Gandhinagar News: ગાંધીનગર સિવિલ હોસ્પિટલમાંથી એક અત્યંત વિચિત્ર અને ચોંકાવનારી ઘટના પ્રકાશમાં આવી છે. કડી વિસ્તારના રહેવાસી અને ત્રણ પુત્રીઓના 36 વર્ષીય પિતાએ અંધશ્રદ્ધા અને માનતાના ચક્કરમાં આવીને એક એવું પગલું ભર્યું કે જેનાથી તેમનો જીવ જોખમમાં મુકાઈ ગયો હતો. માનતાના ભાગરૂપે ગળી ગયેલી 100 રૂપિયાની ચલણી નોટને પેટમાંથી બહાર કાઢવા માટે આ યુવકે પોતાના જ પેટમાં ચાકુના ઘા મારી દીધા હતા. જોકે, તબીબોની સૂઝબૂઝ અને સમયસર થયેલી જટિલ સર્જરીના કારણે યુવકનો આજીવન બચી ગયો છે.
Gandhinagar સિવિલ હોસ્પિટલનો ચોંકાવનારો કિસ્સો
પ્રાપ્ત વિગતો અનુસાર, 36 વર્ષીય આ યુવકને સંતાનમાં ત્રણ દીકરીઓ હતી. પરિવારમાં પુત્રની ઈચ્છા હોવાને કારણે તેણે એક ખાસ માનતા રાખી હતી. આ માનતા પૂર્ણ કરવાના અતિરેકમાં તેણે પૂજાના ભાગરૂપે આપેલા દાણા અને 100 રૂપિયાની ચલણી નોટ ગળી લીધી હતી. નોટ ગળ્યા બાદ જ્યારે તેને અહેસાસ થયો કે તે મુશ્કેલીમાં મુકાઈ ગયો છે, ત્યારે તેણે તે નોટને પેટમાંથી બહાર કાઢવાનો અસહાય અને જોખમી પ્રયાસ કર્યો હતો. આ હરકતમાં તેણે પોતાના જ પેટના ભાગે ચાકુના ઘા મારી દીધા હતા, જેને કારણે તેને ગંભીર ઈજાઓ પહોંચી હતી.
પડકારજનક સર્જરી
પેટના ભાગે ગંભીર ઇજાઓ થવાના કારણે ગત 29 ઓગસ્ટના રોજ સવારના સુમારે યુવકને તાત્કાલિક સારવાર અર્થે ગાંધીનગર સિવિલ હોસ્પિટલમાં ખસેડવામાં આવ્યો હતો. હોસ્પિટલ પહોંચ્યો ત્યારે દર્દી ભાનમાં હતો અને ચાલી-બોલી શકતો હતો, પરંતુ તેની આંતરિક સ્થિતિ અત્યંત જોખમી હતી. ગાંધીનગર સિવિલ હોસ્પિટલના સર્જન ડૉ. અભિજીત યાદવ અને તેમની ટીમ દ્વારા દર્દીની ગંભીરતાને ધ્યાનમાં રાખીને ત્વરિત નિદાન અને સારવાર શરૂ કરવામાં આવી હતી.
દોઢ કલાકની સર્જરીથી યુવકનો જીવ બચ્યો
તબીબી તપાસમાં બહાર આવ્યું કે ચાકુના ઘા વાગવાથી દર્દીના પેટની આગળની દીવાલને ભારે નુકસાન પહોંચ્યું હતું. સર્જન ટીમ માટે આ ઓપરેશન અત્યંત પડકારજનક હતું. ડૉક્ટરોએ સચોટ ટાંકાઓ દ્વારા પેટની આગળની દીવાલનું સફળતાપૂર્વક સમારકામ કર્યું હતું. આ ઉપરાંત, ભવિષ્યમાં ખોરાક આપવામાં સરળતા રહે તે માટે આંતરડામાં વિશેષ નળી પણ મૂકવામાં આવી હતી. પેટના અન્ય આંતરિક અંગોને નુકસાન થયું છે કે કેમ તેની ઝીણવટભરી તપાસ સાથે આશરે દોઢથી બે કલાક સુધી ચાલેલી આ જટિલ સર્જરી સફળ રહી હતી.
સફળ ઓપરેશન બાદ યુવકની તબિયતમાં સુધારો
સફળ ઓપરેશન બાદ દર્દીને ઓબ્ઝર્વેશન માટે સઘન સારવાર આઈસીયુ (ICU) વોર્ડમાં ખસેડવામાં આવ્યા હતા. તબીબોની નિરીક્ષણ ટીમ દ્વારા પાંચથી છ દિવસ સુધી સતત તેમની તબિયત પર નજર રાખવામાં આવી હતી. આખરે, સ્થિર સુધારો જણાતા દર્દીને ICUમાંથી જનરલ વોર્ડમાં શિફ્ટ કરવામાં આવ્યા છે. હાલ આ યુવક સામાન્ય રીતે ખોરાક લઈ શકે છે અને તેની તબિયતમાં સુધારો જોવા મળી રહ્યો છે.
આ પણ વાંચો: Bhavnagar Murder News: એસ.ટી. બસ ડેપોમાં ખૂની ખેલ, લિવ-ઈન પાર્ટનર ફૈઝલે કાજલને જાહેરમાં ઢોર માર મારીને મોતને ઘાટ ઉતારી