તાજેતરમાં વડાપ્રધાન નરેન્દ્ર મોદીએ વિવિધ મંત્રાલયોના કેન્દ્રીય સચિવો સાથે બેઠક યોજી હતી. આ બેઠકને સામાન્ય વહીવટી સમીક્ષા કરતાં વધુ મહત્વપૂર્ણ માનવામાં આવી રહી છે. માનવામાં આવે છે કે સરકાર દરેક મંત્રાલયની કામગીરીનું મૂલ્યાંકન કરી રહી છે જેથી આગામી સમયમાં નવી જવાબદારીઓ અને નવા મંત્રીઓ માટે સ્પષ્ટ રોડમેપ તૈયાર થઈ શકે.
શા માટે ચર્ચામાં છે કેબિનેટ વિસ્તરણ?
મોદી સરકારના વર્તમાન મંત્રીમંડળમાં હજુ પણ ઘણા મંત્રીપદો ખાલી છે. બંધારણીય જોગવાઈ મુજબ કેન્દ્ર સરકારમાં લોકસભાના કુલ સભ્યોના 15 ટકા સુધી મંત્રીઓ રાખી શકાય છે. હાલમાં સરકારમાં કુલ 72 મંત્રીઓ છે, જ્યારે મહત્તમ સંખ્યા 81 સુધી જઈ શકે છે. એટલે કે હજુ ઓછામાં ઓછા 9 મંત્રીપદો ખાલી છે. આ ઉપરાંત કેટલીક અન્ય પરિસ્થિતિઓ પણ કેબિનેટ ફેરબદલની શક્યતાઓને મજબૂત બનાવે છે. કેટલાક મંત્રીઓ હવે સંગઠનમાં નવી જવાબદારીઓ સંભાળી રહ્યા છે, જ્યારે કેટલાકના રાજ્યસત્રાના કાર્યકાળ પૂર્ણ થવાના છે. આવી સ્થિતિમાં નવા ચહેરાઓને તક મળવાની સંભાવના વધી રહી છે.
સચિવો સાથેની બેઠકનું શું છે મહત્વ?
વડાપ્રધાન દ્વારા વિવિધ મંત્રાલયોના સચિવો સાથે કરવામાં આવેલી બેઠકને સરકારના આગામી આયોજન સાથે જોડીને જોવામાં આવી રહી છે. સામાન્ય રીતે આવા સમીક્ષા સત્રોમાં દરેક વિભાગના કામકાજ, યોજનાઓની પ્રગતિ અને ભવિષ્યની કામગીરી અંગે વિગતવાર ચર્ચા કરવામાં આવે છે. જો કેબિનેટમાં ફેરફાર થવાનો હોય તો નવા મંત્રીઓને સોંપાનાર વિભાગો માટે વહીવટી તૈયારી પણ જરૂરી બને છે. તેથી આ બેઠકને સંભવિત કેબિનેટ વિસ્તરણની પૂર્વ તૈયારીઓ તરીકે જોવામાં આવી રહી છે.
ક્યારે થઈ શકે છે કેબિનેટ વિસ્તરણ?
રાજકીય ચર્ચાઓ અનુસાર સંસદના ચોમાસુ સત્ર પહેલાં અથવા વડાપ્રધાનની વિદેશ યાત્રા પૂર્ણ થયા બાદ કોઈપણ સમયે કેબિનેટ વિસ્તરણ થઈ શકે છે. જોકે સરકાર તરફથી હજુ સુધી કોઈ સત્તાવાર જાહેરાત કરવામાં આવી નથી. સરકાર સામાન્ય રીતે મહત્વપૂર્ણ રાજકીય નિર્ણયો યોગ્ય સમય અને રાજકીય પરિસ્થિતિને ધ્યાનમાં રાખીને લેતી હોય છે. તેથી વિસ્તરણની તારીખ અંગે અંતિમ નિર્ણય વડાપ્રધાન અને ભાજપના ટોચના નેતૃત્વ દ્વારા લેવામાં આવશે.
કામગીરીના આધારે થશે નિર્ણય?
મોદી સરકારમાં કામગીરીને ખૂબ મહત્વ આપવામાં આવે છે. છેલ્લા લગભગ 2 વર્ષ દરમિયાન દરેક મંત્રાલયે કેટલું કાર્ય કર્યું, કઈ યોજનાઓ સફળ રહી અને ક્યાં સુધારાની જરૂર છે તેનું મૂલ્યાંકન થઈ રહ્યું હોવાનું માનવામાં આવે છે. જે મંત્રીઓએ સારો દેખાવ કર્યો હશે તેમને વધુ મહત્વના વિભાગો મળી શકે છે અથવા તેમની જવાબદારીઓ વધી શકે છે. બીજી તરફ અપેક્ષા મુજબ કામગીરી ન કરનારા કેટલાક મંત્રીઓને બદલવામાં પણ આવી શકે છે. આ પ્રકારનું મૂલ્યાંકન સરકારમાં જવાબદારી અને પરિણામ આધારિત કાર્યસંસ્કૃતિને મજબૂત બનાવે છે.
સહયોગી પક્ષોને મળશે વધુ મહત્વ?
એનડીએ સરકારમાં ભાજપ ઉપરાંત અનેક પ્રાદેશિક પક્ષો પણ સામેલ છે. છેલ્લા કેટલાક સમય દરમિયાન વિવિધ રાજકીય પક્ષોના કેટલાક સાંસદોએ સત્તારૂઢ ગઠબંધનને સમર્થન આપ્યું છે. જો સરકાર કેબિનેટનું વિસ્તરણ કરે તો આવા સહયોગી પક્ષોને વધુ પ્રતિનિધિત્વ આપવાની શક્યતા પણ ચર્ચામાં છે. ખાસ કરીને મહારાષ્ટ્ર, આંધ્ર પ્રદેશ અને બિહાર જેવા રાજ્યોમાં ગઠબંધનના ભાગીદાર પક્ષોની રાજકીય શક્તિમાં થયેલા ફેરફારોને ધ્યાનમાં રાખીને તેમના મંત્રીપદના કોટામાં વધારો થાય તેવી અટકળો વ્યક્ત થઈ રહી છે. જોકે અંતિમ નિર્ણય સંપૂર્ણપણે વડાપ્રધાન અને ભાજપના કેન્દ્રીય નેતૃત્વના રાજકીય મૂલ્યાંકન પર આધારિત રહેશે.
બાગી સાંસદોનું શું રહેશે સ્થાન?
તાજેતરના સમયમાં કેટલાક રાજકીય પક્ષોમાં આંતરિક વિખવાદ બાદ કેટલાક સાંસદોએ એનડીએને સમર્થન આપ્યું હોવાનું રાજકીય વર્તુળોમાં ચર્ચાઈ રહ્યું છે. જો આવા નેતાઓ લાંબા ગાળે સરકાર સાથે રહે અને તેમની રાજકીય ઉપયોગિતા મહત્વપૂર્ણ માનવામાં આવે તો ભવિષ્યમાં તેમને સરકારમાં સ્થાન આપવાની સંભાવના અંગે ચર્ચાઓ થઈ રહી છે. તેમ છતાં આ મુદ્દે સરકાર તરફથી કોઈ સત્તાવાર માહિતી આપવામાં આવી નથી અને તમામ ચર્ચાઓ હાલમાં રાજકીય અટકળોના આધારે ચાલી રહી છે.
ચૂંટણીવાળા રાજ્યોને મળશે પ્રાથમિકતા?
આગામી વર્ષે ઉત્તર પ્રદેશ, ગુજરાત, ઉત્તરાખંડ, ગોવા, પંજાબ, હિમાચલ પ્રદેશ અને મણિપુર સહિતના રાજ્યોમાં વિધાનસભાની ચૂંટણી યોજાવાની છે. આવા સમયે કેન્દ્ર સરકાર માટે ચૂંટણીવાળા રાજ્યોને રાજકીય રીતે વધુ મહત્વ આપવું સ્વાભાવિક માનવામાં આવે છે. જો કેબિનેટમાં વિસ્તરણ થશે તો આ રાજ્યોમાંથી નવા ચહેરાઓને સ્થાન આપીને સ્થાનિક નેતૃત્વને મજબૂત કરવાનો પ્રયાસ થઇ શકે છે. આ પગલું ચૂંટમી પહેલા રાજકીય સંદેશ આપવા માટે પણ મહત્વપૂર્ણ બની શકે છે.
સામાજિક સમીકરણો પણ રહેશે મહત્વપૂર્ણ
ભારતીય રાજકારણમાં માત્ર પ્રાદેશિક નહીં પરંતુ સામાજિક સંતુલન પણ અત્યંત મહત્વનું માનવામાં આવે છે. વિવિધ જાતિ, વર્ગ, સમુદાય અને પ્રદેશોને યોગ્ય પ્રતિનિધિત્વ આપવાનો પ્રયાસ દરેક સરકાર કરતી હોય છે. રાજકીય વિશ્લેષકોનું માનવું છે કે સંભવિત કેબિનેટ વિસ્તરણ દરમિયાન અનુસૂચિત જાતિ, અનુસૂચિત જનજાતિ, અન્ય પછાત વર્ગો, મહિલાઓ અને વિવિધ પ્રદેશોના પ્રતિનિધિઓને ધ્યાનમાં રાખીને નવા મંત્રીઓની પસંદગી થઈ શકે છે. સાથે જ સરકાર માટે કાર્યક્ષમતા અને અનુભવ પણ મહત્વના માપદંડ રહેશે.
મોદી સરકાર માટે આ વિસ્તરણ કેમ મહત્વનું?
કેબિનેટ વિસ્તરણ માત્ર નવા મંત્રીઓને શપથ અપાવવાનો કાર્યક્રમ નથી. તે સરકારની આગામી રાજકીય દિશા, ચૂંટણીની તૈયારી અને વિકાસના એજન્ડાને આગળ વધારવાનો મહત્વપૂર્ણ ભાગ હોય છે. જો સરકાર નવા ચહેરાઓને તક આપે છે તો તેનાથી નવા વિચારો અને નવી ઉર્જા સાથે કામ કરવાની તક મળે છે. બીજી તરફ સારું પ્રદર્શન કરનારા મંત્રીઓને વધુ જવાબદારી આપવાથી સમગ્ર સરકારની કાર્યક્ષમતા વધારવાનો પ્રયાસ થાય છે.
આ પણ વાંચો : PM Modi એ ઈરાનના રાષ્ટ્રપતિ પેઝેશ્કિયાને સાથે કરી વાત, પશ્વિમ એશિયાની તાજેતરની ઘટનાઓ વિશે કરી ચર્ચા
