Dwarka Temple Security: જગતમંદિર દ્વારકાની સુરક્ષા વ્યવસ્થા સામે ફરી એકવાર ગંભીર સવાલો ઊભા થયા છે. દ્વારકાધીશના મંદિરમાં સુરક્ષાના કડક નિયમો અને મોબાઈલ ફોન લઈ જવા પર સ્પષ્ટ પ્રતિબંધ હોવા છતાં, એક યુવક બેરોકટોક મોબાઈલ ફોન સાથે મંદિરની અંદર પ્રવેશ કરવામાં સફળ રહ્યો હતો. માત્ર એટલું જ નહીં, આ યુવકે મંદિરના ગર્ભગૃહ અને આંતરિક પરિસરમાંથી દર્શન કરતા જતી વખતનો વિડીયો પોતાના કેમેરામાં રેકોર્ડ કરી લીધો હતો અને સોશિયલ મીડિયા પર વાયરલ પણ કર્યો હતો.
Dwarka Temple માં મોબાઇલ પ્રતિબંધનો ભંગ
અતિ સંવેદનશીલ અને સુરક્ષાના કવચ હેઠળ રહેતા આ પવિત્ર ધામમાં કોઈપણ રોકટોક વગર મોબાઈલ અંદર પહોંચી જવાની આ ઘટનાએ તંત્રની કામગીરી સામે મોટા પ્રશ્નાર્થ ચિન્હો મૂકી દીધા છે.મંદિર સંકુલ અને પ્રવેશદ્વાર પર પોલીસ તથા સુરક્ષા કર્મીઓનો ચૂસ્ત બંદબોસ્ત હોવા છતાં આ સુરક્ષા કવચને ભેદીને યુવક અંદર કેવી રીતે પહોંચ્યો તે સૌથી મોટો વિષય બન્યો છે.
વીડિયો વાયરલ થતા તંત્ર સામે ઉઠ્યા સવાલો
સોશિયલ મીડિયા પર વાયરલ થઈ રહેલા આ વીડિયોમાં સ્પષ્ટ જોઈ શકાય છે કે પોલીસ જવાનોની હાજરી હોવા છતાં આ પ્રકારની બેદરકારી સામે આવી છે. જગતમંદિરની સુરક્ષામાં કોઈ ચૂક ન થાય તે માટે અગાઉ અનેક કડક આદેશો આપવામાં આવ્યા છે, છતાં સુરક્ષા કર્મચારીઓની નજર ચૂકવીને કે તેમની મિલીભગતથી મોબાઈલ અંદર લઈ જવાની ઘટનાઓ અટકવાનું નામ નથી લઈ રહી. સામાન્ય ભક્તો માટે કડક ચેકિંગ કરવામાં આવતું હોવાનો દાવો કરતું તંત્ર આ યુવકના કિસ્સામાં કેમ નિષ્ફળ ગયું તેવા સવાલો પણ શ્રદ્ધાળુઓ દ્વારા પૂછવામાં આવી રહ્યા છે.
કડક સુરક્ષાના દાવાઓ પોકળ સાબિત થયા
આ ગંભીર મામલે વીડિયો વાયરલ થયા બાદ દેવભૂમિ દ્વારકા જિલ્લાના પોલીસ તંત્ર અને મંદિર પ્રશાસનમાં દોડધામ મચી ગઈ છે. સુરક્ષા એજન્સીઓ હવે એ તપાસ કરી રહી છે કે આ યુવકે કયા પોઈન્ટથી અને કેવી રીતે સુરક્ષા તપાસને ટાળીને મોબાઈલ મંદિરની અંદર પહોંચાડ્યો હતો. અગાઉ પણ જગતમંદિરમાંથી વીડિયો વાયરલ થવાની ઘટનાઓ સામે આવી ચૂકી છે, છતાં સુરક્ષા વ્યવસ્થા વધુ સઘન બનાવવામાં તંત્ર નિષ્ફળ રહ્યું હોવાનો રોષ ભક્તોમાં જોવા મળી રહ્યો છે. આ ઘટના બાદ મંદિરની સુરક્ષા વ્યવસ્થામાં વધુ કડકાઈ લાવવામાં આવે અને નિયમોનું ઉલ્લંઘન કરનારાઓ સામે કાયદાકીય કડક પગલાં લેવામાં આવે તેવી પ્રબળ માંગ ઉઠી છે.
આ પણ વાંચો: Kutch camel deaths: માંડવીમાં એકસાથે 18 ઊંટનાં મોત, PM રિપોર્ટમાં સામે આવ્યું ચોંકાવનારું કારણ!
