બુધવારથી ગુમ હતી બાળકી, પિતાએ નોંધાવી હતી ફરિયાદ

રાયપુર ગામના રામાપીર વાળા વાસમાં રહેતા એક પરિવારની 9 વર્ષ અને 11 મહિનાની પુત્રી ગત તા. 12મી નવેમ્બરની સવારે આશરે દશેક વાગ્યાના સુમારે ગુમ થઈ ગઈ હતી. બાળકી ગુમ થતાં તેના પિતાએ કોઈ અજાણી વ્યક્તિ દ્વારા તેનું કાયદેસરના વાલીપણામાંથી અપહરણ કરવામાં આવ્યું હોવાની શંકા સાથે ડભોડા પોલીસ મથકમાં અપહરણની ફરિયાદ નોંધાવી હતી. પોલીસે ફરિયાદના આધારે તાત્કાલિક બાળકીની શોધખોળ શરૂ કરી હતી અને સોશિયલ મીડિયા સહિતના માધ્યમોમાં પણ તેની જાણકારી આપી હતી. જોકે, આ શોધખોળ અંતે એક દુઃખદ ઘટનામાં પરિણમી છે.

ગાંધીનગરના રાયપુર ગામમાં હૃદયદ્રાવક ઘટના! 12 નવેમ્બરથી ગુમ થયેલી 10 વર્ષીય માસૂમ બાળકીની લાશ ઘર નજીકથી જ પ્લાસ્ટિકના કોથળામાં પેક કરેલી હાલતમાં મળી. પ્રાથમિક આશંકા ગળું દબાવી હત્યાની છે. #Gandhinagar #GujaratCrime #બાળકીનીહત્યા #રાયપુર #ગુજરાતપોલીસ #JusticeForChild pic.twitter.com/FNt2JLSPIU

— Hardik Shah (@Hardik04Shah) November 14, 2025

ઘરની પાછળ મળી લાશ — Gandhinagar માં ચકચાર

ગુમ થયાના એક દિવસ બાદ, એટલે કે 13 નવેમ્બરની રાત્રે, પરિવાર જે મકાનમાં રહે છે તેની પાછળના ભાગે આવેલી એક ઓરડીની ઓસરીમાંથી શંકાસ્પદ હાલતમાં એક મોટો પ્લાસ્ટિકનો કોથળો મળી આવ્યો હતો. પરિવાર અને પોલીસ દ્વારા તેની તપાસ કરવામાં આવતાં અંદરથી ગુમ થયેલી બાળકીની જ લાશ પેક કરેલી હાલતમાં મળી આવતાં સૌ કોઈ સ્તબ્ધ થઈ ગયા હતા. બનાવની ગંભીરતા જોતાં ગાંધીનગર એસપી (SP) અને લોકલ ક્રાઈમ બ્રાન્ચ (LCB)ની ટીમ તાત્કાલિક ઘટનાસ્થળે પહોંચી હતી અને સમગ્ર વિસ્તારને સીલ કરીને તપાસ શરૂ કરી હતી.

ગળું દબાવી હત્યાની આશંકા, Gandhinagar પોલીસને નજીકના વ્યક્તિ પર શંકા

પોલીસ સૂત્રોના પ્રાથમિક અનુમાન મુજબ, બાળકીનું ગળું દબાવીને હત્યા કરવામાં આવી હોવાની આશંકા છે. આ ઘટના બાળકીના ઘરની નજીક જ બની હોવાથી, પોલીસને શંકા છે કે બાળકીની હત્યા કોઈ નજીકના કે પરિચિત વ્યક્તિ દ્વારા જ કરવામાં આવી છે. આશંકાના આધારે પોલીસે તાત્કાલિક આસપાસના લોકોની પૂછપરછ શરૂ કરી દીધી છે. વળી બાળકી સાથે કોઈ અઘટિત કૃત્ય થયું છે કે કેમ, તે અંગેનો ચોક્કસ ખુલાસો પેનલ ડોક્ટરોની ટીમ દ્વારા કરાવવામાં આવનારા પોસ્ટમોર્ટમ રિપોર્ટ બાદ જ થઈ શકશે. પોલીસની અલગ અલગ ટીમો અપહરણથી માંડીને હત્યા સુધીના તમામ પાસાઓની ઊંડાણપૂર્વક તપાસ કરી રહી છે. ઉલ્લેખનીય છે કે, પીડિત બાળકીના પિતા જીઆઇડીસી (GIDC) માં ડ્રાઇવર તરીકે નોકરી કરે છે. આ પરિવારમાં સંતાનમાં એક દીકરો અને આ દીકરી હતી. આ કરુણ ઘટનાથી સમગ્ર ગામ અને પરિવાર શોકમાં ડૂબી ગયું છે. Gandhinagar પોલીસનો દાવો છે કે ટૂંક સમયમાં જ હત્યારાને પકડી પાડવામાં આવશે.

આ પણ વાંચો :   Rajkot: નવાગામ વિસ્તારમાં બની કરુણ ઘટના, બંને દીકરીઓની હત્યા બાદ માતાએ કરી આત્મહત્યા