Gujarat News Today: આજે 1 જૂન 2026 ના દિવસે શું થશે ગુજરાતમાં?
Gujarat News Today: આજે 1 જૂનથી રાજ્યભરમાં વસ્તી ગણતરી-2027 ના પ્રથમ તબક્કાનો પ્રારંભ થઈ રહ્યો છે. 30 જૂન સુધી ચાલનાર આ ઝુંબેશમાં ઘર-યાદી અને મકાનોની ગણતરી હાથ ધરવામાં આવશે, જેમાં આવાસની સ્થિતિ અને પ્રાથમિક સુવિધાઓ સહિતના ૩૩ પ્રશ્નો પૂછવામાં આવશે. અત્યાર સુધીમાં 3.74 લાખથી વધુ નાગરિકો સ્વ-ગણતરીમાં જોડાયા છે. આ ઉપરાંત, ગિફ્ટ સિટી (GIFT City) ખાતે કરોડોનું પોન્ઝી સ્કીમ કૌભાંડ આચરનાર ઉત્પલ પટેલના મામલે રોકાણકારો આજે પ્રેસ કોન્ફરન્સ કરશે. બીજી તરફ, ગીર અભયારણ્ય (Gir Sanctuary) માં સિંહોના શંકાસ્પદ મૃત્યુના મામલે વન વિભાગ એલર્ટ મોડ પર છે, જેમાં વેક્સિનેશન અને ક્વોરેન્ટાઇન જેવી કામગીરી હાથ ધરવામાં આવી છે. અમદાવાદમાં AUDA દ્વારા પ્રથમ વખત ચોમાસા માટે ખાસ કંટ્રોલ રૂમ પણ કાર્યરત કરવામાં આવશે.
સુરત (Surat)
સુરતના ઘોડદોડ રોડ સ્થિત ઇન્ડોર સ્ટેડિયમ (Indoor Stadium) ખાતે આગામી 5 જૂનના રોજ વડાપ્રધાન નરેન્દ્ર મોદીની ઉપસ્થિતિમાં 18 હજાર કરોડના વિવિધ પ્રકલ્પોનું લોકાર્પણ અને ખાતમુહૂર્ત થનાર છે. આ ભવ્ય કાર્યક્રમની પૂર્વતૈયારીઓ માટે જિલ્લા વહીવટી તંત્ર અને ભાજપ દ્વારા યુદ્ધના ધોરણે કામગીરી શરૂ કરી દેવામાં આવી છે.
રાજકોટ (Rajkot)
રાજકોટમાં બાબા બાગેશ્વરના ધીરેન્દ્ર શાસ્ત્રી સામે સવાલ ઉઠાવનાર પુરુષોત્તમ પીપળિયાને મળેલી ધમકીનો મામલો ગરમાયો છે, જેની વિગતવાર માહિતી આજે જાહેર કરવામાં આવશે. સાથે જ, આજે રાજકોટ શહેરમાં વસ્તી ગણતરીના પ્રારંભને લઈને પણ વહીવટી તંત્ર દ્વારા વિશેષ આયોજન કરવામાં આવ્યું છે, જેમાં ચૂંટણી શાખાના અધિકારીઓ અને ગણતરીદારો દ્વારા કામગીરી શરૂ કરવામાં આવશે.
તાપી (Tapi)
જિલ્લા કોંગ્રેસ દ્વારા આજે સોનગઢ (Songadh) ખાતે મહત્વના મુદ્દાઓને લઈને વિરોધ પ્રદર્શન કરવામાં આવશે. સોનગઢ અને રાણીઆંબા ગામને જોડતો રેલવે ઓવરબ્રિજ તથા દક્ષિણ સોનગઢના ૧૫ ગામોમાં પાણીની સમસ્યાના નિરાકરણ માટે કોંગી આગેવાનો મામલતદારને આવેદનપત્ર પાઠવશે.
આણંદ (Anand)
પર્યાવરણ જાગૃતિના ભાગરૂપે આજે સવારે 10:00 વાગ્યે અજરપુરા (Ajarpura) સ્થિત વંશ ગ્રીન ફાર્મ ખાતે વિશાળ વૃક્ષારોપણ માટે લાખોની સંખ્યામાં સીડ બોમ્બ બનાવવાનું આયોજન કરાયું છે. અમૂલ ડેરી (Amul Dairy) ના હોદ્દેદારો અને ભાજપના અગ્રણીઓ આ અભિયાનમાં સહભાગી થશે. વધુમાં, આજે 'વર્લ્ડ મિલ્ક ડે' (World Milk Day) નિમિત્તે દૂધ વ્યવસાયની વર્તમાન સ્થિતિ અને તેમાં સફળ રહેલી મહિલા પશુપાલકોની પ્રેરણાદાયી ગાથા પણ રજૂ કરવામાં આવશે.
આ પણ વાંચો: Rajkot : સ્પાના નામે ચાલતો દેહવ્યાપાર ઝડપાયો, મેનેજર અને માલિક સામે પોલીસે નોંધી ફરિયાદ