ફરાળી લોટથી ઘી-દૂધ સુધી સઘન તપાસ
આરોગ્ય વિભાગ અને ખોરાક તથા ઔષધ નિયમન તંત્ર દ્વારા સમગ્ર ગુજરાતમાં ખાદ્યસામગ્રીનું ચેકિંગ હાથ ધરવામાં આવી રહ્યું છે. સ્થળ પર દરોડા પાડી ફરાળી લોટ, માવો, પનીર, ઘી અને દૂધ સહિતની વસ્તુઓના નમૂના લેવામાં આવી રહ્યા છે. તપાસ દરમિયાન નકલી અથવા ભેળસેળયુક્ત જથ્થો મળી આવે તો તેને જપ્ત કરીને જવાબદાર સામે કાયદેસરની કાર્યવાહી કરવામાં આવી રહી છે.
‘પૂજા માટેનું ઘી’ ખરીદતા પહેલાં સાવધાન
આરોગ્ય મંત્રી પ્રફુલભાઈ પાનશેરીયાએ ખાસ કરીને ‘પૂજા માટેનું ઘી’ ખરીદતા નાગરિકોને સાવચેત રહેવાની અપીલ કરી છે. તેમણે જણાવ્યું કે શ્રદ્ધાના કારણે લોકો માત્ર ‘પૂજા માટેનું ઘી’ લખેલું લેબલ જોઈને ઉત્પાદન ખરીદી લેતા હોય છે, પરંતુ કેટલાક કિસ્સામાં આવા ઘીમાં ભેળસેળ હોવાની શક્યતા રહે છે. તેથી આવા બનાવટી ઘીથી દૂર રહેવું જોઈએ.
સસ્તું દૂધ-ઘી મળે તો સાવધાન
મંત્રીએ નાગરિકોને અપીલ કરી છે કે નાગરિકોએ શક્ય હોય ત્યાં સુધી ખાવાની વસ્તુઓ ઘરે જ બનાવવી જોઈએ અથવા કોઈ પ્રમાણિક વ્યક્તિ, માન્ય કંપની કે ગૃહ ઉદ્યોગ પાસેથી જ ખરીદવી જોઈએ. તેમણે ચેતવણી આપતાં ઉમેર્યું હતું કે, વધુ નફો કમાવાની લાલચમાં જો કોઈ વેપારી ખાદ્ય સામગ્રીમાં ભેળસેળ કરશે, તો રાજ્ય સરકાર તેની સામે કડકમાં કડક કાનૂની પગલાં ભરશે.
નકલી ડેરી પ્રોડક્ટ્સ સામે પણ કાર્યવાહી
આરોગ્ય વિભાગની ટીમો આગામી સમયમાં પણ અનધિકૃત અને બનાવટી ડેરી પ્રોડક્ટ્સનું ઉત્પાદન કે વેચાણ કરતા એકમો સામે સઘન ચેકિંગ ચાલુ રાખશે. અનાલોગ પનીર, ચીઝ, માવો અને બટર જેવા ઉત્પાદનોનું ગેરકાયદેસર ઉત્પાદન કે વેચાણ કરનારાઓ સામે કાયદેસરની કાર્યવાહી કરવામાં આવશે.
‘ભેળસેળ મુક્ત ગુજરાત’ માટે નાગરિકોને અપીલ
આરોગ્ય મંત્રીએ ‘ભેળસેળ મુક્ત ગુજરાત’ અભિયાનમાં નાગરિકોને પણ જાગૃત થવા અપીલ કરી છે. સરકારની કાર્યવાહી સાથે લોકો પણ ખરીદી વખતે સાવચેતી રાખે અને શંકાસ્પદ ખાદ્યસામગ્રીથી દૂર રહે તે જરૂરી હોવાનું તેમણે જણાવ્યું. ભેળસેળ સામે જાગૃતિ ફેલાવવામાં મીડિયા દ્વારા કરવામાં આવી રહેલી કામગીરીને પણ તેમણે બિરદાવી હતી.
આ પણ વાંચોઃ Food Delivery Summit: અમદાવાદમાં ફૂડ ડિલિવરી સમિટ યોજાઈ, રોજગારી મુદ્દે DyCM એ શું કહ્યું? જાણો
