મિથુનની દીકરી દિશાનીની સગાઈ, સોશિયલ મીડિયા પર તસવીરો થઈ વાયરલ
બોલિવૂડના ‘ડિસ્કો ડાન્સર’ તરીકે જાણીતા મિથુન ચક્રવર્તીના પરિવારમાં એક ખાસ પ્રસંગની ઉજવણી શરૂ થઈ છે. તેમની દીકરી દિશાની ચક્રવર્તીએ પોતાના લાંબા સમયના બોયફ્રેન્ડ માઈલ્સ મેન્ટઝારિસ સાથે સગાઈ કરી છે. આ સમાચાર સામે આવતા જ ફેન્સ અને બોલિવૂડ જગતમાંથી શુભેચ્છાઓનો વરસાદ થઈ રહ્યો છે.
દિશાનીએ રોમેન્ટિક તસવીરો સાથે કરી સગાઈની જાહેરાત
દિશાની ચક્રવર્તીએ સોશિયલ મીડિયા પર માઈલ્સ સાથેની કેટલીક ખાસ તસવીરો શેર કરી હતી. આ તસવીરોમાં માઈલ્સ ઘૂંટણિયે બેસીને દિશાનીને પ્રપોઝ કરતા જોવા મળે છે. જ્યારે અન્ય એક તસવીરમાં દિશાની પોતાની હીરાની સગાઈની રિંગ ફ્લોન્ટ કરતી જોવા મળી રહી છે. તસવીરો શેર કરતા દિશાનીએ લખ્યું કે, 6 ડિસેમ્બર 2026 તેના જીવનનો સૌથી સરળ અને ખાસ નિર્ણય છે. પોસ્ટ બાદ થોડા જ સમયમાં આ તસવીરો સોશિયલ મીડિયા પર ચર્ચાનો વિષય બની ગઈ હતી.
દિશાની અને માઈલ્સના સંબંધની નવી શરૂઆત, લગ્નની તારીખ પણ જાહેર
દિશાની ચક્રવર્તીએ સ્પષ્ટ કર્યું છે કે તે આ વર્ષના ડિસેમ્બરમાં લગ્નના બંધનમાં બંધાશે. માઈલ્સ મેન્ટઝારિસ વ્યવસાયે સ્ટેડીકેમ ઓપરેટર અને કલરિસ્ટ છે. બંને લાંબા સમયથી એકબીજાને ડેટ કરી રહ્યા હતા અને હવે તેમના સંબંધને નવા પડાવ પર લઈ જવાનો નિર્ણય લીધો છે.
મિથુન ચક્રવર્તીની દત્તક દીકરી છે દિશાની
દિશાની ચક્રવર્તી મિથુન ચક્રવર્તી અને તેમની પત્ની યોગિતા બાલીની દત્તક દીકરી છે. મિથુન દાએ દિશાનીને પોતાના સગા સંતાનની જેમ ઉછેરી છે. પરિવાર સાથે દિશાનીનો સંબંધ હંમેશા ખૂબ જ ખાસ રહ્યો છે. મિથુન અને યોગિતા બાલીને ચાર સંતાનો છે, જેમાં ત્રણ પુત્રો મિમોહ, ઉષ્મે અને નમાશી ઉપરાંત દિશાનીનો સમાવેશ થાય છે.
ફિલ્મ અને ટીવી જગતમાં પણ બનાવી છે ઓળખ
દિશાની ચક્રવર્તીએ પણ અભિનય ક્ષેત્રમાં પોતાની ઓળખ બનાવવાનો પ્રયાસ કર્યો છે. તે કેટલીક ફિલ્મો અને ડિજિટલ પ્રોજેક્ટ્સમાં જોવા મળી ચૂકી છે. જોકે તેણે પોતાના અંગત જીવનને હંમેશા લાઈમલાઈટથી દૂર રાખ્યું છે. હવે તેની સગાઈના સમાચાર બાદ ચક્રવર્તી પરિવાર ફરી એકવાર ચર્ચામાં આવ્યો છે. ફેન્સ હવે દિશાનીના લગ્ન સમારોહની આતુરતાથી રાહ જોઈ રહ્યા છે.
આ પણ વાંચો : Sanchita Ugale Death News : કુમકુમ ભાગ્ય ફેમ ટીવી એક્ટ્રેસ સંચિતા ઉગાલેનું નિધન, મનોરંજન જગતમાં શોકનો માહોલ
