Delhi Dehradun Expressway Accident: હરિદ્વાર જતાં પરિવારને નડ્યો અકસ્માત, કાર રિવર્સ લેતાં સ્કોર્પિયોએ મારી ટક્કર, 4 ના મોત

Delhi Dehradun Expressway Accident: એક્સપ્રેસ વે પર કાળમુખી ટક્કર

હરિયાણાના સોનીપત જિલ્લાના મંઢોરા ગામના 2 પરિવારો અલગ-અલગ કારમાં હરિદ્વાર જઈ રહ્યા હતા. આ દરમિયાન રામપુર મનિહારાન વિસ્તારમાં હલગોયા કટ પાસે ટિયાગો કારનો ચાલક જયદેવ આગળ નીકળી ગયો હતો. કટ ચૂકી જવાના કારણે ચાલકે એક્સપ્રેસ વે પર જ કાર પાછળ લેવાનું શરૂ કર્યું હતું. પ્રત્યક્ષદર્શીઓના જણાવ્યા અનુસાર કાર રિવર્સ લેતી વખતે ચાલકે ડિપર પણ ચાલુ રાખ્યું ન હતું. આ બેદરકારી વચ્ચે પાછળથી આવતી તેજ રફતાર સ્કોર્પિયો કારે ટિયાગોને જોરદાર ટક્કર મારી દીધી હતી.

Delhi Dehradun Expressway Accident: સીસીટીવીમાં કેદ થયો અકસ્માત

હાઈવે પર લાગેલા સીસીટીવી કેમેરામાં આ અકસ્માતની ભયાનકતા કેદ થઈ છે. સ્કોર્પિયોની ટક્કર એટલી જોરદાર હતી કે ટિયાગો કાર હાઈવે પર આશરે 300 મીટર સુધી ઘસડાઈ ગઈ હતી. બે વાર ડિવાઈડર સાથે અથડાયા બાદ કાર પલટી મારી ગઈ હતી. ટક્કર માર્યા બાદ સ્કોર્પિયો કાર પણ હાઈવે પર પલટી ગઈ હતી. બંને વાહનોનો કૂચડો બોલી ગયો હોવાથી સ્કોર્પિયોની સ્પીડ ખૂબ વધારે હોવાની આશંકા છે. આ અકસ્માતમાં પ્રવીણ, તેમની પત્ની પ્રીતિ, સુદેશ અને શિવાંશના મોત થયા છે. પોસ્ટમોર્ટમ રિપોર્ટ અનુસાર પાંસળીઓ તૂટી જવાથી શ્વાસ રૂંધાવાના કારણે ચારેય લોકોએ દમ તોડ્યો હતો.

કાર ચાલક હોસ્પિટલમાં દાખલ

મળતી માહિતી મુજબ, અકસ્માત સર્જનાર સ્કોર્પિયો કાર પ્રવીણ નામના વ્યક્તિની પત્ની નીલમના નામે રજીસ્ટર્ડ છે. અકસ્માત સમયે સ્કોર્પિયો ચલાવી રહેલો પ્રવીણ પોતે પણ ઈજાગ્રસ્ત થયો છે. હાલ તે એસબીડી જિલ્લા હોસ્પિટલમાં સારવાર હેઠળ છે. પોલીસની ટીમ હોસ્પિટલમાં તેના પર કડક નજર રાખી રહી છે. પોલીસ અધિકારીઓના જણાવ્યા અનુસાર આરોપી ચાલક અત્યારે બોલવાની સ્થિતિમાં નથી. અકસ્માત સમયે ચાલકે દારૂ પીધો હતો કે નહીં તેની પુષ્ટિ માટે મેડિકલ રિપોર્ટની રાહ જોવાઈ રહી છે.

Delhi-Dehradun Expressway 🚨⚠️

Tata Tiago missed exit, reversing on left lane…🤷‍♂️

ScorpioN on left lane, probably missed to notice Tiago reversing or could be distracted/drowsy…rearended…@DriveSmart_IN pic.twitter.com/QviuerliBJ

— Dave (Road Safety: City & Highways) (@motordave2) June 28, 2026

વહીવટી તંત્રે તપાસ માટે બનાવી ઉચ્ચ સ્તરીય સમિતિ

આ ગમખ્વાર અકસ્માત બાદ એક્સપ્રેસ વે પર વાહનોની લાંબી લાઈનો લાગી ગઈ હતી. ઘટનાની ગંભીરતાને જોતા જિલ્લા મેજિસ્ટ્રેટ અરવિંદ કુમાર ચૌહાણે તાત્કાલિક એક ઉચ્ચ સ્તરીય સમિતિની રચના કરી છે. આ સમિતિમાં વહીવટી તંત્ર અને પોલીસના વરિષ્ઠ અધિકારીઓ શામેલ છે. આ ટીમ અકસ્માતના ચોક્કસ કારણોની તપાસ કરશે. જે જગ્યાએ આ ઘટના બની છે તે બ્લેક સ્પોટ છે કે નહીં તેની પણ તપાસ થશે. ભવિષ્યમાં આવા અકસ્માતો રોકવા માટે હાઈવે પર સુરક્ષાની કડક વ્યવસ્થા કરવાની માગ ઉઠી છે.

આ પણ વાંચો--- Amravati Car Accident: અમરાવતી ભયાનક અકસ્માત, મુંબઈ જતી કારનો કચ્ચરઘાણ, એક જ પરિવારના 5 સભ્યોના મોત