Gandhinagar: બિલ્ડર પુત્ર આત્મહત્યા કેસમાં ફરાર કલ્પેશ તલાટી પોલીસ સમક્ષ હાજર, જાણો મામલો

Gandhinagar: ક્રાઈમ સીનનું રીકન્સ્ટ્રક્શન

મળતી જાણકારી અનુસાર બિલ્ડર પુત્ર આત્મહત્યા કેસમાં પોલીસને મોટી સફળતા મળી છે. ઘણા સમયથી ફરાર આરોપી કલ્પેશ તલાટી (Kalpesh Talati) એ ખુદ પોલીસ સમક્ષ આત્મસમર્પણ કર્યું છે. પોલીસકર્મીઓ આરોપીને તે સ્થળે લઈ ગયા હતા. પોલીસે પુરાવા એકત્ર કરવા માટે ક્રાઈમ સીનનું રીકન્સ્ટ્રક્શન કર્યું છે. જોકે, હજુ પણ આ કેસમાં સંડોવાયેલો ત્રીજો આરોપી પોલીસ પકડથી દૂર છે, જેને પકડવા માટે ચક્રો ગતિમાન કરવામાં આવ્યા છે.

શું હતી સમગ્ર ઘટના?

ગાંધીનગર શહેર નજીક આવેલા સુઘડ (Sughad) ખાતે શિખર બંગ્લોઝ (Shikhar Bungalows) માં રહેતા જાણીતા બિલ્ડરના પુત્ર ઋષભ પટેલ (Rishabh Pravinbhai Patel) ના લગ્ન ગત 12 જાન્યુઆરીના રોજ ધામધૂમથી થયા હતા. જોકે, લગ્નના માત્ર 13 જ દિવસમાં એટલે કે 25 જાન્યુઆરીના રોજ ઋષભ સાઈટ પર જવાનું કહીને ઘરેથી નીકળ્યા બાદ ગુમ થયો હતો. પરિવાર દ્વારા શોધખોળ કરવા છતાં તેનો પતો લાગ્યો નહોતો. બીજા દિવસે 26 જાન્યુઆરીએ રાયપુર નર્મદા કેનાલ પાસે બહુચર પાન પાર્લર નજીકથી તેની બિનવારસી કાર મળી આવી હતી. કારની તપાસ દરમિયાન પોલીસને તેમાંથી ઋષભના ઘરેણાં, મોબાઈલ ફોન, રોકડ રકમ અને એક હૃદયદ્રાવક અંતિમ ચિઠ્ઠી (Suicide Note) મળી આવી હતી. ત્યારબાદ 28 જાન્યુઆરીના રોજ ઋષભનો મૃતદેહ તેના ઘરથી અંદાજે 39 કિલોમીટર દૂર કડી કેનાલમાંથી મળી આવ્યો હતો.

ત્રણ લોકોના ત્રાસથી ટૂંકાવ્યું જીવન

ઋષભ પટેલે તેની સુસાઈડ નોટમાં ત્રણ વ્યક્તિઓના ત્રાસનો ઉલ્લેખ કર્યો હતો. આ ત્રણેય આરોપીઓ દ્વારા આપવામાં આવતી માનસિક પીડા અને હેરાનગતિ સહન ન થતા ઋષભે કેનાલમાં કૂદીને જીવન ટૂંકાવ્યું હોવાનું બહાર આવ્યું છે. પોલીસે આ મામલે ગુનો નોંધી આરોપીઓની શોધખોળ શરૂ કરી હતી.

આ પણ વાંચોઃ Kheda Land Scam: કૌભાંડી શિક્ષક આશિષ પટેલ સસ્પેન્ડ, જાણો સમગ્ર મામલો