પરિસ્થિતિ પર સતત નજર રાખવા માટે ગાંધીનગર (Gandhinagar) ખાતે આવેલા સ્ટેટ ડિઝાસ્ટર ઇમરજન્સી ઓપરેશન સેન્ટર ખાતેથી તમામ જિલ્લાઓનું મોનિટરિંગ (Monitoring) કરવામાં આવી રહ્યું છે. સ્ટેટ કંટ્રોલ રૂમ ખાતેથી તમામ જિલ્લા તંત્ર અને સ્થાનિક વહીવટી તંત્ર સાથે સતત સંપર્ક જાળવવામાં આવી રહ્યો છે.
![]()
અંબિકા અને ડોલવણમાં આકાશી આફત: સૌથી વધુ વરસાદ ક્યાં નોંધાયો?
દક્ષિણ ગુજરાત (South Gujarat) અને સૌરાષ્ટ્રના (Saurashtra) વિસ્તારોમાં વરસાદનું જોર સૌથી વધુ જોવા મળ્યું છે. આંકડાકીય માહિતી અનુસાર, અંબિકા તાલુકામાં (Ambika Taluka) સૌથી વધુ સાડા 22 ઇંચ વરસાદ નોંધાયો છે, જ્યારે ડોલવણમાં (Dolvan) 17 ઇંચ જેટલો ભારે વરસાદ ખાબક્યો છે.
![]()
અંબિકા તાલુકો: સૌથી વધુ સાડા 22 ઇંચ વરસાદ નોંધાયો છે.
ડોલવણ: 17 ઇંચ જેટલો ભારે વરસાદ ખાબક્યો છે.
વાંસદા: 16 ઇંચ વરસાદ નોંધાયો છે.
નડિયાદ: 14 ઇંચ વરસાદ પડ્યો છે.
લખતર: સવારે 6 થી 10 વાગ્યા સુધીના 4 કલાકમાં જ સાડા 4 ઇંચ વરસાદ નોંધાયો હતો.
વઢવાણ અને તિલકવાડા: 4-4 ઇંચ વરસાદ નોંધાયો છે.
આ ભારે વરસાદના કારણે નદી-નાળાઓ છલકાઈ ગયા છે અને સ્થાનિક રસ્તાઓ પર જળબંબાકારની સ્થિતિ સર્જાઈ છે.
જળાશયો અને ડેમની સ્થિતિ: 22 ડેમ હાઇ એલર્ટ પર
રાજ્યમાં સતત થઈ રહેલા વરસાદને કારણે જળાશયોમાં વિપુલ પ્રમાણમાં નવા નીરની આવક થઈ છે.
સરદાર સરોવર ડેમ: નર્મદા નદી પર આવેલો નર્મદા ડેમ 74.46 ટકા સુધી ભરાઈ ગયો છે.
કુલ જળાશયો: રાજ્યના 206 જળાશયોમાં સરેરાશ 49.19 ટકા જળસંગ્રહ (Water Storage) થયો છે.
હાઇ એલર્ટ અને એલર્ટ: રાજ્યના 22 ડેમ હાઇ એલર્ટ (High Alert) પર મૂકવામાં આવ્યા છે, જ્યારે 8 ડેમ એલર્ટ (Alert) પર છે.
જળાશયોમાંથી પાણી છોડવામાં આવતાં હેઠવાસના ગામડોઓને સાવચેત રહેવા સૂચના આપી દેવામાં આવી છે.
![]()
રાહત અને બચાવ કામગીરી: NDRF અને SDRF ની ટીમો તૈનાત
મુખ્યમંત્રી અને મહેસૂલ વિભાગના ઉચ્ચ અધિકારીઓએ ડિઝાસ્ટર મેનેજમેન્ટ (Disaster Management) ટીમ સાથે ઉચ્ચ સ્તરીય બેઠક યોજી હતી. રાજ્યમાં નેશનલ ડિઝાસ્ટર રિસ્પોન્સ ફોર્સની 17 ટીમો જુદા જુદા વિસ્તારોમાં તૈનાત છે. સ્ટેટ ડિઝાસ્ટર રિસ્પોન્સ ફોર્સ (SDRF) ની 33 ટીમો સુરક્ષા અને બચાવ કામગીરી માટે સુસજ્જ રાખવામાં આવી છે. ભારતીય આર્મીની 6 કોલમ અને ભારતીય વાયુસેનાને (Indian Air Force) સ્ટેન્ડબાય (Standby) રાખવામાં આવી છે જેથી કટોકટીના સમયે હવાઈ રેસ્ક્યૂ કરી શકાય. સ્થળાંતરની કામગીરી હેઠળ અત્યાર સુધીમાં હજારો લોકોને સલામત સ્થળે ખસેડવામાં આવ્યા છે.
વાહન વ્યવહાર અને એસ.ટી. બસ રૂટ પર અસર
ભારે વરસાદ અને રસ્તાઓ પર પાણી ભરાવાને કારણે વાહનવ્યવહાર (Transportation) પર માઠા સમાચાર આવ્યા છે. રાજ્યમાં 193 એસ.ટી. બસ રૂટ (ST Bus Routes) અને 857 ટ્રિપ પ્રભાવિત થઈ છે. જિલ્લા કલેક્ટરોને પોતાના વિવેકાધીન નિર્ણય લઈને શાળા-કોલેજોમાં રજા જાહેર કરવા અને જરૂર પડે ત્યાં ત્વરિત સ્થળાંતર કરવાની સત્તા આપવામાં આવી છે.
હવામાન વિભાગની (IMD) આગાહી મુજબ આગામી કલાકોમાં પણ કેટલાક વિસ્તારોમાં ભારેથી અતિભારે વરસાદની (Heavy to Very Heavy Rain) સંભાવના વ્યક્ત કરવામાં આવી છે, જેને પગલે સમગ્ર સરકારી તંત્ર સંપૂર્ણ રીતે એલર્ટ મોડ પર છે.
![]()
સુરતમાં અનરાધાર વરસાદ: NDRF અને તંત્રનું રેસ્ક્યુ ઓપરેશન
સુરત (Surat) માં સતત વરસી રહેલા અનરાધાર વરસાદના કારણે જનજીવન પ્રભાવિત થયું છે. જિલ્લા કલેક્ટરના માર્ગદર્શન હેઠળ આપત્તિ વ્યવસ્થાપન સેલ, સિવિલ ડિફેન્સ (Civil Defence), પોલીસ અને એનડીઆરએફ (NDRF) ની ટીમો દ્વારા યુદ્ધના ધોરણે રાહત અને બચાવ કામગીરી શરૂ કરવામાં આવી છે. અબ્રામા (Abrama), વેલંજા (Velanja), અમરોલી (Amroli), ઉમરા (Umra) અને કઠોર (Kathor) ના નીચાણવાળા વિસ્તારોમાંથી 240થી વધુ નાગરિકોનું સુરક્ષિત સ્થાનાંતર કરવામાં આવ્યું છે. સ્થળાંતરિત થયેલા લોકોને વેલંજા પ્રાથમિક શાળા ખાતેના રિલીફ સેન્ટર (Relief Centre) માં ખસેડાયા છે, જ્યાં ભોજન, પીવાનું પાણી અને આરોગ્ય સુવિધાઓ ઉપલબ્ધ કરાવવામાં આવી છે.
વરાછામાં રિવર સાઇડ રોડ ધસી પડ્યો
મોટા વરાછા ખાતે સવજી કોરાટ બ્રિજ નજીક તાપી નદી (Tapi River) ના રિવર સાઇડ રોડ પર 40 મીટર જેટલી જમીન ધસી પડતાં (Landslide) તાત્કાલિક બેરિકેડિંગ કરવામાં આવ્યું છે. તંત્ર દ્વારા સમયસૂચકતા વાપરીને 250 થી 300 જેટલા વાહનોને સુરક્ષિત રીતે વૈકલ્પિક માર્ગે ડાયવર્ટ કરવામાં આવ્યા છે.
વડોદરા અને સ્ટેચ્યૂ ઓફ યુનિટી માર્ગ પર પાણી ભરાયા
વડોદરા (Vadodara) જિલ્લાના ડભોઇ (Dabhoi) તાલુકામાં ઢાઢર નદી (Dhadhar River) ના નીર વધતાં રાજલી (Rajli) અને બહેરામપુરા (Behrampura) માંથી 79 ગ્રામજનોને સ્થાનિક શાળામાં આશ્રય આપવામાં આવ્યો છે. રાજલી પાસે વડોદરા-ડભોઈ માર્ગ પર પાણી ફરી વળતાં વાહનવ્યવહાર બંધ કરી દેવાયો છે. સ્ટેચ્યૂ ઓફ યુનિટી (Statue of Unity) તરફ જતા પ્રવાસીઓને તકેદારી રાખવા અપીલ કરવામાં આવી છે.
મોરબીમાં મચ્છુ-2 ડેમના 4 દરવાજા ખોલાયા: 32 ગામોને હાઈ એલર્ટ
મોરબી (Morbi) નો મચ્છુ-2 ડેમ (Machchhu-2 Dam) 100% ભરાઈ જતાં બપોરે 12 વાગ્યે 4 દરવાજા 6 ફૂટ ખોલીને 14,058 ક્યુસેક પાણી નદીમાં છોડવામાં આવ્યું છે. આ પગલે મોરબી શહેર અને માળિયા (Maliya) તાલુકાના મળીને કુલ 32 ગામોને અત્યંત સાવચેતીનું હાઈ એલર્ટ આપવામાં આવ્યું છે. આ ઉપરાંત ઘોડાધ્રોઈ ડેમ (Ghodadhroi Dam) માંથી પાણી છોડાતા જીકીયારી કોઝવે બંધ કરાયો છે તથા હળવદ-સરા રોડ પણ વાહનવ્યવહાર માટે બંધ કરવામાં આવ્યો છે.
સુરેન્દ્રનગરમાં ધોળીધજા ડેમ ઓવરફ્લો
સુરેન્દ્રનગરની જીવાદોરી સમાન વઢવાણ ભોગાવો-2 ઓવરફ્લો થતાં વઢવાણ સીટી, જોરાવરનગર, રતનપર અને આસપાસના 11થી વધુ નીચાણવાળા ગામોના નાગરિકોને નદીકાંઠે ન જવા અને સતર્ક રહેવા તંત્ર દ્વારા કડક સૂચના આપવામાં આવી છે.
આ પણ વાંચો: Ahmedabad Ground Report: બોપલ અને ચાંદલોડિયા બન્યા બેટ, ઘૂંટણસમા પાણીમાં ભક્તો દર્શને મજબૂર!
