કેન્દ્રીય મંત્રી કિરિન રિજિજુ અને રાહુલ ગાંધી વચ્ચે ફોન પર મહત્વપૂર્ણ વાતચીત
સંસદની કાર્યવાહીમાં ચાલી રહેલા વિરોધ અને મધ્યસ્થીના ભાગરૂપે સંસદીય કાર્ય મંત્રી કિરિન રિજિજુ અને કોંગ્રેસ સાંસદ રાહુલ ગાંધી વચ્ચે વાતચીત થઈ હતી. ચાલુ ચોમાસુ સત્ર દરમિયાન બંને નેતાઓ વચ્ચે વાતચીત અને મુલાકાતનો આ ત્રીજો પ્રસંગ હતો.
સૂત્રોના જણાવ્યા અનુસાર, સરકાર ઈચ્છે છે કે સંસદમાં મહત્વપૂર્ણ કાયદાકીય કામગીરી સુચારૂ રીતે પૂર્ણ થાય. આ માટે સરકાર મુખ્ય વિપક્ષી પક્ષ કોંગ્રેસને સાથે રાખીને આગળ વધવા માગે છે.
પરિસીમન અને મહિલા અનામત બિલનું રાજકીય ગણિત
વાતચીત દરમિયાન કિરિન રિજિજુએ રાહુલ ગાંધીને જણાવ્યું હતું કે પરિસીમન બિલ પર વિપક્ષનું સમર્થન મળવાથી મહિલા અનામત વિધેયકને અમલમાં મૂકવાનો રસ્તો સરળ બની જશે. જો મહિલા અનામત સમયસર લાગુ નહીં થાય, તો મહિલા સમાજમાં નારાજગી વધી શકે છે.
વિશ્લેષણ મુજબ, બિલ પસાર કરાવવા માટે સરકાર પાસે પૂરતી સંખ્યા હોવા છતાં, લોકશાહીની પરંપરા મુજબ મુખ્ય વિપક્ષી દળ કોંગ્રેસને સાથે રાખવાનો પ્રયાસ કરવામાં આવી રહ્યો છે.
રાહુલ ગાંધીનો જવાબ અને સર્વદલીય બેઠક પર સરકારનું વલણ
રિજિજુના પ્રસ્તાવ પર રાહુલ ગાંધીએ જણાવ્યું હતું કે તેઓ આ સંવેદનશીલ મુદ્દા પર પહેલા પોતાની પાર્ટી કોંગ્રેસ અને 'ઇન્ડિયા' (INDIA) ગઠબંધનના સહયોગી પક્ષો સાથે ચર્ચા કરશે. આ ઉપરાંત સર્વદલીય બેઠક (All-Party Meeting) માં પણ આ અંગે વિગતવાર વાતચીત થવી જોઈએ.
બીજી તરફ, સરકાર તરત જ સર્વદલીય બેઠક બોલાવવાના પક્ષમાં નથી. સરકારનું કહેવું છે કે જો રાહુલ ગાંધી અને વિપક્ષ તમામ પક્ષો સમક્ષ સકારાત્મક વલણ અપનાવવાની ખાતરી આપે, તો જ બેઠક યોજવાનો અર્થ સરે છે, કારણ કે સરકાર અગાઉ તમામ પક્ષો સાથે વાત કરી ચૂકી છે.
"રાહુલ ગાંધી સાથે સારો સંવાદ થયો. દેશહિતમાં અમે સાથે મળીને કામ કરવા માંગીએ છીએ. અમે એકબીજાના રાજકીય વિરોધી છીએ, દુશ્મન નથી." - કિરિન રિજિજુ, કેન્દ્રીય સંસદીય કાર્ય મંત્રી
'સંસદ ચાલવા દો, વિરોધી છીએ દુશ્મન નથી': કિરિન રિજિજુનો વિપક્ષ પર પ્રહાર
સંસદ પરિસરમાં મીડિયા સાથે વાત કરતા કિરિન રિજિજુએ સ્પષ્ટ કર્યું કે સરકાર કોંગ્રેસ અને અન્ય વિપક્ષી પક્ષો સાથે સતત સંવાદ જાળવી રાખવા ઈચ્છે છે.
તેમણે ઉમેર્યું કે જો બહાર એવું ચિત્ર ઊભું કરવામાં આવે કે સંસદ ચાલવા દેવામાં આવશે નહીં, તો તેનાથી અંતે દેશ અને જનતાનું જ નુકસાન થાય છે.
આ પણ વાંચો : PM Modi Foreign Visit Expense : PM મોદીના વિદેશ પ્રવાસો પર કેટલા કરોડનો ખર્ચ થયો? સંસદમાં રજૂ થયો હિસાબ
