NIA ની ચાર્જશીટ: 13 આતંકીઓ સામે કાનૂની સકંજો
દેશની રાજધાની દિલ્હીમાં લાલ કિલ્લા નજીક કાર બોમ્બ બ્લાસ્ટ કરી નિર્દોષ નાગરિકોને નિશાન બનાવવાની નાપાક સાઝિશમાં NIA એ ઊંડાણપૂર્વકની તપાસ બાદ નક્કર ચાર્જશીટ રજૂ કરી છે. તપાસ એજન્સીએ કુલ 13 કુખ્યાત આરોપીઓ સામે આતંકવાદી ગતિવિધિઓ અને દેશ વિરોધી કાવતરા અંતર્ગત ગુનો નોંધી સમગ્ર કેસનો ઘટનાક્રમ અદાલત સમક્ષ મૂક્યો છે.
આ આતંકવાદી નેટવર્કના તાર સીધા વૈશ્વિક આતંકી સંગઠનો અલ-કાયદા ઇન ધ ઇન્ડિયન સબકોન્ટિનેન્ટ (AQIS) અને કાશ્મીરમાં સક્રિય અંસાર ગઝવાત-ઉલ-હિન્દ (AGuH) સાથે જોડાયેલા હોવાનું ચાર્જશીટમાં સત્તાવાર રીતે સાબિત થયું છે.
ડૉક્ટર ઉમર પોતે સુસાઈડ બોમ્બર હોવાની ડીએનએ પુષ્ટિ
ચાર્જશીટમાં સૌથી ચોંકાવનારો ઘટસ્ફોટ એ થયો છે કે વિસ્ફોટનો મુખ્ય માસ્ટરમાઇન્ડ ડૉક્ટર ઉમર ઉન નબી પોતે આત્મઘાતી બોમ્બર (Suicide Bomber) બન્યો હતો. ઘટનાસ્થળેથી મળેલા માનવ અંગો અને નાકમાંથી લેવાયેલા સ્વેબના જૈવિક નમૂનાઓની જ્યારે ડીએનએ ફિંગરપ્રિન્ટિંગ કરવામાં આવી, ત્યારે તે ઉમર ઉન નબીના ડીએનએ પ્રોફાઇલ સાથે સો ટકા મેળ ખાતા હતા.
ફોરેન્સિક તપાસમાં મૃતકના શરીરના અવશેષોમાંથી ટ્રાઇ-એસિટોન ટ્રાઇ-પેરોક્સાઇડ (TATP) અને એમોનિયમ નાઇટ્રેટ જેવા ઘાતક કેમિકલના અંશો મળી આવ્યા છે. આ વૈજ્ઞાનિક પુરાવા સાબિત કરે છે કે વિસ્ફોટ સમયે ડૉ. ઉમર કારની અંદર જ બેઠો હતો.
હ્યુન્ડાઈ i20 કાર બની VBIED, TATP વિસ્ફોટક
હુમલા માટે આતંકીઓએ હ્યુન્ડાઈ i20 કારને વ્હીકલ-બોર્ન ઇમ્પ્રુવાઇઝ્ડ એક્સપ્લોઝિવ ડિવાઇસ (VBIED) એટલે કે ચાલતા-ફરતા કાર બોમ્બમાં ફેરવી નાખી હતી. કારના કાટમાળમાંથી લાલ રંગની પટ્ટી (Red Tape) ચોંટાડેલી એક ખાસ કમાન્ડ મિકેનિઝમ ડિવાઇસ રિકવર કરવામાં આવી છે.
ફોરેન્સિક લેબોરેટરીના પરિણામો:
કુલ જપ્ત નમૂના: તપાસ દરમિયાન ઘટનાસ્થળેથી કુલ 73 એક્ઝિબિટ્સ કબજે લેવાયા હતા.
લેબ પૃથક્કરણ: 64 નમૂનાઓની ચકાસણી CFSL ચંદીગઢ ખાતે અને બાકીના 9 નમૂના NFSU ગાંધીનગર ખાતે કરવામાં આવી હતી.
વિસ્ફોટકોની પુષ્ટિ: બંને પ્રયોગશાળાઓએ પુષ્ટિ કરી કે હુમલામાં સામાન્ય ઔદ્યોગિક નહીં, પરંતુ અત્યંત અસ્થિર એવા પેરોક્સાઇડ બેઝ્ડ TATP, એમોનિયમ નાઇટ્રેટ અને પોટેશિયમ નાઇટ્રેટનું ઘાતક મિશ્રણ વાપરવામાં આવ્યું હતું.
પેનડ્રાઈવમાંથી મળેલા 87 ફોટોગ્રાફ્સ
આ આતંકી નેટવર્કની તપાસ ફરીદાબાદ સ્થિત અલ-ફલાહ યુનિવર્સિટી બહારના એક ભાડાના મકાન સુધી પહોંચી હતી. ત્યાંથી આરોપી મુઝમ્મિલ ઉર્ફે A-4 પાસેથી કેમિકલ્સ, ટાઈમર અને લેબ સાધનો જપ્ત કરાયા હતા. આ સામગ્રી તપાસ માટે નૌગામ પોલીસ સ્ટેશન (કેસ નંબર 162/2025) લવાઈ ત્યારે 14 નવેમ્બર 2025 ના રોજ અચાનક મોટો વિસ્ફોટ થયો હતો, જેમાં 9 પોલીસકર્મીઓ શહીદ થયા હતા અને 29 લોકો ઈજાગ્રસ્ત થયા હતા.
અન્ય ટેકનિકલ ખુલાસા:
ઓનલાઇન રોકેટ તાલીમ: આરોપી જસીર બિલાલ વાનીએ YouTube અને ChatGPT ના માધ્યમથી રોકેટ બનાવવાની પદ્ધતિ શીખી રોકેટ તૈયાર કરી લીધું હતું, જેનું પરીક્ષણ પાછળથી મોકૂફ રખાયું હતું.
ડ્રોન ડિલિવરી: ઉમર ઉન નબીએ જસીરને હુમલા માટે 2 ડ્રોન આપ્યા હતા.
હથિયારોના ફોટોગ્રાફ્સ: આરોપી શાહીન સઈદની પેનડ્રાઈવમાંથી 87 વાંધાજનક તસવીરો મળી આવી છે, જેમાં ડૉ. મુઝમ્મિલ શકીલ અને શાહીન AK 47 રાઇફલ, પિસ્તોલ અને મેગેઝિન સાથે જોવા મળે છે.
આ પણ વાંચો : Delhi Blast : દિલ્હીના ઓખલા ફેઝ-1 માં સિલિન્ડર બ્લાસ્ટ, ઈજાગ્રસ્ત લોકોને સારવાર હેઠળ ખસેડાયા
