Gujarat News Today : રાજ્યભરમાં આજે સ્વતંત્રતા પર્વની ઉજવણીના ભાગરૂપે વિવિધ જિલ્લાઓમાં તિરંગા યાત્રા અને સાંસ્કૃતિક કાર્યક્રમોનું આયોજન કરવામાં આવ્યું છે, જેમાં મુખ્યમંત્રી સહિત મંત્રીમંડળના સભ્યો ઉપસ્થિત રહેશે. બીજી તરફ, સ્થાનિક સ્વરાજ્યની ચૂંટણીની તૈયારીઓ, પ્રજાકીય પ્રશ્નો અને આદિવાસી જમીન વિવાદને લઈને રાજકીય ગરમાવો જોવા મળી રહ્યો છે. આ ઉપરાંત અસહ્ય ફી વધારો, બિસ્માર રસ્તાઓ અને ટ્રેન સ્ટોપેજ જેવા જનહિતના મુદ્દાઓ પણ આજે રાજ્યભરમાં ચર્ચાના કેન્દ્રસ્થાને રહ્યા છે.
ગાંધીનગર: મનપા ચૂંટણીની તૈયારીઓ વેગવંતી
ગાંધીનગર મહાનગરપાલિકાની સામાન્ય ચૂંટણી ઓક્ટોબરના ત્રીજા સપ્તાહમાં પૂર્ણ થવાની હોવાથી ચૂંટણી તંત્ર દ્વારા 11 વોર્ડની કુલ 44 બેઠકો માટેની કામગીરી ઝડપી બનાવવામાં આવી છે. રાજકીય પક્ષોમાં સંભવિત ઉમેદવારોની પસંદગી અને વોર્ડવાઈઝ સમીકરણો અંગે આંતરિક મંથન શરૂ થઈ ગયું છે. આ પ્રક્રિયાના ભાગરૂપે આજે શુક્રવારે, 14 ઓગસ્ટે ગાંધીનગર મનપા વિસ્તારની પ્રાથમિક મતદારયાદી પ્રસિદ્ધ કરવામાં આવશે.
અમદાવાદ: શિક્ષણ અને શાળા વિવાદ
શાળામાં વાંધાજનક વસ્તુ અને પુસ્તક વિવાદ: શીલજ વિસ્તારની આનંદનિકેતન સ્કૂલમાં નાસ્તામાંથી કાચ નીકળવા અને વાંધાજનક પુસ્તકના મુદ્દે વાલીઓ અને વિદ્યાર્થી સંગઠનોમાં ભારે રોષ જોવા મળ્યો હતો. બે દિવસ શાળા બંધ રહ્યા બાદ આજે શાળા પ્રત્યક્ષ રીતે પુનઃ શરૂ થઈ રહી છે, જ્યાં સુરક્ષા અને માહોલ પર ખાસ નજર રાખવામાં આવી રહી છે.
નિરમા યુનિવર્સિટી ફી વધારા વિરોધ: નિરમા યુનિવર્સિટીમાં પ્રોફેશનલ કોર્સિસમાં વસૂલવામાં આવતી બેફામ ફી સામે NSUI અને વિદ્યાર્થી સંગઠનોએ વાંધો ઉઠાવી શિક્ષણ વિભાગને રજૂઆત કરી છે.
જામનગર: ભવ્ય તિરંગા યાત્રા
જામનગરમાં આજે પ્રભારી અને વન મંત્રી અર્જુન મોઢવાડિયાની આગેવાનીમાં ભવ્ય તિરંગા યાત્રા યોજાશે. આ યાત્રામાં મંત્રી રિવાબા જાડેજા અને સાંસદ પૂનમબેન માડમ પણ જોડાશે. યાત્રા લાખોટા લેકથી શરૂ થઈને સરદાર પટેલ સ્ટેચ્યુ ખાતે પૂર્ણ થશે.
ભાવનગર: કૂતરા દાદાના મંદિરની ઐતિહાસિક આસ્થા
ભાવનગર જિલ્લાના પાલીતાણા પંથકમાં સોનગઢ-પાલીતાણા રોડ પર આવેલું પૌરાણિક 'કૂતરા દાદાનું મંદિર' આજે પણ ગ્રામ્ય પ્રજા માટે શ્રદ્ધાનું કેન્દ્ર છે. આ મંદિર પાછળ ધોરણ ૭ના હિન્દી વિષયમાં આવતી 'લાખા વણજારા અને તેના વફાદાર કૂતરા'ની જાણીતી કથા જોડાયેલી છે.
નર્મદા: સાગબારા જંગલ જમીન વિવાદ
સાગબારામાં જંગલ જમીન મુદ્દે આદિવાસી ખેડૂતોના ધરણાથી રાજકારણ ગરમાયું છે. ભાજપ અને આપના નેતાઓ બાદ આજે કોંગ્રેસના પ્રદેશ આગેવાનો અમિત ચાવડા અને ધારાસભ્ય અનંત પટેલ ખોપી ગામે પહોંચી આદિવાસીઓના જમીન ખેડાણના અધિકાર માટે સમર્થન જાહેર કરશે.
વલસાડ: મોગરવાડીમાં બિસ્માર રસ્તાથી સ્થાનિકો પરેશાન
વલસાડના મોગરવાડી ખાતે વરસાદના કારણે 2 કિલોમીટર સુધીનો રસ્તો મસમોટા ખાડાઓથી બિસમાર બની ગયો છે. ચોમાસા પહેલા સમારકામ ન થતાં વાહનચાલકો ભારે હાલાકી ભોગવી રહ્યા છે. નગરપાલિકાના ઉપપ્રમુખ આ જ વોર્ડમાં રહેતા હોવા છતાં કામગીરી ન થતાં સ્થાનિકોમાં ભારે રોષ છે.
નવસારી: કર્ણાવતી એક્સપ્રેસને નવસારી સ્ટોપેજ
લાંબા સમયની માંગણી બાદ રેલવે વિભાગ દ્વારા બાંદ્રા-અમદાવાદ કર્ણાવતી સુપરફાસ્ટ એક્સપ્રેસને આજે સાંજે 4:30 વાગ્યાથી નવસારી સ્ટેશન પર સ્ટોપેજ આપવામાં આવશે. આ પ્રસંગે ટ્રેનનું સ્વાગત કરવા કેન્દ્રીય જળશક્તિ મંત્રી સી. આર. પાટીલ ખાસ ઉપસ્થિત રહેશે.
બનાસકાંઠા: પાલનપુર ઓવરબ્રિજ પર પાણી ભરાવાની સમસ્યા
પાલનપુર-અમદાવાદ છાપી હાઈવે પર બનેલો ઓવરબ્રિજ ચોમાસામાં મુશ્કેલીનું કારણ બન્યો છે. સ્ટેટ હાઇવે ઓથોરિટી દ્વારા પાણીના નિકાલની યોગ્ય વ્યવસ્થા ન કરાતાં બ્રિજની બંને સાઈડ ઘૂંટણસમા પાણી ભરાય છે, જેનાથી હજારો વાહનચાલકો અટવાઈ રહ્યા છે.
આણંદ: તિરંગા યાત્રા અને જેલ મુલાકાત
આજે સવારે 10:00 કલાકે નાયબ મુખ્યમંત્રી હર્ષભાઈ સંઘવીની વિશેષ ઉપસ્થિતિમાં આણંદ ખાતે જિલ્લા કક્ષાની ભવ્ય તિરંગા યાત્રા યોજાશે.આ ઉપરાંત, તેઓ આણંદની નવનિર્મિત જિલ્લા સેન્ટ્રલ જેલની પણ મુલાકાત લેશે.
સુરેન્દ્રનગર: ઓનલાઇન આવકના દાખલાથી અરજદારો હેરાન
સિટી મામલતદાર કચેરી ખાતે મેન્યુઅલી મળતા આવકના દાખલા બંધ કરી સમગ્ર પ્રક્રિયા ડિજિટલ પોર્ટલ પર કરાતાં અરજદારોને સાયબર કાફેમાં રૂ. 200 થી 300 નો વધારાનો ખર્ચ કરવો પડી રહ્યો છે. અગાઉની જેમ કચેરીમાંથી રૂ.20 ની સરકારી ફીમાં મેન્યુઅલી દાખલા આપવા માંગ ઉઠી છે.
સાબરકાંઠા: હિંમતનગરમાં તિરંગા યાત્રા
સાબરકાંઠાના મુખ્ય મથક હિંમતનગર ખાતે આજે ભવ્ય તિરંગા યાત્રાનું આયોજન કરવામાં આવ્યું છે**, જેમાં શિક્ષણ મંત્રી પ્રધ્યુમન વાઝા, સ્થાનિક ધારાસભ્યો અને અગ્રણીઓ ઉપસ્થિત રહેશે.
પંચમહાલ: 'વિભાજન વિભીષિકા સ્મૃતિ દિવસ'ની ઉજવણી
દેશના વિભાજનથી પ્રભાવિત લોકોના ત્યાગને શ્રદ્ધાંજલિ આપવા આજે ગોધરાના સરદારનગર ખંડ ખાતે "વિભાજન વિભીષિકા સ્મૃતિ દિવસ" યોજાશે, જેમાં રાજ્યકક્ષાના મંત્રી રમેશભાઈ કટારા મુખ્ય અતિથિ તરીકે હાજર રહેશે.
બોટાદ: મંત્રીની ઉપસ્થિતિમાં તિરંગા યાત્રા
બોટાદ ખાતે આજે બપોરે 4:00 કલાકે મંત્રી રીવાબા જાડેજાની અધ્યક્ષતામાં ભવ્ય તિરંગા યાત્રા યોજાશે.
સુરત: ઉમરપાડામાં જમીન ખેડાણ મુદ્દે આક્રોશ
ઉમરપાડાના જંગલ ખેડાણ મુદ્દે આજે સ્થાનિક આદિવાસીઓ મોટી સંખ્યામાં એકઠા થઈ નર્મદા જિલ્લાથી જમીન ખેડવા આવતા લોકો સામે વિરોધ નોંધાવશે અને મામલતદારને આવેદનપત્ર આપી કડક કાર્યવાહીની માંગ કરશે.
અમરેલી: રાજ્યકક્ષાના સ્વાતંત્ર્ય પર્વની ઉજવણી, CM ઉપસ્થિત રહેશે
અમરેલી ખાતે રાજ્યકક્ષાના સ્વાતંત્ર્ય પર્વની ઉજવણી નિમિત્તે મુખ્યમંત્રી ભૂપેન્દ્રભાઈ પટેલ આજે સવારે 11:00 વાગ્યે અમરેલી પહોંચશે. તેઓ નાગનાથ મહાદેવના દર્શન, વૃક્ષારોપણ, શસ્ત્ર પ્રદર્શન, બાઈક રેલી, 'વિભાજન વિભીષિકા સ્મૃતિ દિવસ' કાર્યક્રમ, 'એટ હોમ' અને સાંજે ભવ્ય સાંસ્કૃતિક કાર્યક્રમમાં હાજરી આપશે.
આ પણ વાંચો: Rashifal 14 August 2026 : આ રાશિના જાતકોના અટકાયેલા કાર્યો પૂરા થવાની શક્યતા, જાણો તમારુ રાશિફળ
