'ગજની' અને 'લગાન' ના પ્રખ્યાત અભિનેતા પ્રદીપ રાવતનું 74 વર્ષની વયે દુઃખદ નિધન
ભારતીય ફિલ્મોમાં પોતાના ભયાનક અને યાદગાર નેગેટિવ રોલ્સથી દર્શકોના દિલ પર છાપ છોડનારા કલાકાર પ્રદીપ રાવત હવે આપણી વચ્ચે રહ્યા નથી. તેમના બિઝનેસ મેનેજર સિદ્ધાર્થ તિવારીએ એક મીડિયા ઈન્ટરવ્યુમાં તેમના અવસાનના સમાચારની પુષ્ટિ કરી છે.
તેમના જવાથી સમગ્ર બોલિવૂડ તેમજ દક્ષિણ ભારતીય ફિલ્મ ઉદ્યોગમાં ભારે શોકની કાલિમા છવાઈ ગઈ છે. ફિલ્મ ઈન્ડસ્ટ્રી અને તેમના કરોડો ફેન્સ આ અચાનક વિદાયથી ભારે આઘાતમાં સરી પડ્યા છે.
5 વર્ષથી બ્લડ કેન્સર સામે ઝઝૂમી રહ્યા હતા દિગ્ગજ કલાકાર
તેમના સ્વાસ્થ્ય અંગે વિગતવાર માહિતી આપતાં તેમના મેનેજરે જણાવ્યું હતું કે, પ્રદિપ રાવતને બ્લડ કેન્સર હતું. તેઓ છેલ્લા પાંચ વર્ષથી બ્લડ કેન્સરની ગંભીર બીમારીથી પીડાતા હતા.
શરૂઆતમાં સારવાર બાદ તેમના સ્વાસ્થ્યમાં સુધારો જોવા મળ્યો હતો, પરંતુ થોડા મહિનાઓ પહેલા કેન્સર ફરીથી ઉથલો માર્યો હતો. છેલ્લા બે મહિનાથી તેઓ હોસ્પિટલમાં સારવાર હેઠળ હતા. વિતેલા કેટલાક દિવસોમાં તેમની હાલત વધુ કથળતાં તેમણે મંગળવારે સાંજે અંતિમ શ્વાસ લીધા હતા. બુધવારે તેમના અંતિમ સંસ્કાર કરવામાં આવશે.
સોનુ સૂદ અને મનોરંજન જગતના સિતારાઓએ આપી ભાવુક શ્રદ્ધાંજલિ
પ્રદીપ રાવતના નિધનના સમાચાર વાયરલ થતાં જ સોશિયલ મીડિયા પર શોકની લહેર દોડી ગઈ હતી. અભિનેતા સોનુ સૂદે પોતાની ઈન્સ્ટાગ્રામ સ્ટોરી પર પ્રદીપ રાવતની બ્લેક એન્ડ વ્હાઈટ તસવીર શેર કરીને લખ્યું હતું કે, "પ્રદીપ રાવત ભાઈ, તમારી કમી અવિરતપણે અનુભવાશે."
આ ઉપરાંત ટીવી અને બોલિવૂડના અન્ય કલાકારોએ પણ 'ગજની' ના ટાઈટલ વિલન અને 'લગાન' ના 'દેવા' ના પાત્રને યાદ કરીને તેમને શ્રદ્ધાંજલિ અર્પણ કરી હતી.
વિલનના રોલમાં અદ્ભુત અભિનય અને ભારતીય સિનેમા પર તેમની અમિટ છાપ
પ્રદીપ રાવતે માત્ર બોલિવૂડ જ નહીં પરંતુ તેલુગુ, તમિલ, કન્નડ અને મલયાલમ ફિલ્મોમાં પણ વિલન તરીકે પોતાની ખાસ ઓળખ બનાવી હતી. આમીર ખાનની 'ગજની' ફિલ્મમાં તેમના દ્વારા ભજવવામાં આવેલું વિલનનું પાત્ર આજે પણ ભારતીય સિનેમાના શ્રેષ્ઠ નેગેટિવ પાત્રોમાં ગણાય છે.
તેમની દમદાર એક્ટિંગ અને સંવાદ શૈલી લાંબા સમય સુધી પ્રેક્ષકોના હૃદયમાં જીવંત રહેશે. તેમના જવાથી સિનેમામાં નેગેટિવ રોલ્સમાં પડેલી ખોટ પૂરવી મુશ્કેલ બનશે.
આ પણ વાંચો : Brett Lee Preity Zinta Relationship : બ્રેટ લી અને પ્રીતિ ઝિન્ટાના સંબંધોનું વર્ષો જૂનું રહસ્ય અચાનક બહાર! જાણો શું હતી અસલી હકીકત
