Ambalal Patel Rain Forecast : ગુજરાતમાં હાલમાં છુટોછવાયો વરસાદ વરસી રહ્યો છે વરસાદનો બીજો રાઉન્ડ ક્યારે આવશે તેની ખેડૂતો રાહ જોઈ રહ્યા છે ત્યારે હવામાનને લઈને જાણીતા નિષ્ણાંત અંબાલાલ પટેલે આગામી દિવસોમાં રાજ્યમાં વરસાદને લઈને મહત્વપૂર્ણ આગાહી કરી છે. અંબાલાલ પટેલની આગાહી મુજબ, આજથી રાજ્યના અનેક ભાગોમાં વરસાદી માહોલ જામવાની શક્યતા છે અને આગામી 13 ઓગસ્ટ સુધી વિવિધ વિસ્તારોમાં વરસાદ વરસી શકે છે.
કયા વિસ્તારોમાં રહેશે વરસાદી માહોલ?
હવામાન નિષ્ણાંતના જણાવ્યા અનુસાર, 13 ઓગસ્ટ સુધી મહીસાગર, પંચમહાલ, દાહોદ, છોટાઉદેપુર અને વડોદરાના ભાગોમાં વરસાદ થવાની પ્રબળ સંભાવના છે. આ ઉપરાંત અમદાવાદ અને ગાંધીનગરના કેટલાક વિસ્તારોમાં પણ વરસાદી ઝાપટાં પડી શકે છે.
ઉત્તર ગુજરાત અને મધ્ય ગુજરાતની વાત કરીએ તો, સાબરકાંઠા અને અરવલ્લીમાં ખાસ કરીને સારો વરસાદ થવાની શક્યતા છે. બનાસકાંઠા તેમજ પાટણ, સમી અને હારીજ પંથકમાં પણ વરસાદની શક્યતા વ્યક્ત કરવામાં આવી છે. આ સાથે જ દક્ષિણ સૌરાષ્ટ્રના ભાગોમાં પણ વરસાદ વરસી શકે છે.
14-15 ઓગસ્ટે મોન્સૂન બ્રેક આવવાની શક્યતા
અંબાલાલ પટેલના અનુમાન મુજબ, 14 અને 15 ઓગસ્ટ દરમિયાન હવામાનમાં ઉઘાડ નીકળશે અને મોન્સૂન બ્રેક આવવાની શક્યતા રહેશે. ત્યારબાદ 13 અને 14 તારીખના રોજ બંગાળના ઉપસાગરમાં એક લો પ્રેશર (લો પ્રેશર સિસ્ટમ) બનશે, જેની અસર પૂર્વ ભારતના ભાગોમાં જોવા મળશે.
આગામી સમયમાં હવામાનમાં થનારા ફેરફારો અંગે તેમણે જણાવ્યું કે, 17, 18 અને 19 ઓગસ્ટ: રાજ્યના હવામાનમાં પલટો આવશે અને કેટલાક ભાગોમાં વરસાદ પડશે જ્યારે 22 અને 23 ઓગસ્ટથી ગુજરાત અને સૌરાષ્ટ્રના ભાગોમાં વરસાદી ઝાપટાં પડવાની અને દક્ષિણ ગુજરાતમાં વરસાદ થવાની શક્યતા રહેશે. તેમણે જણાવ્યું કે, બંગાળના ઉપસાગરમાં એક પછી એક લો પ્રેશર સિસ્ટમ સક્રિય થશે, જેના કારણે 25 થી 28 ઓગસ્ટ દરમિયાન વરસાદી ઝાપટાં વધશે.
સપ્ટેમ્બર મહિનો કેવો રહેશે?
31 ઓગસ્ટે પૂર્વ ફાલ્ગુની નક્ષત્રના કારણે વરસાદ થવાની સંભાવના છે.સપ્ટેમ્બર મહિનાની શરૂઆત અંગે પણ અંબાલાલ પટેલે જણાવ્યું છે કે 2 અને 7 સપ્ટેમ્બરે હવામાનમાં પલટો આવશે અને સપ્ટેમ્બર મહિનામાં રાજ્યમાં ભારે વરસાદની શક્યતાઓ રહેલી છે.
આ પણ વાંચો: Vadodara News: કેનાલમાં ડૂબી જવાથી ગોત્રી હોસ્પિટલના રેસિડેન્ટ તબીબનું મોત
