રાજ્યમાં ગુમ થયેલા બાળકો અને પુખ્ત વયના લોકોને શોધીને તેમના પરિવારો સાથે પુનઃમિલન કરાવવા માટે ગુજરાત પોલીસ દ્વારા ચલાવવામાં આવી રહેલી વિશેષ ઝુંબેશને અભૂતપૂર્વ સફળતા મળી છે. ગૃહ રાજ્યમંત્રી શ્રી હર્ષ સંઘવીના નેતૃત્વ હેઠળ શરૂ કરાયેલા ‘ઓપરેશન મિલાપ’ Operation Milapની સફળતા બાદ, આ અભિયાનને વધુ 10 દિવસ માટે લંબાવવામાં આવ્યું હતું. આ લંબાવવામાં આવેલી વિશેષ ઝુંબેશ દરમિયાન ગુજરાત પોલીસે માત્ર 10 દિવસમાં જ 500 ગુમ થયેલા નાગરિકોને શોધી કાઢીને તેમના પરિવારોના જીવનમાં ખુશીઓ પાછી લાવી છે.
Gujarat Police : વડોદરાની સગીરાનું કર્ણાટકથી હેમખેમ રેસ્ક્યુ
આ અભિયાન અંતર્ગત ગુજરાત પોલીસે 1200 કિલોમીટર દૂર કર્ણાટકમાંથી એક 14 વર્ષની સગીર બાળકીને મુક્ત કરાવીને તેના પરિવાર સાથે મિલન કરાવ્યું છે.
ઘટનાની પૃષ્ઠભૂમિ: વડોદરાના છાણી વિસ્તારમાંથી 18 ડિસેમ્બર, 2025 ના રોજ આ બાળકી ગુમ થઈ હતી. સ્થાનિક પોલીસની મહિનાઓની તપાસ બાદ સફળતા ન મળતાં આ કેસ વડોદરા એન્ટી-હ્યુમન ટ્રાફિકિંગ યુનિટ (AHTU)ને સોંપવામાં આવ્યો હતો.
આરોપીની ચાલબાજી: ટેકનિકલ સર્વેલન્સ અને ઈન્ટેલિજન્સ ઈનપુટ્સના આધારે જાણવા મળ્યું કે આરોપી સુનિલકુમાર કેસરીસિંહ બારીયા બાળકીને ફોસલાવીને ભગાડી ગયો હતો. આરોપીએ જયપુરમાં પૂજારીનો કોર્સ કરી પોતાનું નામ બદલી નાખ્યું હતું અને કર્ણાટકના શિવમોગાના એક જૈન મંદિરમાં પૂજારી તરીકે નોકરી શરૂ કરી દીધી હતી. ત્યાં તેણે સગીરાને પોતાની પત્ની તરીકે ઓળખાવી બંધક બનાવી રાખી હતી.
પોલીસનું ઓપરેશન: વડોદરા AHTUની પાંચ સભ્યોની ટીમ (જેમાં એક મહિલા પોલીસ અધિકારી પણ સામેલ હતા) કર્ણાટક પહોંચી હતી. ભારે વરસાદ વચ્ચે સ્થાનિક પોલીસના સહયોગથી બે દિવસ સુધી મંદિર પર વોચ રાખવામાં આવી હતી. ત્રીજા દિવસે સવારે ૪ વાગ્યે આરોપી મંદિરે આવતા જ તેની ધરપકડ કરી લેવાઈ હતી અને તેની પૂછપરછના આધારે બાળકીને સુરક્ષિત બચાવી લેવાઈ હતી.
'ઓપરેશન મિલાપ' ના આંકડા એક નજરે
એડિશનલ ડાયરેક્ટર જનરલ ઓફ પોલીસ (વુમન સેલ, સીઆઈડી ક્રાઈમ-CID Crime) શ્રી અજય ચૌધરીએ જણાવ્યું હતું કે, ૧ મહિનાના સફળ ઓપરેશન બાદ આ ઝુંબેશને12 જૂનથી 21 જૂન દરમિયાન વધુ 10 દિવસ માટે લંબાવવામાં આવી હતી.
"આ લંબાવેલા 10 દિવસના ગાળામાં જ પોલીસે વધુ ૫૦૦ પરિવારોના જીવનનો અંધકાર દૂર કર્યો છે." - અજય ચૌધરી (ADGP)
10 દિવસની લંબાવેલી ઝુંબેશ (૧૨ જૂન - ૨૧ જૂન) દરમિયાન શોધાયેલા નાગરિકો:
| કેટેગરી | સંખ્યા |
| મહિલાઓ | 288 |
| પુરુષો | 103 |
| સગીર બાળકીઓ | 88 |
| સગીર છોકરાઓ | 21 |
| કુલ સફળતા | 500 નાગરિકો |
અગાઉના પ્રથમ તબક્કાની સફળતા (7 મે થી 5 જૂન)
અત્રે ઉલ્લેખનીય છે કે આ પહેલાંના એક મહિનાના ગાળામાં ગુજરાત પોલીસે રાજ્યવ્યાપી ઓપરેશન દરમિયાન 857 મહિલાઓ અને 234 સગીર બાળકીઓ સહિત કુલ 1478 ગુમ થયેલા નાગરિકોને શોધી કાઢ્યા હતા.
ગુજરાત પોલીસની આ ત્વરિત અને સંવેદનશીલ કામગીરીને કારણે અત્યાર સુધીમાં હજારો પરિવારોમાં ફરીથી ખુશીનો માહોલ જોવા મળી રહ્યો છે.
આ પણ વાંચો Gujarat Weather : રાજયમાં ગાજવીજ અને ભારે પવન સાથે વરસાદની આગાહી, હવામાન વિભાગે જાહેર કર્યું નાવ કાસ્ટ બુલેટિન કર્યુ જાહેર
