Gandhinagar પાસે કાળ બની આવી સેલ્ફી, કેનાલમાં પગ લપસતા 18 વર્ષના યુવાનનું મોત

સેલ્ફી લેતા સર્જાઈ દુર્ઘટના

પ્રાપ્ત માહિતી અનુસાર, ગાંધીનગરના મેદરા કેનાલ પાસે ત્રણ મિત્રો ફરવા માટે આવ્યા હતા. આ દરમિયાન કેનાલના કિનારે બે મિત્રો મોબાઈલથી સેલ્ફી (Selfie) લઈ રહ્યા હતા. સેલ્ફી લેવાની લ્હાયમાં અચાનક તેમનો પગ લપસી ગયો હતો અને બંને મિત્રો સીધા કેનાલની અંદર પડ્યા હતા.

મિત્રોને બચાવવા જતા ત્રીજાએ જીવ ગુમાવ્યો

પોતાના બંને મિત્રોને પાણીમાં ડૂબતા જોઈને કિનારે ઉભેલો ત્રીજો મિત્ર પણ તેમને બચાવવા માટે કોઈ પણ વિચાર કર્યા વગર કેનાલમાં કૂદી પડ્યો હતો. આસપાસથી પસાર થતા રાહદારીઓનું ધ્યાન જતાં તેઓ તાત્કાલિક મદદે દોડી આવ્યા હતા. સ્થાનિક રાહદારીઓએ ભારે જહેમત બાદ કેનાલમાંથી બે યુવાનોને હેમખેમ બહાર કાઢી લીધા હતા અને તેમનો જીવ બચાવ્યો હતો. જોકે, બંને મિત્રોને બચાવવા માટે પાણીમાં કૂદેલો ૧૮ વર્ષીય યુવાન વીર દિનેશજી ઠાકોર (Vir Dineshji Thakor) ઊંડા પાણીમાં ગરકાવ થઈ ગયો હતો અને ડૂબી જવાથી તેનું ઘટનાસ્થળે જ કમકમાટીભર્યું મોત નીપજ્યું હતું.

ડભોડા પોલીસે શરૂ કરી તપાસ

આ ચકચારી ઘટનાની જાણ થતાં જ સ્થાનિક પોલીસ કાફલો ઘટનાસ્થળે દોડી આવ્યો હતો. ડભોડા પોલીસે (Dabhoda Police) આ મામલે અકસ્માત મોતનો ગુનો નોંધીને કાયદેસરની કાર્યવાહી હાથ ધરી છે. પોલીસે યુવાનના મૃતદેહને પોસ્ટમોર્ટમ (Post-Mortem) અર્થે ખસેડીને આ સમગ્ર મામલે આગળની તપાસ શરૂ કરી છે. આ ઘટનાને પગલે મૃતક યુવાનના પરિવારમાં ભારે શોકનું મોજું ફરી વળ્યું છે.

આ પણ વાંચો: Ahmedabad માં પ્રેમ લગ્નનો કરૂણ અંજામ: 19 વર્ષની યુવતીએ બીજા માળેથી કૂદી કર્યો આપઘાત