Dahod: લગ્નના સપના બતાવી યુવક પાસેથી 2.40 લાખ પડાવ્યા, લૂંટેરી દુલ્હનનો પર્દાફાશ

શું છે સમગ્ર મામલો?

પીડિત પરિવાર દલાલોની જાળમાં ફસાઈ ગયો હતો. દલાલોએ યુવકના લગ્ન કરાવી આપવાના બહાને વિશ્વાસમાં લીધો હતો. લગ્નની વિધિ પૂર્ણ કરી યુવકે દુલ્હનને ફુલહાર પહેરાવ્યા હતા, પરંતુ આ ખુશી માત્ર બે દિવસ જ ટકી શકી. લગ્નના બીજા જ દિવસે દુલ્હને એક નાટક રચ્યું. તેણે પોતાના ‘કાકાને અકસ્માત’ નડ્યો હોવાનું બહાનું કાઢ્યું અને પિયર જવાની જીદ પકડી. પતિ અને પરિવારજનોએ તેને બસ સ્ટેન્ડ સુધી મૂકવા જવાની તૈયારી દર્શાવી, પરંતુ બસ સ્ટેન્ડ પર પહોંચતા જ તે ત્યાં પહેલેથી હાજર એક અજાણ્યા શખ્સ સાથે બાઈક પર બેસીને ફરાર થઈ ગઈ હતી.

પૂર્વયોજિત કાવતરું

તપાસ દરમિયાન એવું જાણવા મળ્યું છે કે, આ આખી ગેંગ ખૂબ જ આયોજનબદ્ધ રીતે કામ કરે છે. યુવતીએ પોતાની ઓળખ સાબિત કરવા માટે પોતાનું આધારકાર્ડ (Aadhaar Card) પણ બતાવ્યું હતું, જેથી પરિવારને તેના પર શંકા ન જાય. આ એક પૂર્વયોજિત ચાલ હતી, જેના દ્વારા તેમણે પરિવારનો વિશ્વાસ જીત્યો હતો. હાલ ઝાલોદ પોલીસ (Zalod Police) આ મામલે સઘન તપાસ કરી રહી છે. પોલીસ દલાલો અને આ ગેંગના અન્ય સભ્યોની શોધખોળ કરી રહી છે. પ્રાથમિક તપાસમાં એવું પણ અનુમાન છે કે આ ગેંગે અગાઉ પણ ઘણા લોકોને આ જ રીતે છેતર્યા હશે અને પોલીસ તપાસમાં વધુ ભોગ બનનારાઓ સામે આવી શકે છે. આ ઘટનાએ લગ્નના નામે છેતરપિંડી કરતી ટોળકીઓ સામે સાવધ રહેવાની ચેતવણી આપી છે.

 આ પણ વાંચોઃ Surat: ખેતીવાડીના સાધનો ચોરતી ટોળકીનો પર્દાફાશ, પોલીસે મુદ્દામાલ સાથે 4 આરોપીઓને દબોચ્યા