Ambalal Patel Weather forecast: મઘા નક્ષત્રના પ્રભાવથી રાજ્યમાં ફરી ધમાકો કરશે મેઘરાજા! આ વિસ્તારોમાં ધોધમાર વરસાદ પડશે

મઘા નક્ષત્રમાં વરસાદના એંધાણ, Ambalal Patel ની મોટી આગાહી

હવામાન નિષ્ણાંત અંબાલાલ પટેલના જણાવ્યા અનુસાર, સૂર્યદેવે મઘા નક્ષત્રમાં પ્રવેશ કર્યો છે. સામાન્ય રીતે મઘા નક્ષત્રનું પાણી કૃષિ પાકો માટે ખૂબ જ ગુણકારી અને સારું ગણવામાં આવે છે, જે ખેતી માટે લાભદાયી સાબિત થાય છે. આ સિવાય આગામી 17 થી 19 ઓગસ્ટ દરમિયાન રાજ્યના કેટલાક વિસ્તારોમાં છૂટાછવાયા વરસાદી ઝાપટાં પડવાની શક્યતાઓ રહેલી છે.

સરદાર સરોવર ડેમમાં મોટા પ્રમાણમાં પાણીની આવક થશે

અંબાલાલ પટેલની આગાહી મુજબ, બંગાળના ઉપસાગરમાં એક મજબૂત વેધર સિસ્ટમ બનવા જઈ રહી છે, જેના પ્રભાવથી મધ્ય પ્રદેશમાં ભારે વરસાદ વરસી શકે છે. મધ્ય પ્રદેશમાં ભારે વરસાદના કારણે નર્મદા નદીનું જળસ્તર વધવાની પૂરી સંભાવના છે, જેનાથી સરદાર સરોવર (નર્મદા) ડેમમાં પણ મોટા પ્રમાણમાં પાણીની આવક થઈ શકે છે.

મધ્ય અને દક્ષિણ ગુજરાત

મધ્ય ગુજરાતના ભાગોમાં આગામી 23 થી 31ઓગસ્ટ દરમિયાન ભારે વરસાદ ખાબકવાની શક્યતા છે. આ સાથે દક્ષિણ ગુજરાતના વિવિધ વિસ્તારોમાં પણ સારો એવો ભારે વરસાદ વરસી શકે છે.

સૌરાષ્ટ્ર અને કચ્છ

સૌરાષ્ટ્રના ભાગોમાં ભારે વરસાદી ઝાપટાં પડી શકે છે. ખાસ કરીને ભાવનગર, અમરેલી અને ગીર સોમનાથના ભાગોમાં સારો વરસાદ થવાની સંભાવના છે, જ્યારે દ્વારકા, પોરબંદર અને જામનગરમાં હળવા વરસાદી ઝાપટાં જોવા મળી શકે છે.

ઉત્તર ગુજરાત

પાટણ, સમી, હારીજ, મહેસાણા, અરવલ્લી અને સાબરકાંઠા જેવા ઉત્તર ગુજરાતના વિસ્તારોમાં પણ હળવા વરસાદી ઝાપટાં પડવાની આગાહી કરવામાં આવી છે.

તહેવારો પર વરસાદની અસર

અંબાલાલ પટેલના અનુમાન મુજબ, આગામી ૩૧ ઓગસ્ટના રોજ સૂર્ય પૂર્વા ફાલ્ગુની નક્ષત્રમાં પ્રવેશ કરશે. આ નક્ષત્રનું પાણી સામાન્ય રીતે કૃષિ પાકો માટે એટલું સારું ગણાતું નથી. આ સમયગાળા દરમિયાન પવનની ગતિ પણ સામાન્ય કરતા વધારે રહી શકે છે. આ ઉપરાંત, આઠમ અને નોમના પવિત્ર તહેવારો દરમિયાન પણ વાતાવરણમાં પલટો આવી શકે છે અને હળવો વરસાદ પડવાની સંભાવના છે.

આ પણ વાંચો: Sagbara Forest land Dispute: સાગબારા જંગલ જમીન આંદોલનનો 10 મો દિવસ, મહારાષ્ટ્રના ધારાસભ્ય ખેડૂતોના સમર્થનમાં ઉતર્યા