દુર્લભ બીમારી 'HLH' અને ભારતમાં સારવાર

શાપુર ઝાદરન 'હિમોફેગોસાયટીક લિમ્ફોહિસ્ટિઓસાયટોસિસ' (HLH) નામની અત્યન્ત ગંભીર બીમારીથી પીડાતા હતા. આ એક એવો રોગ છે જે સામાન્ય રીતે બાળકોને વધુ અસર કરે છે, જેમાં શરીરની રોગપ્રતિકારક શક્તિ (Immune System) અતિશય સક્રિય થઈને ગંભીર બળતરા પેદા કરે છે અને અસ્થિ મજ્જા (Bone Marrow), લિવર, બરોળ તેમજ લસિકા ગાંઠોના પેશીઓને ભારે નુકસાન પહોંચાડે છે. ગયા વર્ષે ઓક્ટોબર મહિનામાં તેમને પ્રથમ વખત અસ્વસ્થતા જણાયા બાદ સ્થાનિક ડોક્ટરોની સલાહ પર તેઓ વિશેષ સારવાર (Treatment) માટે ભારત આવ્યા હતા. શરૂઆતમાં તેમની તબિયતમાં સારો સુધારો થતાં હોસ્પિટલમાંથી રજા આપવામાં આવી હતી, પરંતુ ત્યારબાદ અચાનક આ રોગ ફરી ઉથલો મારતા તેમની સ્થિતિ નાજુક બની ગઈ હતી.

અફઘાન ક્રિકેટના પાયાના પથ્થર અને શાનદાર કારકિર્દી

શાપુર અફઘાનિસ્તાનની શરૂઆતી ક્રિકેટ સફરના પાયાના અને અત્યંત મહત્વપૂર્ણ ખેલાડીઓમાંના એક હતા. વર્ષ 2009 થી 2020 સુધીના આંતરરાષ્ટ્રીય ક્રિકેટ (International Cricket) ના કાર્યકાળ દરમિયાન તેમણે અફઘાનિસ્તાન ક્રિકેટને વૈશ્વિક સ્તરે ઓળખ અપાવવામાં અજોડ યોગદાન આપ્યું હતું. તેમણે દેશ માટે 44 વનડે (ODI) મેચોમાં 43 વિકેટ અને 36 T20 આંતરરાષ્ટ્રીય (T20 International) મેચોમાં 37 વિકેટ ઝડપી હતી.

ક્રિકેટ બોર્ડે વ્યક્ત કર્યો ઊંડો શોક

અફઘાનિસ્તાન ક્રિકેટ બોર્ડે સોશિયલ મીડિયા (Social Media) પ્લેટફોર્મ 'X' પર શાપુરના સમર્પણ અને જુસ્સાને યાદ કરતા ઊંડો શોક વ્યક્ત કર્યો છે. બોર્ડે જણાવ્યું કે, શાપુર મેદાન પરની સિદ્ધિઓ ઉપરાંત યુવા અફઘાન ક્રિકેટરો અને વિશ્વભરના ચાહકો માટે પ્રેરણાનો સાચો સ્ત્રોત (Source of Inspiration) હતા. તેમની લડાયક વૃત્તિ અને રમત પ્રત્યેનો અખૂટ પ્રેમ હંમેશા ઇતિહાસના પાના પર અમર રહેશે. બોર્ડે તેમના પરિવાર અને સમગ્ર ક્રિકેટ સમુદાય પ્રત્યે સંવેદના (Condolences) વ્યક્ત કરીને ઈશ્વર પાસે દિવંગત આત્માને જન્નત-ઉલ-ફિરદૌસમાં ઉચ્ચ સ્થાન આપવાની પ્રાર્થના કરી છે.

આ પણ વાંચો : Cricket News : ક્રિકેટ પ્રેમીઓ તૈયાર રહેજો! તમારી ફેવરિટ રમતમાં ICC કરવા જઇ રહી છે સૌથી મોટો ફેરફાર