Delhi-NCR Monsoon: વરસાદી આફત અને જનજીવન પર અસર
દિલ્હી અને એનસીઆરના વિસ્તારોમાં મોસમના પ્રથમ ભારે વરસાદે અનેક સમસ્યાઓ નોતરી છે. મંગળવારે તેજ ગતિના પવન સાથે વરસેલા વરસાદને લીધે ઠેર-ઠેર વૃક્ષો ધરાશાયી થયા છે. દિલ્હીના ઈસ્ટ ઓફ કૈલાશ, ગ્રીન પાર્ક અને ન્યૂ ફ્રેન્ડ્સ કોલોની જેવા વિસ્તારોમાં અનેક વૃક્ષો પડવાથી વાહનોને નુકસાન થયું છે. રસ્તાઓ પર ભરાયેલા પાણીના કારણે વાહનચાલકો કલાકો સુધી ટ્રાફિક જામમાં અટવાયા હતા.
Delhi-NCR Monsoon: ગુરુગ્રામમાં દયનીય સ્થિતિ અને રસ્તાઓનું ધોવાણ
મિલેનિયમ સિટી તરીકે ઓળખાતા ગુરુગ્રામની હાલત સૌથી વધુ કફોડી છે. શહેરના હીરો હોંડા ચોક, રાજીવ ચોક અને સોહના રોડ પર ઘૂંટણસમા પાણી ભરાઈ ગયા છે. દિલ્હી-જયપુર હાઈવે (NH-48) પર નરસિંહપુર પાસે મુખ્ય રસ્તો ધસી પડ્યો છે. આ દુર્ઘટનાને કારણે ખેડકી દૌલા ટોલ પ્લાઝા સુધી કિલોમીટરો લાંબો ટ્રાફિક જામ જોવા મળ્યો છે. કાદીપુરમાં 82 mm, ગુરુગ્રામ તહસીલમાં 76 mm અને માનેસરમાં 50 mm વરસાદ નોંધાયો છે. ડ્રેનેજ સિસ્ટમની નિષ્ફળતાને કારણે રહેણાંક સોસાયટીઓમાં પણ પાણી ઘૂસી ગયા છે.
વર્ક ફ્રોમ હોમનો નિર્ણય
ગુરુગ્રામમાં પ્રવર્તતી ગંભીર સ્થિતિને ધ્યાનમાં રાખીને ઘણી ખાનગી કંપનીઓએ કર્મચારીઓના હિતમાં ઘરેથી કામ કરવાની સૂચના આપી છે. સોશિયલ મીડિયા પર નાગરિકો વહીવટીતંત્રની નબળી ડ્રેનેજ વ્યવસ્થા સામે આક્રોશ ઠાલવી રહ્યા છે. દર વર્ષે ચોમાસામાં સર્જાતી આ સમસ્યા હવે કાયમી દુખાવો બની રહી છે.
હવામાનની આગાહી અને આગામી સ્થિતિ
સ્કાઈમેટ વેધરના નિષ્ણાત મહેશ પાલાવત જણાવે છે કે ઉત્તર પાકિસ્તાનમાં પશ્ચિમી વિક્ષેપ અને અરબી સમુદ્રમાંથી આવતા ભેજને કારણે આ વરસાદ થયો છે. ભારતીય હવામાન વિભાગ (IMD) એ હજુ પણ યલો એલર્ટ જારી રાખ્યું છે. બુધવારે પણ ગાજવીજ સાથે વરસાદ પડવાની શક્યતા છે, જેમાં ન્યૂનતમ તાપમાન 22 ડિગ્રી અને મહત્તમ તાપમાન 33 ડિગ્રી રહેશે. 12 જુલાઈ સુધીમાં વરસાદનું જોર ઘટવાની અપેક્ષા છે, ત્યારબાદ દિલ્હી, હરિયાણા અને રાજસ્થાનમાં ચોમાસું થોડું નરમ પડશે.
આ પણ વાંચો--- Mumbai Building Collapse : સામાન પેક જ રહ્યો અને આખો પરિવાર કાટમાળમાં દફન થઈ ગયો! મુંબઈ દુર્ઘટનાની સત્યતા
