PM Modi Foreign Visit Expense : વડાપ્રધાન નરેન્દ્ર મોદીની વિદેશ યાત્રાઓ પર થયેલા ખર્ચ અંગે કેન્દ્ર સરકારે ગુરુવારે રાજ્યસભામાં મહત્વપૂર્ણ વિગતો રજૂ કરી છે. તાજેતરના સરકારી અહેવાલો મુજબ, વિદેશ રાજ્ય મંત્રી પવિત્ર માર્ગેરિટાએ સંસદમાં જણાવ્યું કે 2021 થી અત્યાર સુધી વડાપ્રધાનના વિદેશ પ્રવાસો પર આશરે રૂ. 74.5 કરોડનો ખર્ચ થયો છે.
સંસદમાં પીએમ મોદીની વિદેશ યાત્રાઓના ખર્ચ અંગે વિદેશ મંત્રાલયનો મોટો ખુલાસો
રાજ્યસભામાં આમ આદમી પાર્ટીના સાંસદ સંજય સિંહ અને સીપીઆઈ (એમ) ના સાંસદ ડૉ. વી. શિવદાસન દ્વારા પૂછાયેલા અણતારાંકિત પ્રશ્ન (ક્રમાંક 2172) ના જવાબમાં કેન્દ્ર સરકારે આ માહિતી આપી હતી.
સાંસદોએ 2021 થી અત્યાર સુધી વડાપ્રધાનના વર્ષવાર વિદેશ પ્રવાસ ખર્ચ, હસ્તાક્ષર કરાયેલા સમજૂતી કરારો (MoUs) અને દેશમાં આવેલા પ્રત્યક્ષ વિદેશી રોકાણ (FDI) નો સંપૂર્ણ હિસાબ માગ્યો હતો.
2021 થી અત્યાર સુધીનો હિસાબ અને ભૂતકાળના આંકડા
વિદેશ મંત્રાલયે રાજ્યસભામાં આપેલા લેખિત જવાબમાં 2021 થી હાથ ધરાયેલી તમામ વિદેશ યાત્રાઓનો વિગતવાર ખર્ચ રજૂ કર્યો હતો. જાહેર વિગતો અનુસાર, સરકારે અગાઉની વડાપ્રધાન કક્ષાની વિદેશ યાત્રાઓના પણ સરખામણી માટેના આંકડા સંસદ સમક્ષ મૂક્યા હતા.
સરકારી આંકડા મુજબ, 2011 માં અમેરિકા યાત્રા પર રૂ. 10.74 કરોડ, 2013 માં રશિયા યાત્રા પર રૂ. 9.95કરોડ, 2011 માં ફ્રાન્સ યાત્રા પર રૂ. 8.33 કરોડ અને 2013 માં જર્મની યાત્રા પર રૂ. 6.02કરોડનો વાસ્તવિક ખર્ચ થયો હતો.
દેશમાં આવ્યું ૩૮૧.૮ અબજ ડોલરનું રેકોર્ડ FDI
વિદેશ મંત્રાલયે સ્પષ્ટ કર્યું હતું કે વડાપ્રધાનના આ પ્રવાસો માત્ર ઔપચારિક મુલાકાતો નથી, પરંતુ અન્ય દેશો સાથેના દ્વિપક્ષીય, ક્ષેત્રીય અને વૈશ્વિક સંબંધોને મજબૂત કરવાનું એક અત્યંત અસરકારક માધ્યમ છે.
આ યાત્રાઓ દરમિયાન થયેલા કરારોને કારણે ટેકનોલોજી, ઇનોવેશન, વેપાર, રોકાણ, સંરક્ષણ અને ઉર્જા જેવા વ્યૂહાત્મક ક્ષેત્રોમાં ભારતની ભાગીદારી મજબૂત થઈ છે. સરકારી ડેટા અનુસાર, એપ્રિલ 2021 થી ડિસેમ્બર 2025 વચ્ચે ભારતમાં કુલ 381.8 અબજ ડોલરનું એફડીઆઈ (FDI) આવ્યું છે.
રાજ્યસભામાં સાંસદોના પ્રશ્નો અને મુત્સદ્દીગીરીના કારણે વૈશ્વિક ભાગીદારી મજબૂત
વડાપ્રધાનના પ્રવાસોથી વૈશ્વિક સ્તરે ભારતનો પ્રભાવ વધ્યો છે અને વિશ્વના અગ્રણી દેશો સાથેના વ્યૂહાત્મક સંબંધો નવી ઊંચાઈએ પહોંચ્યા છે. આ પ્રવાસોના પરિણામે ભારતીય ઉદ્યોગોને નવો વેગ મળ્યો છે અને દેશમાં નવી ટેકનોલોજી તેમજ રોજગારીની તકો ઉભી થઈ રહી છે.'
આ પણ વાંચો : Meta Apologizes PM Modi Video : સંસદીય સમિતિના 48 કલાકના અલ્ટિમેટમ સામે મેટા ઝૂક્યું, 24 કલાકમાં જ IT મંત્રી પાસે માંગી માફી
