ભારત અને શ્રીલંકા (India vs Sri Lanka) વચ્ચે કોલંબોમાં રમાઈ રહેલી બીજી ટેસ્ટ મેચ (2nd Test)માં સરફરાઝ ખાન (Sarfaraz Khan) ભલે પ્લેઇંગ ઇલેવન (Playing XI)નો ભાગ ન હોય, પરંતુ તેઓ મેદાન પર પોતાની હાજરીથી ચર્ચામાં આવી ગયા છે. સાઈ સુદર્શન સંપૂર્ણ રીતે ફિટ ન હોવાથી સરફરાઝને ટીમમાં સામેલ કરવામાં આવ્યા હતા, જોકે અંતિમ અગિયારમાં તેમને સ્થાન મળ્યું નથી. મેચના ત્રીજા દિવસે સરફરાઝ રિષભ પંત (Rishabh Pant)ની જગ્યાએ સબ્સ્ટિટ્યૂટ ફિલ્ડર (Substitute Fielder) તરીકે મેદાનમાં ઉતર્યા હતા. પંતને મેચના પ્રથમ દિવસે કાંડા પર ઈજા થઈ હતી અને તેઓ રિટાયર્ડ હર્ટ થયા હતા. જોકે બીજા દિવસે તેમણે 63 રનની ઝડપી ઇનિંગ રમીને ભારતના સ્કોરમાં મહત્વનું યોગદાન આપ્યું હતું.
સરફરાઝની સ્લેજિંગનો વીડિયો થયો વાયરલ
ત્રીજા દિવસે શ્રીલંકન બેટ્સમેનો સામે સરફરાઝ સતત વાતો કરતા જોવા મળ્યા હતા. શોર્ટ લેગ (Short Leg) પર ફિલ્ડિંગ કરતી વખતે તેમણે પોતાની મજાકિયા અને ચટપટી ટિપ્પણીઓથી શ્રીલંકન ખેલાડીઓનું ધ્યાન ભટકાવવાનો પ્રયાસ કર્યો હતો. સ્ટમ્પ માઇક (Stump Mic)માં સરફરાઝની કેટલીક વાતો સ્પષ્ટ રીતે કેદ થઈ હતી. તેઓ ક્યારેક “Main batsman is back!”, તો ક્યારેક “Go for it!”, “C'mon ICC Player Award!” અને “C'mon big man!” જેવા શબ્દો બોલતા સંભળાયા હતા.
શ્રીલંકન ખેલાડીઓમાંથી કોઈ ડ્રિંક બ્રેક (Drinks Break) માટે જવા લાગ્યા ત્યારે પણ સરફરાઝે મજાકિયા અંદાજમાં કહ્યું, “કમિન્દુ ભાઈ, આવી જાઓ ભાઈ, મોડું થઈ રહ્યું છે.” ત્યારબાદ રવિન્દ્ર જાડેજા (Ravindra Jadeja) બોલિંગ કરવા આવ્યા ત્યારે સરફરાઝે તેમની સાથે પણ મસ્તીભરી વાત કરી.
શ્રીલંકન કેપ્ટન સાથે પણ થઈ ટક્કર
સરફરાઝની સ્લેજિંગ માત્ર મજાક સુધી સીમિત રહી નહોતી. શ્રીલંકાના કેપ્ટન ધનંજય ડી સિલ્વા (Dhananjaya de Silva) સામે પણ તેમણે ચટપટી ટિપ્પણી કરી હતી. જ્યારે ધનંજય બોલ પહેલાં ધ્યાન ભટકાવતાં જોવા મળ્યા ત્યારે સરફરાઝે તેમને સમય બગાડવા બદલ ટોણો માર્યો અને રમવા માટે કહ્યું. આ વાતો પણ સ્ટમ્પ માઇકમાં કેદ થઈ હતી. રસપ્રદ વાત એ છે કે આ ટિપ્પણી બાદ માત્ર 2 બોલમાં ધનંજય ડી સિલ્વા આઉટ થઈ ગયા હતા. સરફરાઝ શોર્ટ લેગ પર ઊભા રહીને સતત શ્રીલંકન બેટ્સમેનો સાથે વાત કરતા હતા અને બાદમાં અમ્પાયરે તેમને ટોક્યા પણ હતા.
કોલંબો ટેસ્ટમાં ભારતની મજબૂત સ્થિતિ
ભારતે પોતાની પ્રથમ ઇનિંગ (First Innings)માં 503/9ના વિશાળ સ્કોર પર ઇનિંગ ડિકલેર કરી હતી. ધ્રુવ જુરેલે 115 રનની અણનમ ઇનિંગ રમી, જ્યારે દેવદત્ત પડિક્કલે પણ 117 રન બનાવ્યા હતા. જવાબમાં શ્રીલંકન ટીમ પર ભારે દબાણ જોવા મળ્યું હતું. આમ, પ્લેઇંગ ઇલેવનમાં સ્થાન ન મળ્યું હોવા છતાં સરફરાઝ ખાને પોતાની ફિલ્ડિંગ અને સ્લેજિંગથી કોલંબો ટેસ્ટમાં અલગ જ છાપ છોડી છે.
આ પણ વાંચો : IND vs SL 2nd Test : સતત 3 ચોગ્ગા, પછી ક્લીન બોલ્ડ અને ડ્રામા... જુઓ આઉટ થયા બાદ કેમ ગુસ્સામાં લાલચોળ થઈ ગયો યશસ્વી જયસ્વાલ?
