Jamnagar ના ખ્યાતનામ બિલ્ડરના મૃત્યુ કેસમાં 1 વર્ષ બાદ મોટો વળાંક, આકસ્મિક નહીં પરંતુ...!

કરોડોની ઉઘરાણીથી બિલ્ડર પર હતો કથિત દબાણ

આક્ષેપ કરવામાં આવ્યો છે કે મેરામણભાઈ પરમારને સ્વામિનારાયણ ગ્રુપના વાઢેર પરિવાર અને પટેલ બિલ્ડર પિતા-પુત્ર દ્વારા સતત માનસિક અને આર્થિક ત્રાસ આપવામાં આવતો હતો. વ્યાજ સહિત કરોડો રૂપિયાની ઉઘરાણી કરવામાં આવતી હોવાનો પણ ફરિયાદમાં ઉલ્લેખ છે.

જમીન અને શાળામાં હિસ્સો પડાવી લીધો હોવાનો આક્ષેપ

કથિત વ્યાજખોરોએ માત્ર નાણાંની ઉઘરાણી જ નહીં પરંતુ જામનગર આસપાસની કેટલીક જમીનો તેમજ એક શાળામાં રહેલો 50 ટકા હિસ્સો પણ પડાવી લીધો હોવાનો આક્ષેપ કરવામાં આવ્યો છે. આર્થિક વ્યવહારો અને વધતા વ્યાજના બોજને કારણે બિલ્ડર ભારે સંકળામણમાં આવી ગયા હોવાનો ફરિયાદમાં દાવો છે.

ગાંધીનગરમાં પીધી હતી ઝેરી દવા

આક્ષેપ મુજબ, સતત ત્રાસ અને આર્થિક મુશ્કેલીઓથી કંટાળીને મેરામણભાઈ પરમારે ગાંધીનગરમાં ઝેરી દવા પીધી હતી. ત્યારબાદ તેમને સારવાર માટે હોસ્પિટલમાં ખસેડવામાં આવ્યા હતા. જોકે, હોસ્પિટલના બિછાને સારવાર દરમિયાન તેમનું મૃત્યુ થયું હતું.

એક વર્ષ બાદ મૃત્યુને લઈને નોંધાઈ ગંભીર ફરિયાદ

હવે આ સમગ્ર મામલે ગાંધીનગરમાં આપઘાત માટે દુષ્પ્રેરણાની ફરિયાદ નોંધાવવામાં આવી છે. ફરિયાદમાં માલેતુજાર ભીખુભા વાઢેર, તેમના ત્રણ પુત્રો, ત્રણ પુત્રવધૂઓ તેમજ પટેલ બિલ્ડર પિતા-પુત્ર સામે ગંભીર આક્ષેપો કરવામાં આવ્યા છે.

મેરામણભાઈ પરમારનું મૃત્યુ ખરેખર કયા સંજોગોમાં થયું અને તેમાં કથિત વ્યાજખોરોની કેટલી ભૂમિકા હતી, તે હવે તપાસનો મહત્વનો વિષય બન્યો છે. ફરિયાદ બાદ પોલીસ તપાસમાં નાણાકીય વ્યવહારો, જમીન-મિલકતના સોદા, ઉઘરાણી તથા મૃત્યુ પૂર્વેની સમગ્ર પરિસ્થિતિ અંગે મહત્વની વિગતો સામે આવી શકે છે. આ કેસમાં આગળની તપાસ બાદ જ સમગ્ર હકીકત સ્પષ્ટ થશે.

આ પણ વાંચોઃ Ahmedabad Drugs Case: નરોડા પોલીસે ઝડપી પાડ્યું 1.17 કરોડનું કોકેઈન, ડ્રગ્સ કોને મંગાવ્યું હતુ?