Gujarat Monsoon 2026: આ વર્ષે ચોમાસાનો કેવો રહેશે મિજાજ? જાણો શું કહે છે હવામાનનો વરતારો

ગુજરાતમાં ચોમાસાની આગાહી (Gujarat Monsoon Forecast) નો વરતારો

રાજ્યમાં હાલ ગરમી અને વાતાવરણમાં પલટાની બેવડી અસર જોવા મળી રહી છે. જેના કારણે રાજ્યના અનેક વિસ્તારોમાં કમોસમી વરસાદને કારણે ખેડૂતો ચિંતિત બન્યા છે તેવામાં હવે હવામાન નિષ્ણાત અંબાલાલ પટેલ અને હવામાન એજન્સી સ્કાયમેટ (Skymet) દ્વારા વર્ષ 2026 ના ચોમાસાને લઈને પણ મહત્વની આગાહી કરવામા આવી છે.

આગામી 48 કલાક માટેની ચેતવણી

ઉત્તર ભારત તરફથી સક્રિય થયેલા વાદળોના કારણે ગુજરાતમાં આગામી બે દિવસ વરસાદી માહોલ રહેશે. ખાસ કરીને બનાસકાંઠા, કચ્છ અને ઉત્તર ગુજરાતના વિસ્તારોમાં તેજ પવન સાથે વરસાદની શક્યતા છે. મધ્ય ગુજરાતમાં પણ અડધો ઈંચ જેટલો વરસાદ પડી શકે છે, જ્યારે અમુક સ્થળોએ કરા પડવાની પણ સંભાવના છે.

ગુજરાત પર ત્રણ અલગ-અલગ સિસ્ટમ્સ સક્રિય

હાલમાં ગુજરાત પર ત્રણ અલગ-અલગ સિસ્ટમ્સ (વેસ્ટર્ન ડિસ્ટર્બન્સ અને બે સાયક્લોનિક સર્ક્યુલેશન) એકસાથે સક્રિય થઈ છે. આ કારણોસર કચ્છ, સાબરકાંઠા, પાટણ, મહેસાણા, રાજકોટ અને જામનગર જેવા જિલ્લાઓમાં ગાજવીજ સાથે વરસાદ પડી શકે છે. પવનની ગતિ 40 કિમી/કલાક સુધી રહેવાની શક્યતા હોવાથી માછીમારોને દરિયો ન ખેડવા સૂચના અપાઈ છે.

વર્ષ 2026 ના ચોમાસાનો અંદાજ

ખાનગી હવામાન એજન્સી સ્કાયમેટના જણાવ્યા મુજબ, આ વર્ષે દેશમાં સરેરાશ વરસાદ સામાન્ય કરતા ઓછો (94%) રહેવાની ધારણા છે. જૂન મહિનામાં શરૂઆત સારી રહેશે, પરંતુ જુલાઈથી સપ્ટેમ્બર દરમિયાન 'અલ નીનો'ની અસરને કારણે વરસાદનું પ્રમાણ ઘટવાની શક્યતા છે. ઓગસ્ટ અને સપ્ટેમ્બરમાં વરસાદ ખેંચાઈ શકે છે.

તાપમાનમાં ફેરફાર

આ વરસાદી માહોલ અને માવઠાની અસર ઓછી થયા બાદ, આગામી 48 કલાક પછી આકાશ ચોખ્ખું થશે. જેના પરિણામે તાપમાનમાં ફરી 2 થી 4 ડિગ્રીનો વધારો નોંધાશે અને રાજ્યના લોકોને ફરી કાળઝાળ ગરમીનો સામનો કરવો પડશે. ખેડૂતોને ખાસ કરીને તૈયાર પાક અને ડુંગળી જેવા ખેત ઉત્પાદનોને સુરક્ષિત રાખવા સલાહ આપવામાં આવી છે.

આ પણ વાંચો : Studio on Wheels: કેવી રીતે એક ડોક્ટર બન્યા ગુજરાતના જાંબાઝ IPS ઓફિસર? જાણો SP Dr. Parthrajsinh Gohil ની સફર