કોઈ પ્રમોશન વગર રિલીઝ થયેલી ફિલ્મનું બોક્સ ઓફિસ પર અકલ્પનીય કમબેક
સિનેમા જગતમાં ઘણીવાર એવું બને છે કે જે ફિલ્મ પાસેથી કોઈ અપેક્ષા ન હોય તે ઇતિહાસ રચી દે છે. 'હનુમાન અંશ' જ્યારે સિનેમાઘરોમાં લાગી ત્યારે પહેલા દિવસે માત્ર 10 લાખ રૂપિયાનું કલેક્શન થયું હતું. પ્રથમ બે અઠવાડિયા સુધી થિયેટરો ખાલી રહેતા ફિલ્મે માત્ર 1.48 કરોડ રૂપિયાનો વકરો કર્યો હતો. મોટાભાગના થિયેટર માલિકો તેને ફ્લોપ માનીને શો ઘટાડી રહ્યા હતા, પરંતુ ત્રીજા અઠવાડિયે અચાનક માઉથ પબ્લિસિટીના જોરે સ્થિતિ પલટાઈ ગઈ હતી. ત્રીજા સપ્તાહમાં ફિલ્મે સીધા 10.40 કરોડ રૂપિયાનો બિઝનેસ કરીને સૌને ચોંકાવી દીધા હતા. ટ્રેડ રિપોર્ટ્સ અનુસાર, આ સમગ્ર ફિલ્મનું નિર્માણ માત્ર ૨ કરોડ રૂપિયાના સામાન્ય બજેટમાં કરવામાં આવ્યું હતું.
ફિલ્મના આંકડા અને ચમત્કારિક સફર:
ઓછો ખર્ચ, મોટો નફો: 2 કરોડના બજેટ સામે 23 દિવસમાં ભારતમાં કુલ 27.38 કરોડ રૂપિયાનું ગ્રોસ કલેક્શન થયું છે.
ચોથા સપ્તાહમાં તેજી: ચોથા શુક્રવારે ફિલ્મે 6.25 કરોડ અને શનિવારે 9.25 કરોડ રૂપિયાનો રેકોર્ડતોડ વકરો નોંધાવ્યો હતો.
ગ્લોબલ ફોલોઅર્સ: આ વાર્તા જાણીતા સંત નીમ કરોલી બાબાના જીવન અને આધ્યાત્મિક દર્શન પર આધારિત છે. સ્ટીવ જોબ્સ, માર્ક ઝકરબર્ગ, વિરાટ કોહલી અને અનુષ્કા શર્મા જેવા વૈશ્વિક દિગ્ગજો પણ નીમ કરોલી બાબાના આશ્રમ અને વિચારોથી પ્રભાવિત છે.
સ્ટાર કાસ્ટ, ડિરેક્શન અને સિનેમાઘરોમાં દર્શકોની ભારે ભીડ
ફિલ્મનું નિર્દેશન વિશાલ ચતુર્વેદીએ કર્યું છે, જ્યારે મહારાજ જી (નીમ કરોલી બાબા)ના પવિત્ર પાત્રમાં અભિનેતા શોભિનાવ સત્યાએ ઉત્કૃષ્ટ અભિનય કર્યો છે. આ ઉપરાંત વિહાન શેજ, ચંદન કે. આનંદ, પૂર્ણિમા તિવારી, અનિલ રાસ્તોગી, ગુલશન પાંડે, ભગવાનદાસ પટેલ અને રાજીવ મિશ્રા જેવા કલાકારોએ પણ મહત્ત્વની ભૂમિકાઓ ભજવી છે. ફિલ્મની અભૂતપૂર્વ સફળતા જોઈને મુખ્ય અભિનેતા શોભિનાવ સત્યાએ સોશિયલ મીડિયા પર ભાવુક પોસ્ટ શેર કરીને દર્શકોનો આભાર માન્યો હતો. તેમણે કહ્યું કે, "દર્શકોએ જે નિઃસ્વાર્થ પ્રેમ આપ્યો છે તે સાચે જ મહારાજ જીનો આશીર્વાદ છે."
'ટોક્સિક' જેવી મોટી ફિલ્મો સામે બુકિંગમાં ટક્કર અને ભવિષ્યનું માર્કેટ
સોશિયલ મીડિયા પર ચાહકો એ વાતની ચર્ચા કરી રહ્યા છે કે BookMyShow જેવા અગ્રણી ટિકિટ પ્લેટફોર્મ પર 'હનુમાન અંશ'નું રિયલ-ટાઇમ બુકિંગ મોટા બજેટની અન્ય બિગ-ટિકિટ ફિલ્મોની સમકક્ષ પહોંચી ગયું છે. ટ્રેડ એનાલિસ્ટ્સ માને છે કે આધ્યાત્મિક અને સત્યઘટના આધારિત સિનેમા જો યોગ્ય સંવેદનશીલતા સાથે બનાવવામાં આવે તો કન્ટેન્ટ હંમેશા સ્ટાર પાવર પર ભારે પડે છે. થિયેટરોમાંથી ઉતરી જવાની અણી પર રહેલી ફિલ્મનું આ સ્તરનું કલેક્શન ભારતીય સિનેમાના ઇતિહાસમાં એક દુર્લભ ઉદાહરણ બની ગયું છે.
આ પણ વાંચો : Sonam Wangchuk On Aamir Khan : 'ગજની' મોડમાં હતા એટલે આમિર ખાન મને ભૂલી ગયા, પોડકાસ્ટમાં સોનમ વાંગચુકનો મોટો ઘટસ્ફોટ
