Gandhinagar NEWS : રમશે ગુજરાત, જીતશે વિશ્વ’: ‘શક્તિદૂત 2.0’થી યુવા રમતવીરોના સ્વપ્નોને મળી નવી પાંખો
ગુજરાત સરકારે ‘શક્તિદૂત 2.0’ યોજનાનો શુભારંભ કર્યો છે, જેના હેઠળ ખેલાડીઓને રૂ. 50 લાખ સુધીની આર્થિક સહાય અને દિવ્યાંગ રમતવીરોને સમાન તક મળશે. જાણો યોજનાની નવી જોગવાઈઓ, પાત્રતા અને રૂ. 388 કરોડના વિકાસકાર્યો વિશે.
Share
Next »
Advertisement
Gandhinagar NEWS : ગુજરાત સરકારે ‘શક્તિદૂત 2.0’ યોજનાનો શુભારંભ કર્યો છે, જેના હેઠળ ખેલાડીઓને રૂ. 50 લાખ સુધીની આર્થિક સહાય અને દિવ્યાંગ રમતવીરોને સમાન તક મળશે. જાણો યોજનાની નવી જોગવાઈઓ, પાત્રતા અને રૂ. 388 કરોડના વિકાસકાર્યો વિશે.
Gandhinagar NEWS : ગુજરાત રાજ્ય રમતગમત ક્ષેત્રે નવી ઊંચાઈઓ આંબવા અને વૈશ્વિક મંચ પર પોતાની મજબૂત ઓળખ બનાવવા તરફ આગળ વધી રહ્યું છે. ‘રમશે ગુજરાત, જીતશે ગુજરાત’ના પ્રેરણાદાયી ધ્યેય મંત્ર સાથે મુખ્યમંત્રી શ્રી ભૂપેન્દ્ર પટેલના માર્ગદર્શન અને નાયબ મુખ્યમંત્રી હર્ષ સંઘવી (Harsh Sanghavi)ના નેતૃત્વ હેઠળ ગુજરાત સરકારે ‘શક્તિદૂત યોજના’માં યુગપરિવર્તક સુધારા કરીને ‘શક્તિદૂત 2.0’ અમલી બનાવી છે. મહાત્મા મંદિર, ગાંધીનગર(Mahatma mandir) ખાતેથી આ યોજનાનો રાજ્યવ્યાપી પ્રારંભ થવા જઈ રહ્યો છે, જે ગુજરાતના આશાસ્પદ રમતવીરોને આંતરરાષ્ટ્રીય કક્ષાના ચેમ્પિયન બનાવવાની દિશામાં એક ઐતિહાસિક અને આશાસ્પદ પગલું છે.
'શક્તિદૂત 2.0' ની ક્રાંતિકારી વિશેષતાઓ
નવી ‘શક્તિદૂત 2.0’ યોજના ખેલાડીઓને સર્વગ્રાહી પીઠબળ પૂરું પાડીને ઓલિમ્પિક્સ અને એશિયન ગેમ્સ જેવા વૈશ્વિક મંચ માટે તૈયાર કરશે:
- આર્થિક સહાયમાં બમણો વધારો: ખેલાડીઓની જરૂરિયાત અને ઉત્કૃષ્ટ પ્રદર્શનના આધારે આર્થિક સહાય રૂ. 25 લાખથી વધારીને રૂ. 50 લાખ સુધી કરવામાં આવી છે.
- દિવ્યાંગ ખેલાડીઓ માટે સમાન તક: પેરા, ડેફ, બ્લાઈન્ડ અને અન્ય દિવ્યાંગ ખેલાડીઓ(Disabled player)ને પણ યોજના અંતર્ગત સમાન તક અને રૂ. 50 લાખ સુધીની સમાન સહાય પૂરી પાડવામાં આવશે.
- Grassroots Level થી પ્રતિભા શોધો: અરજી માટેની લઘુત્તમ વયમર્યાદા 12 થી 20 વર્ષથી ઘટાડીને 9 વર્ષથી ઉપર કરવામાં આવી છે, જેથી ખૂબ નાની ઉંમરથી જ શ્રેષ્ઠ પ્રતિભાઓની પસંદગી થઈ શકે.
- સતત અને પ્રોત્સાહક સહાય: નિશ્ચિત સમયમર્યાદા દૂર કરીને ખેલાડીઓને પ્રદર્શનના આધારે સતત સહાય અપાશે. ઉપરાંત, યોજના બહાર રહીને પણ વર્ષ દરમિયાન શ્રેષ્ઠ પ્રદર્શન કરનાર ખેલાડીઓને 'Shaktidoot B' પહેલ હેઠળ તાત્કાલિક નાણાકીય સહાય મળશે.
- પારદર્શક અને વૈજ્ઞાનિક પસંદગી: સ્ક્રીનિંગ કમિટીમાં રમત નિષ્ણાતોની ભાગીદારી સાથે વૈજ્ઞાનિક પોઈન્ટ આધારિત માર્કિંગ સિસ્ટમ લાગુ કરાઈ છે. ખેલાડીઓ માટે વાર્ષિક અને દ્વિ-વાર્ષિક મૂલ્યાંકન દ્વારા કેટેગરી અપગ્રેડ કરવાની પારદર્શક વ્યવસ્થા બનાવાઈ છે.
- લાભાર્થીઓની સંખ્યામાં વધારો: હાલમાં નોંધાયેલા 64 ખેલાડીઓ ઉપરાંત તબક્કાવાર રીતે ખેલાડીઓની પ્રતિભા મુજબ લાભાર્થીઓની સંખ્યા વધારવામાં આવશે.
માળખાકીય સુવિધાઓનું વિરાટ આયોજન અને સન્માન
રમતગમત ક્ષેત્રના સર્વાંગી વિકાસ માટે રાજ્ય સરકાર દ્વારા વિરાટ આયોજન કરવામાં આવ્યું છે:
- ખેલાડીઓનું સન્માન: 799 પ્રતિભાશાળી ખેલાડીઓને એકલવ્ય એવોર્ડ, સરદાર પટેલ એવોર્ડ અને જયદિપસિંહજી એવોર્ડથી નવાજવામાં આવશે.
- રૂ. 388 કરોડથી વધુના વિકાસકાર્યો: રાજ્યના વિવિધ જિલ્લાઓમાં તાલુકા કક્ષાના 11 રમત સંકુલ, 07 લાયબ્રેરી, 02 સ્ટડી હોલ તેમજ જિલ્લા કક્ષાના 07 રમત સંકુલ, 05 લાયબ્રેરી અને 02 નગરપાલિકા લાયબ્રેરીનું ઇ-ભૂમિપૂજન અને ઇ-લોકાર્પણ કરવામાં આવશે.
- વિશ્વસ્તરીય સુવિધાઓ: અમદાવાદ, વડોદરા, કચ્છ, જામનગર સહિતના વિસ્તારોમાં 400 મીટર એથલેટિક સિન્થેટિક ટ્રેક, એસ્ટ્રોટર્ફ હોકી ગ્રાઉન્ડ અને સ્પોર્ટ્સ હોસ્ટેલ જેવી આધુનિક સુવિધાઓ ઉપલબ્ધ કરાવાશે.
સફળતાના આંકડા અને આંતરરાષ્ટ્રીય ગૌરવ
વર્ષ 2015 થી અત્યાર સુધી શક્તિદૂત યોજના હેઠળના ખેલાડીઓએ રાષ્ટ્રીય કક્ષાએ 831 અને આંતરરાષ્ટ્રીય કક્ષાએ 773 મળીને કુલ 1,604 મેડલ જીતીને રાજ્યનું નામ રોશન કર્યું છે.
- ઓલિમ્પિક્સ: ટોક્યો ઓલિમ્પિક્સ 2021 માં 3 ખેલાડીઓ અને પેરિસ ઓલિમ્પિક્સ 2024 માં 3 ખેલાડીઓએ દેશનું પ્રતિનિધિત્વ કર્યું.
- એશિયન ગેમ્સ: 17મી એશિયન ગેમ્સ 2014 માં 3, 18મી 2018 માં 7 અને 19મી 2023 માં 7 ખેલાડીઓએ ભાગ લીધો. તાજેતરમાં આઈચી-જાપાન ખાતે યોજાનાર 20મી એશિયન ગેમ્સ 2026 માટે શક્તિદૂત યોજનાના 09 ખેલાડીઓ પસંદગી પામ્યા છે.
- કોમનવેલ્થ ગેમ્સ-Commonwealth Games: 20મા (2014), 21મા (2018), 22મા (2022) તેમજ ગ્લાસગોવ-સ્કોટલેન્ડ ખાતે યોજાયેલી 23મી કોમનવેલ્થ ગેમ્સ 2026 માં પણ ખેલાડીઓએ દેશનું નેતૃત્વ કર્યું છે.
‘શક્તિદૂત 2.0’ યોજના એ માત્ર એક સરકારી કલ્યાણકારી યોજના નથી, પરંતુ ગુજરાતના યુવા રમતવીરોના સપનાઓને પાંખો આપતું એક સશક્ત આશાસ્પદ અભિયાન છે. 9 વર્ષની નાની વયથી પ્રતિભાને ઓળખીને રૂ. 50 લાખ સુધીની આર્થિક છત્રછાયા, વૈજ્ઞાનિક તાલીમ, નિષ્ણાંત કોચિંગ અને પૌષ્ટિક આહાર પૂરો પાડવાનો આ વિચાર ગુજરાતને દેશનું સ્પોટીંગ હબ બનાવશે. આગામી સમયમાં ઓલિમ્પિક્સ અને આંતરરાષ્ટ્રીય રમતોમાં ગુજરાતના ખેલાડીઓ ભારત માટે ગોલ્ડ મેડલ જીતીને વિશ્વમંચ પર દેશનો તિરંગો સૌથી ઊંચો લહેરાવશે તેમાં કોઈ શંકા નથી.
Advertisement