Gujarat Police ની નવતર પહેલ: રોડ સેફ્ટી માટે સ્વદેશી શક્તિ - MapmyIndia સાથે MoU!

ગુજરાતમાં રોડ સેફ્ટી અને ટ્રાફિક મેનેજમેન્ટની દિશામાં એક ક્રાંતિકારી પગલું ભરવામાં આવ્યું છે. રાજ્યના વાહનચાલકોની સુરક્ષા અને સુવિધાને ધ્યાનમાં રાખીને, ગુજરાત પોલીસે સ્વદેશી નેવિગેશન એપ્લિકેશન મેપલ્સ (MapmyIndia) સાથે એક મહત્વપૂર્ણ સમજૂતી કરાર (MoU) પર હસ્તાક્ષર કર્યા છે. આ પહેલ 'હર ઘર સ્વદેશી, ઘર ઘર સ્વદેશી' અભિયાનના વિચારને વધુ મજબૂત બનાવે છે.

Gujarat Police : સ્વદેશી અપનાવવા પર ભાર: પ્રેરણા અને નેતૃત્વ

આ સમજૂતી પાછળ રાજ્યના નાયબ મુખ્યમંત્રી  હર્ષ સંઘવી (Harsh Sanghavi)ની પ્રેરણા છે, જેમણે તમામ વિભાગોને સ્વદેશી ટેકનોલોજી અપનાવવા પર ભાર મૂક્યો હતો. રાજ્યના પોલીસ વડા શ્રી વિકાસ સહાયના માર્ગદર્શન હેઠળ સ્ટેટ ટ્રાફિક બ્રાન્ચ દ્વારા આ સ્વદેશી એપ સાથે જોડાણ કરીને ટ્રાફિક મેનેજમેન્ટ અને રોડ સેફ્ટી માટે એક વિશેષ ભાગીદારી કરવામાં આવી છે.

Gujarat Police -MapmyIndia માં નાગરિકલક્ષી ખાસ ફિચર્સ અપડેટ

MapmyIndia દ્વારા તેમની મેપલ્સ (Mappls) એપ્લિકેશનમાં નાગરિકોની સુરક્ષા માટે ખાસ સુવિધાઓ વિકસાવવામાં આવી છે. હવે આ એપ માત્ર નેવિગેશન ટૂલ તરીકે જ નહીં, પરંતુ એક વ્યક્તિગત ટ્રાફિક અને સુરક્ષા સલાહકાર તરીકે કામ કરશે.

સુરક્ષા સંબંધિત મહત્વના અપડેટ્સ

• બ્લેક સ્પોટ્સ (Black Spots): રાજ્ય ટ્રાફિક બ્રાન્ચ દ્વારા પૂરા પાડવામાં આવેલા અકસ્માત માટે સંભવિત 'બ્લેક સ્પોટ્સ' અને સંભવિત અકસ્માત ઝોનનો ડેટા હવે એપમાં અપડેટ થઈ ગયો છે. આનાથી વાહનચાલકોને જોખમી વિસ્તારો વિશે અગાઉથી જાણ થઈ જશે.

• સ્પીડ લિમિટ: ડાર્ક રસ્તાઓ પર કોઈ અનિચ્છનીય બનાવ ન બને તે માટે માર્ગો પરની સ્પીડ લિમિટ પણ એપમાં અપડેટ કરવામાં આવી છે.

રિયલ-ટાઇમ ટ્રાફિક એડવાઈઝરી

આ MoUનો સૌથી મોટો ફાયદો છે રીઅલ-ટાઇમ ટ્રાફિક એડવાઈઝરી અપડેટ. ગુજરાત પોલીસ હવે દૈનિક ધોરણે મેપમાયઇન્ડિયાને સચોટ માહિતી પૂરી પાડશે, જેમાં નીચેની બાબતોનો સમાવેશ થાય છે:

• રોડ ક્લોઝર્સ: બંધ કરાયેલા માર્ગો અંગેની માહિતી.

• કન્સ્ટ્રક્શન/રિપેર એક્ટિવિટીઝ: આયોજિત રોડ બાંધકામ કે રિપેરિંગની પ્રવૃત્તિઓ.

• ઈવેન્ટ્સ: રેલીઓ અને અન્ય કાર્યક્રમોને કારણે થનારી ટ્રાફિકની અસર.

આ રિયલ-ટાઇમ અપડેટ્સ મળવાથી નાગરિકો સમયસર વૈકલ્પિક રૂટ પસંદ કરી શકશે, જેનાથી મુસાફરી વધુ અનુકૂળ અને સમયસર બનશે.

 ડેટા અપડેશન કાર્ય શરૂ: તાલીમ અને અમલ

આ MoUને સફળ બનાવવા માટે તમામ જિલ્લાના પોલીસ અધિકારીઓને MapmyIndiaને ઇનપુટ્સ કેવી રીતે આપવા તેની ખાસ તાલીમ આપવામાં આવી છે, અને ડેટા અપડેશનનું કાર્ય પણ શરૂ થઈ ચૂક્યું છે. ગુજરાત પોલીસ સતત MapmyIndia સાથે કાર્ય કરી રહી છે, જેથી વાહનચાલકો માટે શ્રેષ્ઠ અને સચોટ ટ્રાફિક અપડેટ્સ આપી શકાય.

નાગરિકોને અપીલ: સુરક્ષિત મુસાફરી માટે MapmyIndia નો ઉપયોગ કરો

ગુજરાત પોલીસ રાજ્યના નાગરિકોને તેમની મુસાફરી વધુ અનુકૂળ, સુરક્ષિત અને સરળ બનાવવા માટે આ સ્વદેશી એપ્લિકેશન મેપલ્સ (MapmyIndia) નો મહત્તમ ઉપયોગ કરવા માટે અપીલ કરે છે. ટ્રાફિકના સારા મેનેજમેન્ટ અને કસ્ટમાઇઝ્ડ અપડેટ્સ મેળવવા માટે આ એક મહત્વપૂર્ણ પગલું છે.

આ પણ વાંચો :Dahod : દેવગઢ બારીયાનાં અર્શીલ મકરાણીએ ટેકવોન્ડો ચેમ્પિયનશીપમાં જિત્યો ગોલ્ડ મેડલ