Aashirwad Suryavanshi Cricket Century : ભારતીય ક્રિકેટ જગતમાં સૂર્યવંશી બ્રધર્સનો નવો યુગ શરૂ થઈ ગયો છે. આગામી 26 જૂને આયર્લેન્ડ સામે રમાનારી ટી20 મેચમાં 15 વર્ષનો યુવા સન્સેશન વૈભવ સૂર્યવંશી દેશ માટે પોતાનું ઇન્ટરનેશનલ ડેબ્યુ કરવા માટે સંપૂર્ણ તૈયાર છે.આ સફર વચ્ચે તેના 10 વર્ષના નાના ભાઈ આશીર્વાદ સૂર્યવંશીએ પણ સ્થાનિક ક્રિકેટમાં 168 રનની વિસ્ફોટક ઇનિંગ રમીને ખળભળાટ મચાવી દીધો છે.
26 જૂને આયર્લેન્ડ સામે 15 વર્ષના વૈભવ સૂર્યવંશીનું ઇન્ટરનેશનલ ડેબ્યુ શક્ય
ભારતીય ક્રિકેટના ઇતિહાસમાં ખૂબ જ ઓછા એવા ખેલાડીઓ રહ્યા છે જેમણે માત્ર 15 વર્ષની ઉંમરે રાષ્ટ્રીય ટીમની જર્સી પહેરવાનું બહુમાન મેળવ્યું હોય. વૈભવ સૂર્યવંશી આ યાદીમાં નવું નામ ઉમેરવા જઈ રહ્યો છે. 26 જૂને આયર્લેન્ડ સામે રમાનારી પ્રથમ ટી20 મેચમાં તેને પ્લેઇંગ ઇલેવનમાં સ્થાન મળી શકે છે, જે ભારતીય ક્રિકેટ ચાહકો માટે અત્યંત રોમાંચક ક્ષણ હશે. આ યુવા ડાબોડી બેટ્સમેનની ટેકનિક અને આક્રમક શૈલીના કારણે તેને ભવિષ્યનો સુપરસ્ટાર ગણવામાં આવી રહ્યો છે.
વૈભવની પસંદગી પાછળ એક મોટી યોજના
ભારતીય પસંદગીકારોએ તેના સ્થાનિક ક્રિકેટના શાનદાર પ્રદર્શનને ધ્યાનમાં રાખીને આ મોટો નિર્ણય લીધો છે. વૈભવને ટીમમાં સામેલ કરવા પાછળનો હેતુ લાંબા ગાળાના આયોજનનો એક ભાગ છે, જેથી આગામી સમયમાં રમાનારી મોટી આંતરરાષ્ટ્રીય ટૂર્નામેન્ટ્સ માટે મજબૂત બેન્ચ સ્ટ્રેન્થ તૈયાર કરી શકાય.
આશીર્વાદ સૂર્યવંશીનો સ્થાનિક મેચમાં 168 રનનો વિસ્ફોટક રેકોર્ડ
એક તરફ જ્યાં મોટા ભાઈ વૈભવનું કરિયર ઇન્ટરનેશનલ લેવલ પર ઝડપથી આગળ વધી રહ્યું છે, ત્યારે બીજી તરફ તેના માત્ર 10 વર્ષના નાના ભાઈ આશીર્વાદ સૂર્યવંશીએ પણ ક્રિકેટના મેદાન પર તબાહી મચાવી છે. તાજેતરમાં રમાયેલી એક સ્થાનિક મેચમાં આશીર્વાદે 119 બોલનો સામનો કરીને 168 રનની આક્રમક ઇનિંગ રમી છે. આ શાનદાર ઇનિંગ દરમિયાન તેણે 19 ચોગ્ગા અને 6 ગગનચુંબી છગ્ગા ફટકાર્યા હતા, જે તેનો આત્મવિશ્વાસ અને તાકાત દર્શાવે છે
આશીર્વાદે ઈન્ટાગ્રામ હેન્ડલ પર આપી માહિતી
આશીર્વાદે તેના સત્તાવાર ઇન્સ્ટાગ્રામ હેન્ડલ પર આ મેચનો સ્કોરકાર્ડ અને પોતાની તસવીર શેર કરીને ચાહકોને આ માહિતી આપી હતી. 141.18 ના સ્ટ્રાઈક રેટથી રમાયેલી આ ઇનિંગની મદદથી તેની ટીમે નિયત 40 ઓવરમાં 311 રનનો વિશાળ સ્કોર ખડક્યો હતો. રસપ્રદ વાત એ છે કે, આ પહેલા પણ એક મેચમાં આશીર્વાદે માત્ર 87 બોલમાં 103 રનની ઇમ્પાવરિંગ સદી ફટકારી હતી, જે સાબિત કરે છે કે ક્રિકેટ તેના લોહીમાં વણાયેલું છે.
ભારતીય ટીમનું સંપૂર્ણ સમીકરણ અને પિતા સંજીવનો માસ્ટર પ્લાન
વૈભવ સૂર્યવંશીના પરિવારમાં કુલ ચાર ભાઈઓ છે, જેમાં ઉજ્જવલ અને વિશાલ મોટા છે, જ્યારે વૈભવ ત્રીજા નંબરે અને આશીર્વાદ સૌથી નાનો છે. બંને નાના ભાઈઓની અસાધારણ પ્રતિભા પાછળ તેમના પિતા સંજીવ સૂર્યવંશીની સખત મહેનત અને માસ્ટર પ્લાન રહેલો છે. પિતા સંજીવે મીડિયા સમક્ષ આત્મવિશ્વાસપૂર્વક જણાવ્યું છે કે તેઓ આગામી બે વર્ષની અંદર પોતાના સૌથી નાના દીકરા આશીર્વાદને પણ વૈભવની જેમ જ ટોપ-ક્લાસ ઇન્ટરનેશનલ પ્લેયર તરીકે તૈયાર કરવા માગે છે .
આયર્લેન્ડ સામે બે ટીમ ટી-20 મેચોની સિરીઝ રમશે
વર્તમાન શેડ્યૂલની વાત કરીએ તો વૈભવ સૂર્યવંશીની યુકે (UK) પ્રવાસ માટે ભારતીય ટીમમાં પસંદગી કરવામાં આવી છે . ટીમ ઇન્ડિયા પહેલા આયર્લેન્ડ સામે બે ટી20 મેચોની સિરીઝ રમશે અને ત્યારબાદ સીધી ઇંગ્લેન્ડ પ્રવાસે રવાના થશે, જ્યાં બંને ટીમો વચ્ચે પાંચ ટી20 મેચોની હાઈ-વોલ્ટેજ શ્રૃંખલા રમાશે. આ સાત મેચો દરમિયાન વૈભવને પોતાની પ્રતિભા સાબિત કરવાની પૂરતી તકો મળશે. આ ઉપરાંત, આ જ વર્ષે યોજાનારી પ્રતિષ્ઠિત એશિયન ગેમ્સ માટેની ભારતની ટી૨૦ ટીમમાં પણ વૈભવ સૂર્યવંશીનું નામ અગાઉથી જ કન્ફર્મ થઈ ચૂક્યું છે, જે ભારતીય ક્રિકેટમાં તેના વધતા કદની સાબિતી છે.
આ પણ વાંચો : ICC ODI Rankings : ગિલે કરી એવી કમાલ કે કિંગ કોહલી પણ રહી ગયા પાછળ! ICC રેન્કિંગમાં મોટો ફેરફાર
