401 રનની ભાગીદારીએ બદલ્યો મેચનો રંગ

મેચ દરમિયાન વેસ્ટ ઈન્ડિઝની શરૂઆત સારી રહી નહોતી અને ટીમ મુશ્કેલ પરિસ્થિતિમાં ફસાઈ ગઈ હતી. જોકે ત્યારબાદ આમિર જંગૂ અને રોસ્ટન ચેઝે ઇનિંગ્સને સંભાળી હતી. બંને બેટ્સમેનોએ 602 બોલનો સામનો કરીને છઠ્ઠી વિકેટ માટે 401 રનની શાનદાર ભાગીદારી નોંધાવી હતી. ટેસ્ટ ક્રિકેટના ઈતિહાસમાં છઠ્ઠી વિકેટ માટે આ અત્યાર સુધીની સૌથી મોટી ભાગીદારી બની છે. આ પહેલાં આ રેકોર્ડ ઈંગ્લેન્ડના જોની બેરસ્ટો અને બેન સ્ટોક્સના નામે હતો. બંનેએ જાન્યુઆરી 2016માં કેપટાઉન (Cape Town) ખાતે દક્ષિણ આફ્રિકા (South Africa) સામે રમાયેલી ટેસ્ટ મેચમાં છઠ્ઠી વિકેટ માટે 399 રન ઉમેર્યા હતા. આમિર જંગૂ અને રોસ્ટન ચેઝે આ સિદ્ધિને 2 રનથી પાછળ છોડી નવી ઇતિહાસ રચ્યો છે.

આમિર જંગૂની ડબલ સેન્ચુરીએ પણ રચ્યો નવો કીર્તિમાન

માત્ર પોતાની બીજી ટેસ્ટ મેચ રમી રહેલા આમિર જંગૂએ અસાધારણ બેટિંગનું પ્રદર્શન કરતાં 373 બોલમાં 233 રનની યાદગાર ડબલ સેન્ચુરી (Double Century) ફટકારી હતી. બીજી તરફ કેપ્ટન રોસ્ટન ચેઝ 184 રન બનાવીને અણનમ (Not Out) રહ્યા હતા. જંગૂની 233 રનની ઇનિંગ્સ અનેક કારણોસર ખાસ રહી હતી. તેઓ હવે વર્લ્ડ ટેસ્ટ ચેમ્પિયનશિપ (World Test Championship - WTC)ના ઈતિહાસમાં વેસ્ટ ઈન્ડિઝ તરફથી સૌથી મોટો વ્યક્તિગત સ્કોર (Highest Individual Score) બનાવનાર બેટ્સમેન બની ગયા છે.

વેસ્ટ ઈન્ડિઝ અને શ્રીલંકા સામે પણ બન્યો મોટો રેકોર્ડ

401 રનની આ ભાગીદારી વેસ્ટ ઈન્ડિઝના ટેસ્ટ ઈતિહાસની બીજી સૌથી મોટી ભાગીદારી પણ છે. આ યાદીમાં પ્રથમ સ્થાન કોનરાડ હન્ટે (Conrad Hunte) અને દિગ્ગજ ઓલરાઉન્ડર ગેરી સોબર્સ (Garry Sobers)ના નામે છે. બંનેએ 1958માં પાકિસ્તાન (Pakistan) સામે બીજી વિકેટ માટે 446 રનની ભાગીદારી નોંધાવી હતી. આ ઉપરાંત શ્રીલંકા સામે કોઈપણ વિકેટ માટે ટેસ્ટ ક્રિકેટમાં આ બીજી સૌથી મોટી ભાગીદારી પણ બની છે. આ યાદીમાં પ્રથમ સ્થાન ન્યૂઝીલેન્ડ (New Zealand)ના માર્ટિન ક્રો (Martin Crowe) અને એન્ડ્રૂ જોન્સ (Andrew Jones)ના નામે છે, જેમણે 1991માં ત્રીજી વિકેટ માટે 467 રનની ભાગીદારી કરી હતી.

જોકે, ટેસ્ટ ક્રિકેટમાં કોઈપણ વિકેટ માટે સૌથી મોટી ભાગીદારીનો સર્વકાલીન વર્લ્ડ રેકોર્ડ હજુ પણ શ્રીલંકાના કુમાર સંગાકારા (Kumar Sangakkara) અને મહેલા જયવર્ધને (Mahela Jayawardene)ના નામે યથાવત છે. બંનેએ 2006માં દક્ષિણ આફ્રિકા સામે ત્રીજી વિકેટ માટે 624 રનની ઐતિહાસિક ભાગીદારી નોંધાવી હતી, જે આજ સુધી અતૂટ છે.

આ પણ વાંચો : India Sri Lanka Series : ભારતીય ટીમે શ્રીલંકા સામે T20 રમવાની કેમ ના પાડી? સામે આવ્યું અસલી કારણ