Gujarat Farmer Protest News: 250થી વધુ ટ્રેક્ટરો સાથે ગુજરાતના ખેડૂતો નીકળ્યા ગાંધીનગર તરફ, મહિલા ખેડૂતો પણ મેદાનમાં, શું છે મુખ્ય માંગણીઓ?

અમદાવાદ

શાંતિપુરા સર્કલ ખાતે ખેડૂતોનું મહા-જમાવડું જોવા મળી રહ્યું છે. વિરમગામ, બેચરાજી, વિઠલાપુર અને દેત્રોજ વિસ્તારના ખેડૂતો ટ્રેક્ટરો સાથે અહીં પહોંચ્યા છે. વિરમગામના સોકલી ગામે રાત્રિ રોકાણ બાદ આ રેલી આગળ વધી રહી છે. શાંતિપુરા ખાતે અંદાજે ૨૫૦થી વધુ ટ્રેક્ટરો એકત્રિત થયા છે. કાયદો અને વ્યવસ્થાની સ્થિતિ જળવાઈ રહે તે માટે1 DCP, 1ACP, 5 PI, 11 PSI સહિત કુલ 188 પોલીસકર્મીઓનો કાફલો બંદોબસ્તમાં તૈનાત કરવામાં આવ્યો છે.

મોરબી

મોરબીના જેતપર ગામની 150 જેટલી મહિલા ખેડૂતો વીજપોલના વળતર અંગેના પોતાના હકની લડાઈ માટે આક્રમક વલણ અપનાવી મોડી રાત્રે ગાંધીનગર જવા રવાના થઈ છે. પોતાની માગણીઓ પ્રત્યે સરકારનું ધ્યાન દોરવા માટે આ મહિલાઓએ અત્યંત જુસ્સા સાથે 'નારી શક્તિ ઝિંદાબાદ'ના નારા લગાવીને વિશાળ ટ્રેક્ટર રેલીમાં જોડાવા માટે પ્રયાણ કર્યું છે. હક અને ન્યાયની આ લડાઈમાં મોરબીની નારી શક્તિનું આ ઐતિહાસિક પગલું ખેડૂત આંદોલનને વધુ વેગવંતુ બનાવી રહ્યું છે, અને તેઓ પોતાની ઉગ્ર માંગ સાથે ગાંધીનગર પહોંચીને અવાજ બુલંદ કરવા માટે મક્કમ છે.

વિરમગામ

આ ઉપરાંત, મોરબીના અણીયારી ગામથી નીકળેલી ખેડૂતોની રેલી પણ મોટી સંખ્યામાં ટ્રેક્ટરો સાથે વિરમગામ થઈને મુખ્ય આંદોલનમાં જોડાઈ છે, જેનાથી ખેડૂત એકતાનું મોટું શક્તિ પ્રદર્શન જોવા મળી રહ્યું છે.

કચ્છ

ગાંધીનગર કૂચમાં જોડાવા માટે કચ્છના વિવિધ તાલુકાઓમાંથી ખેડૂતો રવાના થયા છે. વાંઢીયા ગામના ખેડૂતોએ ટ્રેક્ટરો પર પોતાની માંગણીઓના બેનરો લગાવીને આ રેલીમાં ઉત્સાહપૂર્વક ભાગ લીધો છે. યુવા ખેડૂતોની મોટી સંખ્યામાં ઉપસ્થિતિએ આંદોલનને વધુ વેગ આપ્યો છે.

આ પણ વાંચો:  Gujarat News Today: આજે 15 જૂન 2026 ના દિવસે શું થશે ગુજરાતમાં?