Gandhinagar News: રાજ્યમાં જમીન મહેસૂલ વિભાગ અને દફ્તર કામગીરીમાં ચાલતી ગેરરીતિઓ સામે મુખ્યમંત્રી ભૂપેન્દ્રભાઈ પટેલે અત્યંત કડક વલણ અપનાવતા સપાટો બોલાવ્યો છે. મુખ્યમંત્રી કાર્યાલય (CMO) સુધી પહોંચેલી ભ્રષ્ટાચાર અને અનિયમિતતાની ગંભીર ફરિયાદોને પગલે મુખ્યમંત્રીએ લાલ આંખ કરી હતી. મુખ્યમંત્રી ભુપેન્દ્રભાઇ પટેલે બે અધિકારીઓને સસ્પેન્ડ કરવાના આદેશ કર્યો હતો.
મુખ્યમંત્રીના આદેશથી બે અધિકારીઓ સસ્પેન્ડ
મુખ્યમંત્રીના આદેશથી મહેસાણા અને ભાવનગરના બે જવાબદાર ઉચ્ચ અધિકારીઓને તત્કાલિક અસરથી સસ્પેન્ડ કરી દેવામાં આવ્યા છે. મહેસૂલ વિભાગના અધિક મુખ્ય સચિવ સાથે વિગતવાર પરામર્સ કર્યા બાદ ગાંધીનગરથી ખાસ તપાસ ટીમો મેદાને ઉતારવામાં આવી હતી, જેણે બંને જિલ્લાઓમાં સ્થળ તપાસ કરીને ગેરરીતિઓ આચરવામાં આવી હોવાના પુરાવા મેળવ્યા હતા.
Advertisement ![Navratri Banner]()
જમીન સર્વે અને જમીન દફ્તર સંદર્ભે ગેરરીતિઓ
આ સઘન તપાસ દરમિયાન મહેસાણાના સુપરિન્ટેન્ડેન્ટ ઓફ લેન્ડ રેકોર્ડ (DILR) બીકીશા પટેલ અને ભાવનગરના જમીન દફતર નિરીક્ષક કે.એ.પંડ્યાની ગંભીર બેદરકારી અને અનિયમિતતાઓ ઉજાગર થઈ હતી. જમીન સર્વે, રેકર્ડ અપડેટ અને જમીન દફ્તર સંબંધી કામગીરીમાં સામાન્ય નાગરિકોને હેરાનગતિ તેમજ ભ્રષ્ટાચાર આચરવામાં આવતો હોવાની ફરિયાદો સાચી સાબિત થતાં ગાંધીનગરથી ગયેલી તપાસ ટીમના અહેવાલના આધારે આ સબળ પગલું ભરવામાં આવ્યું છે. રાજ્ય સરકાર દ્વારા સરકારી પદ પર બેસીને પ્રજાના કામોમાં ભ્રષ્ટાચાર આચરનારા કે ગેરરીતિ કરનારા કોઈપણ અધિકારીને બક્ષવામાં નહીં આવે તેવો સ્પષ્ટ સંદેશ આ કાર્યવાહી દ્વારા આપવામાં આવ્યો છે.
ભ્રષ્ટ અધિકારીઓમાં ફફડાટ
મુખ્યમંત્રીના સીધા આદેશોથી લેવાયેલા આ કડક પગલાંને કારણે સમગ્ર રાજ્યના વહીવટી તંત્ર અને મહેસૂલ વિભાગમાં ભારે ખળભળાટ મચી ગયો છે. લાંબા સમયથી જમીન રેકર્ડ અને સર્વેની બાબતોમાં ચાલતી લાલીયાવાડી તથા ભ્રષ્ટાચાર સામે નાગરિકોમાં ભારે રોષ જોવા મળતો હતો, ત્યારે આ સસ્પેન્શન ઓર્ડરથી ભ્રષ્ટ અધિકારીઓમાં ફફડાટ ફેલાઈ ગયો છે. આગામી દિવસોમાં પણ આવા અનિયમિત અધિકારીઓ સામે કડક શિસ્તભંગની કાર્યવાહીનો દોર ચાલુ રહેવાની પૂરી સંભાવના છે.
આ પણ વાંચો: Ahmedabad News: લોકોના જીવ સાથે ચેડાં કરતું ડુપ્લિકેટ દવાનું રેકેટ ઝડપાયું, લખનઉમાં FIR થતાં જ ખુલ્યું અમદાવાદનું કનેક્શન!
