Valsad : કરોડપતિ હોવા છતાં ચોરીની ટેવ, સાળી-બનેવીની ચોર ગેંગ ઝડપાઈ

સામાન્ય રીતે લોકો મજબૂરી કે ગરીબીને કારણે ગુનાખોરીના રસ્તે જતા હોય છે, પરંતુ વલસાડમાં પકડાયેલા રાજુ અને સોનિયાની વાત સાવ અલગ છે. આ સાળી-બનેવીની જોડી પાસે અઢળક સંપત્તિ હોવા છતાં તેમને ચોરી કરવાની આદત પડી ગઈ હતી. તેઓ પોતાની મોંઘીદાટ ફોર્ચ્યુનર કારમાં નીકળતા અને આલીશાન બંગલાઓની રેકી કરી ત્યાં હાથફેરો કરતા હતા. પોલીસ તપાસમાં બહાર આવ્યું છે કે આ ગેંગ માત્ર ગુજરાત જ નહીં, પણ મહારાષ્ટ્રના પુણે, બોરીવલી, અમરાવતી અને ચિંચવડ જેવા વિસ્તારોમાં પણ સક્રિય હતી. તેમની લક્ઝુરિયસ લાઈફસ્ટાઈલ પાછળ ચોરીના નાણાંનો મોટો હિસ્સો હોવાની આશંકા છે. વલસાડ પોલીસે નાસિકના ધારણ ગામ સ્થિત એક ફાર્મ હાઉસ પરથી આ જોડીને દબોચી લીધી છે. તેમની પાસેથી કાર, સોના-ચાંદીના દાગીના અને રોકડ મળી કુલ 34 લાખ રૂપિયાનો મુદ્દામાલ જપ્ત કરવામાં આવ્યો છે. હાલ પોલીસ એ તપાસ કરી રહી છે કે ચોરીના આ ઘરેણાં તેઓ કોને વેચતા હતા અને આ નેટવર્કમાં અન્ય કેટલા લોકો સામેલ છે.