મામૂટીને મળ્યો પદ્મ ભૂષણ
મલયાલમ સિનેમાના સુપરસ્ટાર મામૂટીનું નામ જાહેર થતાં જ સમગ્ર સમારોહમાં ખાસ ઉત્સાહ જોવા મળ્યો હતો. તેમના પુત્ર અને જાણીતા અભિનેતા દુલ્કર સલમાન પણ આ પ્રસંગે હાજર રહ્યા હતા. મામૂટીને પદ્મ ભૂષણથી સન્માનિત કરવામાં આવ્યા, જે તેમની 5 દાયકાથી વધુ લાંબી અને પ્રભાવશાળી ફિલ્મી સફરની કદર છે. મામૂટીએ માત્ર મલયાલમ જ નહીં, પરંતુ અનેક ભારતીય ભાષાઓની 400થી વધુ ફિલ્મોમાં અભિનય કર્યો છે. તેમની અભિનય ક્ષમતા, વિવિધ પ્રકારના પાત્રોને જીવંત બનાવવાની કળા અને સામાજિક કાર્યોમાં તેમની સક્રિય ભાગીદારી તેમને માત્ર અભિનેતા નહીં પરંતુ સમાજ માટે પ્રેરણાસ્ત્રોત બનાવે છે.
અલ્કા યાજ્ઞિકને પદ્મ ભૂષણ
ભારતીય સંગીત જગતમાં અલ્કા યાજ્ઞિકનું નામ એક યુગ સમાન ગણાય છે. 4 દાયકાથી વધુ સમયથી કરોડો લોકોના દિલ પર રાજ કરતી આ ગાયિકાને પદ્મ ભૂષણથી સન્માનિત કરવામાં આવી હતી. તાજેતરમાં શ્રવણશક્તિ સંબંધિત સમસ્યાઓનો સામનો કરી રહેલી અલ્કા યાજ્ઞિક જ્યારે સ્ટેજ પર પહોંચી ત્યારે સમગ્ર હોલમાં તેમના પ્રત્યે વિશેષ સન્માન અને લાગણીનો માહોલ સર્જાયો હતો. તેમણે પોતાના કારકિર્દી દરમિયાન 1,000થી વધુ ગીતોને અવાજ આપ્યો છે, જેમાંથી અનેક ગીતો આજે પણ લોકપ્રિય છે.
દક્ષિણ ભારતના દિગ્ગજ કલાકારોને પણ મળ્યું સન્માન
આ સમારોહમાં તેલુગુ ફિલ્મ ઉદ્યોગના જાણીતા અભિનેતા મગંતી મુરલી મોહનને પદ્મશ્રી એનાયત કરવામાં આવ્યો હતો. દાયકાઓથી ફિલ્મ જગતમાં સક્રિય રહેલા મોહનને તેમના યોગદાન બદલ આ સન્માન મળ્યું. આ ઉપરાંત લોકપ્રિય તેલુગુ અભિનેતા ગડ્ડે બાબુ રાજેન્દ્ર પ્રસાદને પણ પદ્મશ્રીથી નવાજવામાં આવ્યા હતા. નાગાલેન્ડની સમૃદ્ધ લોકસંસ્કૃતિને જીવંત રાખનાર લોકકલાકાર ગુરુ સંગ્યુસાંગ પોંગેનરને પણ પદ્મશ્રી મળ્યો હતો.
આર. માધવનને મળ્યું રાષ્ટ્રીય ગૌરવ
હિન્દી અને દક્ષિણ ભારતીય સિનેમામાં પોતાની અનોખી ઓળખ બનાવનારા અભિનેતા આર. માધવનને પણ પદ્મશ્રીથી સન્માનિત કરવામાં આવ્યા હતા. 7થી વધુ ભાષાઓની ફિલ્મોમાં અભિનય કરી ચૂકેલા માધવને પોતાની કારકિર્દીમાં 70થી વધુ ફિલ્મો અને અનેક ટેલિવિઝન કાર્યક્રમોમાં કામ કર્યું છે. તેમની અભિનય શૈલી, વિવિધ પ્રકારના પાત્રોની પસંદગી અને સતત નવા પ્રયોગો કરવાની તૈયારી તેમને ભારતીય ફિલ્મ ઉદ્યોગના સૌથી પ્રતિભાશાળી કલાકારોમાં સ્થાન અપાવે છે.
અનિલ કુમાર રસ્તોગીને મળ્યું સન્માન
અનિલ કુમાર રસ્તોગીનું વ્યક્તિત્વ અનેક ક્ષેત્રોમાં ફેલાયેલું છે. તેઓ માત્ર અભિનેતા જ નહીં પરંતુ એક પ્રતિષ્ઠિત વૈજ્ઞાનિક પણ છે. થિયેટર, રેડિયો, ટેલિવિઝન અને સિનેમામાં તેમણે દાયકાઓ સુધી નોંધપાત્ર યોગદાન આપ્યું છે. તેમણે લગભગ 100 નાટકો, 1,000થી વધુ મંચ પ્રદર્શનો, 75થી વધુ ફિલ્મો અને 500થી વધુ ટીવી કાર્યક્રમોમાં ભાગ લીધો છે. સાથે સાથે તેમણે વૈજ્ઞાનિક ક્ષેત્રે 78થી વધુ સંશોધન પત્રો પણ પ્રકાશિત કર્યા છે. તેમના જેવા બહુઆયામી વ્યક્તિત્વને પદ્મશ્રી મળવું એ દેશ માટે ગૌરવની વાત છે.
સતીશ શાહને મરણોત્તર શ્રદ્ધાંજલિરૂપ સન્માન
ભારતીય ટેલિવિઝન અને ફિલ્મ જગતના સૌથી પ્રિય કલાકારોમાંના એક સતીશ શાહને મરણોત્તર પદ્મશ્રી એનાયત કરવામાં આવ્યો હતો. 4 દાયકાથી વધુ લાંબી કારકિર્દીમાં તેમણે અનેક યાદગાર પાત્રો ભજવ્યા હતા. ખાસ કરીને "સારાભાઈ વર્સિસ સારાભાઈ" જેવા લોકપ્રિય શોમાં તેમના અભિનયે તેમને ઘરઘરમાં ઓળખ અપાવી હતી. તેમના નિધન બાદ તેમના ભાઈએ આ સન્માન સ્વીકાર્યું હતું, જે ક્ષણ ભાવનાત્મક બની ગઈ હતી.
પદ્મ પુરસ્કારોનું સાચું મહત્વ
પદ્મ પુરસ્કારો માત્ર સિદ્ધિઓનું સન્માન નથી, પરંતુ તે દેશના વિવિધ ક્ષેત્રોમાં કાર્યરત એવા લોકોને પ્રોત્સાહન આપવાનો એક માર્ગ છે, જેમણે પોતાના કાર્ય દ્વારા સમાજ પર સકારાત્મક અસર પેદા કરી છે. આ વર્ષના પુરસ્કાર વિજેતાઓએ સાબિત કર્યું છે કે પ્રતિભા, સમર્પણ અને સતત મહેનત દ્વારા વ્યક્તિ માત્ર પોતાના ક્ષેત્રમાં જ નહીં, પરંતુ સમગ્ર દેશ માટે પ્રેરણારૂપ બની શકે છે.
આ પણ વાંચો : Rohit Sharma Padma Shri : રાષ્ટ્રપતિના હસ્તે રોહિત શર્માને પદ્મશ્રી એનાયત, જાણો 'હિટમેન'ની ઐતિહાસિક સફર અને સિદ્ધિઓ
