મુંબઈના મંદિરમાં મહાદેવની આરાધના કરી
ભારત પ્રવાસ દરમિયાન ટાયરીસ ગિબ્સન (Tyrese Gibson) મુંબઈના એક પ્રાચીન મંદિરમાં પહોંચ્યા હતા, જ્યાં તેમણે ભગવાન શિવની શ્રદ્ધાપૂર્વક પૂજા કરી હતી. સોશિયલ મીડિયા પર શેર કરાયેલા ફોટા અને વીડિયોમાં તેઓ શિવલિંગ પર દૂધ ચઢાવતા, આરતી કરતા અને સંપૂર્ણ ભારતીય પરંપરા મુજબ પૂજામાં ભાગ લેતા જોવા મળ્યા હતા. આ દ્રશ્યોએ તેમના ચાહકોને આશ્ચર્યચકિત કરી દીધા હતા, કારણ કે એક આંતરરાષ્ટ્રીય સ્ટાર ભારતીય સંસ્કૃતિ અને આધ્યાત્મિક પરંપરાને આટલી નજીકથી સ્વીકારી રહ્યો હતો. ટાયરીસે પોતાના અનુભવને માત્ર ધાર્મિક વિધિ નહીં, પરંતુ આત્મિક શાંતિ તરફનું એક મહત્વપૂર્ણ પગલું ગણાવ્યું હતું.
ડૉ. માર્ટિન લૂથર કિંગની ભારત યાત્રાથી પ્રેરણા લીધી
ટાયરીસે પોતાના ઇન્સ્ટાગ્રામ પર એક લાંબી પોસ્ટ લખીને અમેરિકાના મહાન સમાજ સુધારક ડૉ. માર્ટિન લૂથર કિંગ જુનિયરની 1959ની ભારત યાત્રાનો પણ ઉલ્લેખ કર્યો હતો. તેમણે લખ્યું કે ડૉ. કિંગ મહાત્મા ગાંધીના વિચારો અને અહિંસાના સિદ્ધાંતોને સમજવા ભારત આવ્યા હતા. ટાયરીસે તેમના પ્રસિદ્ધ વિચારનો પણ ઉલ્લેખ કર્યો કે, "ઈસુ ખ્રિસ્તે મને પ્રેમ કરવાનું શીખવ્યું, જ્યારે મહાત્મા ગાંધીએ મને અહિંસાનો માર્ગ બતાવ્યો." ટાયરીસના મતે આ ઐતિહાસિક યાત્રાએ માત્ર એક વ્યક્તિ નહીં પરંતુ સમગ્ર વિશ્વના ઇતિહાસને નવી દિશા આપી હતી.
ભારત કેમ આવ્યા? ટાયરીસે આપ્યો જવાબ
ટાયરીસ ગિબ્સને સ્પષ્ટ કર્યું કે તેઓ ભારત સામાન્ય પ્રવાસીની જેમ ફરવા માટે નહીં, પરંતુ ધ્યાન (Meditation) શીખવા અને પોતાના મનની અશાંતિને દૂર કરવા માટે આવ્યા હતા. તેમનું માનવું છે કે આજના ઝડપી જીવનમાં માનસિક શાંતિ સૌથી મોટી સંપત્તિ બની ગઈ છે અને ભારત વિશ્વને આ ક્ષેત્રમાં ઘણું શીખવી શકે છે. તેમણે જણાવ્યું કે ભારતની આધ્યાત્મિક પરંપરા, અહીંના લોકોની જીવનશૈલી અને ધ્યાનની પ્રાચીન પદ્ધતિઓ તેમના માટે ખૂબ પ્રેરણાદાયક રહી છે.
ભારતીય મહેમાનનવાજીથી થયા પ્રભાવિત
ભારત પ્રવાસ દરમિયાન ટાયરીસને અહીંના લોકો તરફથી મળેલા પ્રેમ અને સન્માનથી તેઓ ખૂબ જ પ્રભાવિત થયા હતા. તેમણે સોશિયલ મીડિયા પોસ્ટમાં ભારતીયોની મહેમાનનવાજી, સૌજન્ય અને ઉષ્માભર્યા સ્વાગત માટે દિલથી આભાર વ્યક્ત કર્યો હતો. તેમણે લખ્યું કે ભારત માત્ર એક દેશ નથી, પરંતુ એવી સંસ્કૃતિ છે, જ્યાં લોકોને દિલથી અપનાવવાની પરંપરા આજે પણ જીવંત છે.
બાળપણના મિત્ર કેન્યાટા પ્રત્યે વ્યક્ત કર્યો આભાર
આ આધ્યાત્મિક સફરમાં ટાયરીસ એકલા નહોતા. તેમની સાથે તેમના બાળપણના મિત્ર કેન્યાટા પણ ભારત આવ્યા હતા. બંને લગભગ 8 વર્ષની ઉંમરથી મિત્રો છે. ટાયરીસે ખૂબ જ ભાવુક બનીને જણાવ્યું કે બાળપણના સૌથી મુશ્કેલ સમયમાં કેન્યાટાના પરિવારે તેમને પોતાના પરિવારના સભ્યની જેમ સાથ આપ્યો હતો. તેમણે કહ્યું કે જીવનમાં જ્યારે સફળતા મળે ત્યારે એવા લોકોને ક્યારેય ભૂલવા જોઈએ નહીં, જેમણે ખરાબ સમયમાં આપણો હાથ પકડ્યો હોય. તેમણે ઉમેર્યું કે સાચી કૃતજ્ઞતા એ જ છે કે જીવનમાં આગળ વધ્યા પછી પણ આપણે આપણા શુભચિંતકો પ્રત્યે આદર અને પ્રેમ જાળવી રાખીએ.
આગામી ફિલ્મોમાં ફરી જોવા મળશે ટાયરીસ
ભારત પ્રવાસ બાદ ટાયરીસ ગિબ્સન ફરી પોતાના ફિલ્મી પ્રોજેક્ટ્સમાં વ્યસ્ત થવાના છે. તેઓ આગામી ફિલ્મ Fast Foreverમાં ફરી એકવાર પોતાના લોકપ્રિય પાત્ર 'રોમન પિયર્સ' (Roman Pearce) તરીકે જોવા મળશે. આ ઉપરાંત તેઓ જાણીતા R&B ગાયક ટેડી પેન્ડરગ્રાસ (Teddy Pendergrass)ના જીવન પર બની રહેલી બાયોપિકમાં મુખ્ય ભૂમિકા ભજવવાના છે. ખાસ વાત એ છે કે આ ફિલ્મમાં તેઓ માત્ર અભિનેતા જ નહીં, પરંતુ પ્રોડ્યુસર તરીકે પણ મહત્વની જવાબદારી સંભાળી રહ્યા છે.
આ પણ વાંચો : ભારતની પહેલી AI આધારિત સુપરનેચરલ સિરીઝ 'Detective Boomrah and the Killer' નો દમદાર ફર્સ્ટ લુક રિલીઝ!
