ભરતી પ્રક્રિયાની પારદર્શિતા અને સફળતા
ગુજરાત સરકાર દ્વારા હાથ ધરવામાં આવેલી આ ભરતી પ્રક્રિયા તેની પારદર્શિતા અને સમયબદ્ધતા માટે વિશેષ નોંધપાત્ર રહી છે. લોકરક્ષક કેડર (Lokrakshak Cadre) ની કુલ 11,899 જગ્યાઓ માટેની ભરતી પ્રક્રિયા હાથ ધરવામાં આવી હતી, જેમાંથી 11,607 ઉમેદવારોએ તમામ તબક્કાઓ સફળતાપૂર્વક પાર કર્યા છે. આ ભરતીમાં 8,782 પુરુષ ઉમેદવારો અને 3,117 મહિલા ઉમેદવારોની પસંદગી કરવામાં આવી છે.
Advertisement ![Navratri Banner]()
મુખ્યમંત્રીનું પ્રેરણાદાયી સંબોધન
નવનિયુક્ત જવાનોને સંબોધતા મુખ્યમંત્રી ભૂપેન્દ્રભાઈ પટેલે જણાવ્યું હતું કે, "ગુજરાત પોલીસની એક ગૌરવશાળી પરંપરા રહી છે. કોઈપણ રાજ્યની પ્રગતિ અને વિકાસનો પાયો ત્યાંની સલામતી પર ટકેલો હોય છે. જ્યારે લોકો સુરક્ષિત અનુભવે ત્યારે જ તે રાજ્ય વિકાસના નવા શિખરો સર કરી શકે છે." તેમણે ઉમેર્યું હતું કે આજે ગુજરાત મોડેલની ચર્ચા માત્ર દેશમાં જ નહીં પણ વિદેશોમાં પણ થાય છે, તેની પાછળ ગુજરાત પોલીસની દિવસ-રાતની મહેનત અને કાયદો-વ્યવસ્થાની સુદ્રઢ સ્થિતિ જવાબદાર છે.
'ખાખી વર્દી સેવાનું પ્રતીક'
મુખ્યમંત્રીએ નવા જવાનોને યાદ અપાવ્યું હતું કે તેઓ હવે એક અત્યંત જવાબદાર પદ પર બિરાજમાન થવા જઈ રહ્યા છે. પોલીસની ખાખી વર્દી માત્ર નોકરી નથી, પણ સેવાનું પ્રતીક છે. રાજ્યના છેવાડાના માનવીને પોલીસ પર જે વિશ્વાસ છે, તેને જાળવી રાખવાની જવાબદારી હવે આ નવયુવાનોના ખભા પર છે. મુખ્યમંત્રીએ વિશ્વાસ વ્યક્ત કર્યો હતો કે આ નવનિયુક્ત જવાનો પોતાની ફરજ નિષ્ઠાપૂર્વક બજાવશે અને ગુજરાતની શાંતિને વધુ સુદ્રઢ બનાવશે.
Gandhinagar: મહિલા સશક્તિકરણનું ઉદાહરણ
આ ભરતીમાં 3,117 મહિલા ઉમેદવારોની પસંદગી એ રાજ્યમાં મહિલા સશક્તિકરણનું ઉત્તમ ઉદાહરણ પૂરું પાડે છે. પોલીસ દળમાં મહિલાઓની વધતી સંખ્યાથી સમાજમાં મહિલાઓની સુરક્ષા અંગેનો વિશ્વાસ વધુ દ્રઢ બનશે. કાર્યક્રમના અંતે મુખ્યમંત્રી અને અન્ય મહાનુભાવોએ નવનિયુક્ત જવાનો સાથે સંવાદ કરી તેમને ઉજ્જવળ ભવિષ્યની શુભેચ્છાઓ પાઠવી હતી.
જવાનોને જિલ્લા પસંદગીનો વિકલ્પ
કાર્યક્રમમાં ઉપસ્થિતિ ગૃહ રાજ્યમંત્રી હર્ષભાઈ સંઘવીએ જણાવ્યું હતું કે ગુજરાતના ઈતિહાસમાં આ પ્રથમ ઘટના છે જ્યારે LRD માં નિમણૂક પામેલા જવાનોને જિલ્લા પસંદગીનો વિકલ્પ (District Choice Option) આપવામાં આવશે. અગાઉ આ પ્રથા ન હતી, પરંતુ હવે ઉમેદવારો પોતાની અનુકૂળતા મુજબ જિલ્લો પસંદ કરી શકશે, જે તેમના પરિવાર અને નોકરી વચ્ચે સંતુલન જાળવવામાં મદદરૂપ થશે.
'નાગરિકો સાથે બનાવેલા સંબંધો કાયમ ટકી રહે છે'
નવનિયુક્ત જવાનોને સલાહ આપતાં ગૃહ રાજ્યમંત્રી હર્ષભાઈ સંઘવીએ હતું કે, "તમારા માતા-પિતાએ તનતોડ મહેનત કરીને તમને પોલીસમાં મોકલ્યા છે, તેમનું સન્માન જળવાય તે રીતે ફરજ બજાવજો." તેમણે વધુમાં ઉમેર્યું કે હોદ્દો કે સત્તા લાંબો સમય ટકતા નથી, પરંતુ નાગરિકો સાથે પ્રેમ અને લાગણીથી બનાવેલા સંબંધો કાયમ ટકી રહે છે. આ કાર્યક્રમમાં ગૃહ વિભાગના ઉચ્ચ અધિકારીઓ, પોલીસ મહાનિર્દેશક અને અન્ય મહાનુભાવો ઉપસ્થિત રહ્યા હતા.
આ પણ વાંચોઃ Kheda: નડિયાદ મનપાનું 'મેગા ડિમોલિશન', 47 વર્ષ જૂના સરદાર ભુવનની 48 દુકાનો પર બુલડોઝર ફરી વળ્યું!
