Bhagavad Gita lifestyle : આજના આધુનિક ઘોંઘાટ અને દોડધામ વચ્ચે તમારું 'આંતરિક વૃંદાવન' ક્યાં છુપાયેલું છે તે શોધો. દૈનિક જીવનમાં ચિરંતન શાંતિ પામવા માટે વર્તમાનમાં જીવવાની કળા, શરતો વગરનો પ્રેમ અને ભીતરના આનંદને એકરૂપ કરતા શીખો.

આજના ડિજિટલ યુગમાં, જ્યાં માણસનું મન 24/7 નોટિફિકેશન્સ, સ્ટ્રેસ અને અહંકારના ટ્રાફિકમાં ફસાયેલું રહે છે, ત્યાં 'સાચી શાંતિ' ક્યાં છે?' તે એક મિલિયન ડોલરનો પ્રશ્ન છે. આપણે શાંતિ શોધવા માટે હિલ-સ્ટેશનો કે મોંઘા રિસોર્ટના નકશા ફેંદીએ છીએ, પરંતુ હકીકતમાં શાંતિનું સરનામું કોઈ ગૂગલ મેપ (Google Map) પર નહીં, પરંતુ આપણી અંદર જ છુપાયેલું છે.

આ આંતરિક યાત્રાની શરૂઆત થાય છે એક નાનકડા પણ મક્કમ નિર્ણયથી: મનને 'તુલસીનો દાસ' બનાવવો.

Bhagavad Gita lifestyle : 'તુલસીનો દાસ': અહંકારથી સમર્પણ તરફની યાત્રા

તુલસીનો દાસ બનવું એટલે કોઈ ગુલામી નથી, પરંતુ તે અહંકાર અને ગર્વનો સંપૂર્ણ ત્યાગ છે. અહીં 'તુલસી' માત્ર આંગણામાં પવિત્રતા વિખેરતો છોડ નથી, કે માત્ર ભક્તિમાર્ગ ચિંધનાર મહાન સંત કવિ તુલસીદાસ નથી; તે એક પ્રતીક છે શુદ્ધતા અને નમ્રતાનું.

• જ્યારે મન નમ્ર બને છે, ત્યારે તે સ્વીકારતા શીખે છે.

• સમર્પણ ભાવથી આવેલી નમ્રતા જ માણસને સાચી માનસિક શાંતિ આપે છે.જેમ સંત કબીરે કહ્યું છે, 

"जब मैं था तब हरि नहीं, अब हरि है मैं नाहि।"" (જ્યારે અહંકાર હતો ત્યારે ઈશ્વર નહોતા, હવે ઈશ્વર છે તો અહંકાર નથી.) આ જ અવસ્થા એટલે મનનું તુલસીદાસ બનવું.

Bhagavad Gita lifestyle : 'વૃંદાવન' કોઈ પિનકોડ નથી, એક 'સ્ટેટ ઓફ માઇન્ડ' છે

સામાન્ય રીતે આપણે વૃંદાવનને ઉત્તર પ્રદેશના એક ભૌગોલિક સ્થળ તરીકે ઓળખીએ છીએ. પરંતુ જ્યારે મન ભક્તિમાં લીન થાય છે,પ્રભુ સાથે ભાવવિશ્વમાં એકાકાર થાય છે ત્યારે વૃંદાવન એક 'સ્ટેટ ઓફ માઇન્ડ' (State of Mind-હૃદયની અવસ્થા) બની જાય છે.

• આ એવું આંતરિક વિશ્વ છે જ્યાં નફરત, ઈર્ષ્યા કે સ્પર્ધા માટે કોઈ 'એન્ટ્રી પાસ' નથી.

• અહીં માત્ર પ્રેમનો મુક્ત પ્રવાહ છે.

• આ અવસ્થામાં પહોંચેલો માણસ ભીડભાડ વાળા શહેરમાં હોય કે ટ્રાફિક જામમાં ફસાયો હોય, તો પણ તે અંદરથી તો વૃંદાવનની શાંતિ જ અનુભવે છે.

શ્વાસનું નવું વિજ્ઞાન: ઓક્સિજનની સાથે 'રાધા'નો પ્રવાહ

જીવવા માટે માત્ર ઓક્સિજન પૂરતો નથી, આત્માને જીવંત રાખવા પ્રેમની જરૂર પડે છે. અહીં રાધા એ કોઈ પ્રાચીન કથાનું ઐતિહાસિક પાત્ર માત્ર નથી.

• રાધા એટલે શુદ્ધ, નિઃસ્વાર્થ પ્રેમ: એવો પ્રેમ જે વળતરમાં કશું માંગતો નથી, માત્ર આપવા પર વિશ્વાસ રાખે છે.

• જ્યારે આપણે કહીએ છીએ કે "દરેક શ્વાસમાં રાધાનો વાસ છે", તેનો અર્થ એ છે કે આપણો દરેક શ્વાસ નિઃસ્વાર્થ પ્રેમથી ભરેલો છે. આપણે માત્ર ટકી રહેવા માટે શ્વાસ નથી લેતા, પણ જગતને પ્રેમ અર્પણ કરવા માટે શ્વાસ લઈએ છીએ.

રોમ-રોમમાં શ્યામ: સકારાત્મકતાનો અખૂટ સ્ત્રોત

શ્યામ (કૃષ્ણ) એ ઉત્સવ, સંગીત, રમત અને મુશ્કેલીમાં પણ હસતા રહેવાનું જીવંત પ્રતીક છે. જો શ્વાસમાં રાધા (પ્રેમ) હોય, તો શરીરના દરેક કોષ (Cell) અને રોમ-રોમમાં શ્યામ (આનંદ) વસેલો છે. કૃષ્ણ વાંસળીના સૂર સમાન છે, જે જીવનની કોઈ પણ પરિસ્થિતિમાં – પછી તે કુરુક્ષેત્ર જેવું યુદ્ધ હોય કે ગોકુલ જેવો ઉત્સવ – મનને આનંદિત અને ઊર્જાવાન રાખે છે.

કાદવમાં ખીલતું કમળ: આધુનિક જીવનનો 'મેનેજમેન્ટ ફંડા'

આ ભક્તિ અને પ્રેમ કોઈ કાવ્યાત્મક કલ્પના નથી, પણ એક અત્યંત પ્રેક્ટિકલ લાઈફસ્ટાઈલ-Practical Lifestyle છે. આ જીવનશૈલી અપનાવવા તમારે ઘર છોડીને હિમાલયમાં સાધુ બનવા જવાની જરૂર નથી. તમે તમારી ઓફિસમાં કામ કરતાં, ટ્રેનમાં મુસાફરી કરતાં કે પરિવાર સાથે સમય વિતાવતાં પણ આ આંતરિક વૃંદાવનમાં રહી શકો છો.

ब्रह्मण्याधाय कर्माणि सङ्गं त्यक्त्वा करोति यः ।

लिप्यते न स पापेन पद्मपत्रमिवाम्भसा ॥ગીતા(અધ્યાય ૫, શ્લોક ૧૦) 

જે વ્યક્તિ આસક્તિ છોડીને પોતાનાં તમામ કર્મો પરમાત્માને અર્પણ કરીને કરે છે, તે પાપથી કે દુન્યવી મોહથી એવી રીતે અલિપ્ત રહે છે, જેમ કમળનું પાંદડું પાણીમાં રહેવા છતાં ભીંજાતું નથી.

આપણું  શરીર એક મંદિર છે અને દરેક શ્વાસ એક અમૂલ્ય ઉપહાર. પ્રેમને બહાર ક્યાંય શોધવાની જરૂર નથી; તમારે જાતે જ પ્રેમ બની જવાનું છે. એકવાર તમે આ રીતે જીવવાનું શરૂ કરશો, પછી દુનિયાની કોઈ પણ નેગેટિવિટી કે મુશ્કેલી તમારી આંતરિક શાંતિને ખલેલ નહીં પહોંચાડી શકે. તમે પણ પેલા કમળની જેમ જ, દુનિયાના કાદવ વચ્ચે પણ સંપૂર્ણ અલિપ્ત, સુંદર અને જીવંત બનીને ખીલી ઊઠશો.

આ પણ વાંચો : Paranormal Activity : રાત્રે 3 વાગ્યે અચાનક આંખ ખુલી જાય તો ચેતી જજો !