Vaibhav Suryavanshi Team India : ભારતીય ક્રિકેટના ઉભરતા સિતારા અને 15 વર્ષના વંડર કિડ વૈભવ સૂર્યવંશી આગામી 26 જૂનથી શરૂ થઈ રહેલી આયર્લેન્ડ અને ઇંગ્લેન્ડ સામેની મેચો દ્વારા આંતરરાષ્ટ્રીય સ્તરે ધમાકેદાર શરૂઆત કરવા જઈ રહ્યા છે. જોકે, આ પ્રવાસ દરમિયાન ભારતીય ટીમની સ્ક્વોડનો મુખ્ય હિસ્સો હોવા છતાં ઇંગ્લેન્ડમાં તેને ભારતીય ટીમના સત્તાવાર ડ્રેસિંગ રૂમમાં લાંબો સમય બેસવા મળશે નહીં.
વૈભવ ભારતીય ટીમની જર્સીમાં રમવા તૈયાર, પરંતુ બ્રિટનમાં નિયમો બન્યા અવરોધ
આઈપીએલ અને ત્યારબાદ ઈન્ડિયા એ (India A) માટે રમી ચૂકેલા બિહારના ડાબોડી ઓપનર વૈભવ સૂર્યવંશીએ તાજેતરમાં પ્રભાવશાળી રમત બતાવીને ટીમ ઈન્ડિયાના સિનિયર સિલેક્ટર્સનું ધ્યાન પોતાની તરફ ખેંચ્યું છે. ભારત આગામી શુક્રવારથી આયર્લેન્ડ સામે બે મેચની ટી૨૦ શ્રેણી રમશે અને ત્યારબાદ પાંચ ટી20 મેચોની સિરીઝ માટે ઇંગ્લેન્ડ રવાના થશે. આ કુલ સાત મેચોની મહત્વપૂર્ણ શ્રેણીમાં વૈભવ સૂર્યવંશીને પ્લેઈંગ ઈલેવનમાં ઓપનિંગ કરવાની સુવર્ણ તક મળી શકે છે.
આંતરરાષ્ટ્રીય ક્રિકેટ પરિષદના નિયમો અનુસાર કામગીરી
પરંતુ, ઇંગ્લેન્ડ પ્રવાસ દરમિયાન વૈભવ ભારતીય ટીમના સિનિયર ખેલાડીઓ સાથે મેચ પહેલા કે મેચ પછી ડ્રેસિંગ રૂમ શેર કરી શકશે નહીં. બ્રિટિશ અખબાર 'ધ ગાર્ડિયન' ના તાજા અહેવાલ મુજબ, આ નિર્ણય પાછળ ભારત કે બ્રિટન વચ્ચેનો કોઈ અંગત વિવાદ નથી, પરંતુ આંતરરાષ્ટ્રીય ક્રિકેટ પરિષદ (ICC) અને ઇંગ્લેન્ડ ક્રિકેટ બોર્ડ (ECB) ના કડક ચાઇલ્ડ પ્રોટેક્શન અને સિક્યોરિટી પ્રોટોકોલ નિયમો જવાબદાર છે.
ICC અને ECB ના બાળ સુરક્ષા પ્રોટોકોલ શું છે?
આંતરરાષ્ટ્રીય નિયમો અનુસાર, 16 વર્ષથી ઓછી ઉંમરના કોઈપણ સબ-જુનિયર અથવા જુનિયર ખેલાડીને પુખ્ત વયના (એડલ્ટ) ખેલાડીઓ સાથે કોમન ડ્રેસિંગ રૂમમાં કપડાં બદલવાની અથવા લાંબો સમય વિતાવવાની કાનૂની પરવાનગી નથી . વૈભવની ઉંમર હાલમાં માત્ર 15 વર્ષ હોવાથી તેને યુકે (UK) ના દરેક સ્ટેડિયમ અને વેન્યુ પર એક સંપૂર્ણપણે અલગ આઇસોલેટેડ ચેન્જિંગ રૂમ ફાળવવામાં આવશે.
ઉંમરને કારણે લાગ્યો પ્રતિબંધ
નિયમોની વધુ સ્પષ્ટતા કરતા અહેવાલમાં જણાવાયું છે કે વૈભવને માત્ર લાઈવ મેચ દરમિયાન, સત્તાવાર ટીમ મિટિંગ્સમાં અને કેપ્ટન-કોચના સેટ સ્ટેજ ટોક્સ વખતે જ ડ્રેસિંગ રૂમમાં પ્રવેશવાની મંજૂરી અપાશે . મેચ શરૂ થતા પહેલા અને મેચ પૂરી થયા પછી કપડાં બદલવાના સમયે તેણે ફરજિયાતપણે પોતાના અલગ રૂમમાં જવું પડશે. ઇંગ્લેન્ડની ફૂટબોલ લીગ આર્સનલના મેક્સ ડાઉમેન સાથે પણ ગયા સીઝનમાં આવું જ કરવામાં આવ્યું હતું જ્યાં સુધી તે 16 વર્ષનો ન થયો. ભારતમાં આવા કોઈ નિયમો લાગુ ન હોવાથી વૈભવ માટે આ અનુભવ એકદમ નવો અને થોડો અજીબ હોઈ શકે છે. આ જ કારણોસર BCCI એ વૈભવના માતા-પિતાને પણ આ આખી ટૂર પર સાથે જવાની ખાસ મંજૂરી આપી છે (Youngest Indian Cricket Player).
ઈતિહાસની સૌથી ઝડપી સદી ફટકારી
વૈભવ સૂર્યવંશીની પ્રતિભા વિશે વાત કરીએ તો તે માત્ર નાની ઉંમરનો ખેલાડી નથી, પરંતુ ક્રિકેટના મેદાન પર રેકોર્ડ્સનો વરસાદ કરનારો પ્લેયર છે. તાજેતરમાં જ શ્રીલંકા એ (Sri Lanka A) સામે રમાયેલી ટ્રાઈ-નેશન સિરીઝની ફાઇનલ મેચમાં વૈભવે માત્ર 11 બોલનો સામનો કરીને લિસ્ટ એ ક્રિકેટના ઇતિહાસની સૌથી ઝડપી અડધી સદી ફટકારીને સનસનાટી મચાવી દીધી હતી .
21 વર્ષ જૂનો ઐતિહાસિક રેકોર્ડ તોડી નાખ્યો
આ તોફાની ઇનિંગ સાથે તેણે શ્રીલંકાના કૌશલ્યા વીરરત્નેનો 21 વર્ષ જૂનો ઐતિહાસિક રેકોર્ડ તોડી નાખ્યો હતો, જેણે વર્ષ 2005 માં 12 બોલમાં અડધી સદી કરી હતી. તેની આ અસાધારણ આક્રમક ક્ષમતાના કારણે જ તેને ભારતીય ટી20 ટીમમાં સ્થાન મળ્યું છે. ક્રિકેટ જગતના દિગ્ગજોનું માનવું છે કે જો વૈભવ ઇંગ્લેન્ડની ફાસ્ટ પિચો પર પોતાનો આ જ આક્રમક અંદાજ જાળવી રાખશે, તો તે ખૂબ જ ટૂંકા સમયમાં વિશ્વ ક્રિકેટ પર રાજ કરશે.
આ પણ વાંચો : Aashirwad Suryavanshi Cricket Century : સૂર્યવંશી પરિવારનો બીજો ધમાકો! 10 વર્ષના આશીર્વાદે 119 બોલમાં ફટકાર્યા 168 રન
