
આઈસીસી અને આઈઓસીના નવા નિયમો અનુસાર, સામાન્ય ક્રિકેટ વર્લ્ડ કપથી વિપરીત ઓલિમ્પિકમાં મેન્સ અને વિમેન્સ બંને કેટેગરીમાં માત્ર 6-6 દેશોની ટીમો જ ભાગ લઈ શકશે. આ ટુર્નામેન્ટ સંપૂર્ણપણે સત્તાવાર આઈસીસી માન્યતા પ્રાપ્ત ટી20 ફોર્મેટમાં રમાશે, જેમાં બંને વર્ગોમાં કુલ મળીને 28 રોમાંચક મેચોનું આયોજન કરવામાં આવશે. આ 6 ટીમોની પસંદગી કરવા માટે વિશ્વભરના દેશોને 4 અલગ-અલગ ભૌગોલિક મહાદ્વીપો અથવા રીજન (એશિયા, આફ્રિકા, યુરોપ અને ઓશેનિયા) માં વહેંચવામાં આવ્યા છે.
આઈસીસીનો નવો મહાદ્વીપ આધારિત રોડમેપ
મહિલાઓની કેટેગરીમાં 6 માંથી 4 ટીમોના નામ સત્તાવાર રીતે નક્કી થઈ ચૂક્યા છે. ચાલુ મહિલા ટી20 વર્લ્ડ કપ 2026 ના શાનદાર પ્રદર્શન અને પરિણામોના આધારે પોતાના ક્ષેત્રમાં સર્વશ્રેષ્ઠ પ્રદર્શન કરનારી ટીમોને સીધી એન્ટ્રી આપવામાં આવી છે. એશિયા રીજનમાંથી ભારતીય મહિલા ક્રિકેટ ટીમ, ઓશેનિયામાંથી શક્તિશાળી ઓસ્ટ્રેલિયા, આફ્રિકામાંથી સાઉથ આફ્રિકા અને યુરોપ મહાદ્વીપમાંથી ગ્રેટ બ્રિટન (ઇંગ્લેન્ડ) ની ટીમોએ ઓલિમ્પિકની ટિકિટ સીધી કન્ફર્મ કરી લીધી છે. આ નિયમના કારણે પાકિસ્તાન અને ન્યૂઝીલેન્ડ જેવી ટીમો સીધી એન્ટ્રી મેળવવામાં નિષ્ફળ રહી છે.
ટી20 ના રેન્કિંગ આધારે મેન્સ ટીમને અપાશે એન્ટ્રી
બીજી તરફ, પુરુષોની (મેન્સ) કેટેગરી માટે સંપૂર્ણપણે અલગ નિયમ બનાવવામાં આવ્યો છે. મેન્સ ટીમોનું ક્વોલિફિકેશન આઈસીસીની સત્તાવાર ટી20 રેન્કિંગના આધારે કરવામાં આવશે . આ માટેની છેલ્લી તારીખ 31 ડિસેમ્બર 2026 નક્કી કરવામાં આવી છે. 31 ડિસેમ્બર 2026 ના રોજ આઈસીસી રેન્કિંગમાં ચારેય નિર્ધારિત રીજન (એશિયા, આફ્રિકા, યુરોપ અને ઓશેનિયા) માંથી જે ટીમ પોતાના વિસ્તારમાં ટોચના સ્થાને હશે, તેને ઓલિમ્પિક 2028 માટે સીધી લાઇન-ક્લિયરન્સ એન્ટ્રી મળી જશે.
યુએસએ માટે કડક નિયમો અને કેરેબિયન દેશો
આ અહેવાલમાં સૌથી રસપ્રદ વળાંક યજમાન દેશ અમેરિકા (USA) નો છે. બંને વર્ગોમાં અમેરિકાને પાંચમી ટીમ તરીકે સીધી એન્ટ્રી મળી શકે છે, પરંતુ તેના માટે આઈસીસીએ એક કડક શરત મૂકી છે. ક્વાલિફિકેશનની છેલ્લી તારીખ સુધીમાં અમેરિકાની મેન્સ અને વિમેન્સ બંને ટીમોએ આઈસીસીની સત્તાવાર વૈશ્વિક રેન્કિંગમાં ટોપ-15 ટીમોની અંદર સ્થાન મેળવવું જ પડશે. જો અમેરિકા આ સ્થાન મેળવવામાં નિષ્ફળ રહેશે, તો તે જગ્યા વિશ્વની આગામી સર્વશ્રેષ્ઠ રેન્કિંગ ધરાવતી ટીમને ફાળવી દેવામાં આવશે, પછી ભલે તે ગમે તે મહાદ્વીપની હોય.
વર્ષ 2027 માં યોજાનારી ખાસ ક્વોલિફાયર ટૂર્નામેન્ટ
છેલ્લી અને છઠ્ઠી ટીમનો નિર્ણય કરવા માટે વર્ષ 2027 માં ખાસ ઓલિમ્પિક ક્વોલિફાયર ટુર્નામેન્ટનું આયોજન કરવામાં આવશે . આ ટુર્નામેન્ટમાં 8-8 ટીમો ભાગ લેશે. જેમાં આઈસીસી રેન્કિંગની આગામી 7 શ્રેષ્ઠ ટીમોને સ્થાન મળશે, જ્યારે આઠમી ટીમ કેરેબિયન (વેસ્ટ ઈન્ડિઝ) દેશોની હશે. વાસ્તવમાં, ઓલિમ્પિકમાં વેસ્ટ ઈન્ડિઝ એક સંયુક્ત ટીમ તરીકે રમી શકતી નથી કારણ કે તે એક સ્વતંત્ર દેશ નથી. આથી જ મહિલા વર્લ્ડ કપના સેમિફાઇનલમાં પહોંચવા છતાં વેસ્ટ ઈન્ડિઝ સીધું ક્વોલિફાય કરી શક્યું નથી. 2027 માં તમામ કેરેબિયન ટાપુ દેશો વચ્ચે એક આંતરિક ક્વોલિફાયર મેચ રમાશે અને તેની વિજેતા ટીમ આ 8 ટીમોની મુખ્ય ક્વોલિફાયર ટૂર્નામેન્ટમાં રમશે, જે જીતીને જ છઠ્ઠી ટીમ તરીકે ઓલિમ્પિકમાં સ્થાન મેળવી શકાશે.
આ પણ વાંચો : Ben Stokes Retirement : નાઇટક્લબ વિવાદ કે માનસિક થાક? બેન સ્ટોક્સે ખોલ્યું અસલી રહસ્ય
