હર્ષભાઇ સંઘવીએ કહ્યું- 'વટ પાડી દીધો': વિદ્યાર્થીનીઓની વેપાર સૂઝબૂઝ જોઇ ગૃહમંત્રી પણ ચોંકી ગયા?

ફનફેરમાં મસાલા છાસ વેચી 2 દિવસમાં ₹92,184 ની કમાણી

વિદ્યાર્થિનીઓએ ગૃહમંત્રી સમક્ષ પોતાની સફર વર્ણવતા જણાવ્યું હતું કે શાળામાં વેકેશન અને રજાના દિવસોમાં કેન્ટીન (Canteen) બંધ રહેતી હતી. આ સમયગાળાનો સદુપયોગ કરીને તેમણે શાળા પરિસરમાં ફનફેરનું (Fun Fair) આયોજન કર્યું હતું. આ આયોજનમાં તેમણે જાતે તૈયાર કરેલી મસાલા છાસનું વેચાણ શરૂ કર્યું હતું. આ આઈડિયા એટલો સફળ રહ્યો કે માત્ર 2 દિવસના ગાળામાં દીકરીઓએ 92184 રૂપિયાનો જંગી નફો મેળવ્યો હતો. બાળાઓ પાસેથી આ આંકડો સાંભળી ગૃહમંત્રી પણ દંગ રહી ગયા હતા.

 

View this post on Instagram

 

A post shared by Gujarat First (@gujaratfirst)

નફાની રકમમાંથી સામાજિક સેવાનો ભગીરથ સંકલ્પ

આ દીકરીઓ માત્ર નફો કમાવવા પૂરતી સીમિત નથી રહી, પરંતુ ઉપાર્જિત નફાનો ઉપયોગ સેવાકીય પ્રવૃત્તિઓમાં કરે છે. વિદ્યાર્થીનીઓએ જણાવ્યું કે તેઓ દર વર્ષે દિવાળીના તહેવારમાં જરૂરિયાતમંદોને મીઠાઈ વિતરણ , ચોમાસાની (Monsoon) ઋતુમાં છત્રી વિતરણ તેમજ ગરીબ બાળકોને શિક્ષણ માટે ચોપડા અને સ્ટેશનરીનું વિતરણ કરે છે. આગામી સમયમાં રક્ષાબંધનના (Rakshabandhan) પર્વ નિમિત્તે રાખડીઓનો વેપાર કરવાનું નવું આયોજન પણ તેઓ કરી રહી છે.

ગૃહમંત્રી હર્ષભાઇ સંઘવીએ આપી શુભેચ્છા

વિદ્યાર્થિનીઓના આ સંયુક્ત પ્રયાસ અને સામાજિક જવાબદારીની ભાવનાને બિરદાવતા ગૃહમંત્રી હર્ષભાઇ સંઘવીએ (Harsh Sanghvi) 'વટ પાડી દીધો' કહીને દીકરીઓની પીઠ થાબડી હતી. તેમણે જણાવ્યું હતું કે આ પ્રકારના આંત્રપ્રિન્યોરશિપ પ્રોજેક્ટ્સ (Entrepreneurship Projects) અન્ય શાળાઓમાં પણ શરૂ થવા જોઈએ, જેથી વિદ્યાર્થીઓમાં નાની ઉંમરથી જ આર્થિક સાક્ષરતા, વ્યવસ્થાપન અને સમાજસેવાની ભાવના કેળવાય.

આ પણ વાંચો: DyCM હર્ષ સંઘવી ફરી દિલ્હી પ્રવાસે: 10 દિવસમાં ત્રીજો પ્રવાસ