Devbhoomi Dwarka: RTO નો સપાટો, 14 ખાનગી ટ્રાવેલ્સ બસો ડિટેઈન કરી 15 લાખનો દંડ ફટકાર્યો

પરમિટ અને ટેક્સના નિયમોનું ઉલ્લંઘન

ટોલ નાકા નજીક આયોજિત આ તપાસ અભિયાનમાં મુખ્યત્વે પરમિટ ભંગ (Permit Violation) અને ટેક્સ ચોરી (Tax Evasion) ના કિસ્સાઓ સામે આવ્યા હતા. પ્રાથમિક તપાસમાં ચોંકાવનારી વિગતો બહાર આવી છે કે, આ પૈકી ૮ જેટલી બસો એવી હતી જે ગુજરાત સરકારને ચૂકવવાનો થતો ટેક્સ ભર્યા વગર જ રાજ્યના માર્ગો પર બેરોકટોક દોડી રહી હતી. વિભાગ દ્વારા આ તમામ બસોને તાત્કાલિક ધોરણે ડિટેઇન (Detain) કરવામાં આવી છે.

અન્ય રાજ્યોની બસો પર પણ કડક કાર્યવાહી

આ કાર્યવાહીમાં માત્ર ગુજરાતની જ નહીં, પરંતુ અન્ય રાજ્યમાંથી આવતી બસોનો પણ સમાવેશ થાય છે. જે બસો નિયમોનું ઉલ્લંઘન કરતી પકડાઈ છે, તેમાં દસ્તાવેજોની ક્ષતિઓ અને ટેક્સની અચોક્કસતા મુખ્ય કારણો જણાયા છે. RTOની ટીમે કડક વલણ અપનાવીને 14 બસ સંચાલકોને કુલ 15 લાખ રૂપિયાનો તોતિંગ દંડ ફટકાર્યો છે.

ભવિષ્ય માટે કડક ચેતવણી

સ્થાનિક તંત્રના જણાવ્યા અનુસાર, પ્રવાસીઓની સુરક્ષા અને સરકારની તિજોરીને નુકસાન પહોંચાડતા તત્વો સામે આ ઝુંબેશ સતત ચાલુ રહેશે. આગામી દિવસોમાં રાજ્યભરમાં ગેરકાયદેસર રીતે દોડતી ખાનગી બસો અને અનિયમિતતા આચરતા ટ્રાવેલ્સ ઓપરેટરો સામે તપાસનું વ્યાપ વધારવામાં આવશે. આ મેગા ડ્રાઈવના કારણે નિયમોનું ઉલ્લંઘન કરનારા ટ્રાવેલ્સ માફિયાઓમાં ફફડાટ જોવા મળી રહ્યો છે.

આ પણ વાંચોઃ Jamnagar: 42 ડિગ્રી ગરમીમાં 76 વર્ષના Sakaram Bapa ની અનોખી દંડવત દ્વારકા યાત્રા