Politics: પી. ચિદંબરમના નિવેદન પર DyCM હર્ષભાઈ સંઘવીનો પલટવાર, કોંગ્રેસની નીતિઓ સામે ઉઠાવ્યા સવાલો

UPAના શાસનમાં નક્સલવાદ કેમ વકર્યો?

હર્ષભાઈ સંઘવીએ પોતાના નિવેદનમાં સવાલ ઉઠાવ્યો કે પી. ચિદંબરમ ગૃહમંત્રી તરીકે કાર્યરત હતા ત્યારે અને UPA સરકારના શાસન દરમિયાન નક્સલવાદ વધુ સક્રિય કેમ બન્યો હતો. તેમણે દાવો કર્યો કે 2004 થી 2014 દરમિયાન નક્સલવાદ સામેની લડાઈમાં આશરે 1,913 પોલીસકર્મીઓ અને CRPF ના જવાનો શહીદ થયા હતા.

નક્સલવાદ મુદ્દે ચિદંબરમના નિવેદન સામે હર્ષભાઇ સંઘવીનો પ્રહાર
"UPAના શાસનમાં નક્સલવાદીઓ વધુ સક્રિય કેવી રીતે થયા"
"UPAના 10 વર્ષના પોલીસ જવાનો અને CRPF જવાનો શહીદ થયા"
"નકસલીઓના હુમલામાં 5 હજાર લોકોના મૃત્યુ કેમ થયા તે હવે ખબર પડી"
DyCMએ કોંગ્રેસ સરકારની સુરક્ષા નીતિ પર ઉઠાવ્યા… pic.twitter.com/DtyYS4KdXl

— Gujarat First (@GujaratFirst) August 16, 2026

નક્સલી હુમલામાં હજારો લોકોના મોતનો મુદ્દો

DyCM હર્ષભાઈ સંઘવીએ વધુમાં જણાવ્યું કે UPAના શાસન દરમિયાન નક્સલી હુમલાઓમાં 5,019થી વધુ ભારતીયોએ જીવ ગુમાવ્યો હતો. આ આંકડાને ટાંકીને તેમણે કોંગ્રેસની આંતરિક સુરક્ષા નીતિ સામે સવાલો ઉઠાવ્યા છે. તેમણે કહ્યું કે આ સમયગાળાની ઘટનાઓ હવે સુરક્ષા વ્યવસ્થાને લઈને અનેક પ્રશ્નો ઊભા કરે છે.

પોલીસ શસ્ત્રાગારોમાંથી હથિયારો લૂંટાયાનો દાવો

DyCM એ પોતાના X પોસ્ટમાં વધુ એક ગંભીર દાવો કરતાં જણાવ્યું કે પી. ચિદંબરમના ગૃહમંત્રી તરીકેના કાર્યકાળ દરમિયાન નક્સલવાદીઓના 92 ટકા હથિયારો પોલીસ શસ્ત્રાગારોમાંથી લૂંટાયા હોવાના આંકડા સામે આવ્યા હતા. આ મુદ્દાને લઈને પણ તેમણે તત્કાલીન UPA સરકારની સુરક્ષા વ્યવસ્થા પર નિશાન સાધ્યું.

182 જિલ્લાઓ નક્સલી હિંસાની ચપેટમાં

હર્ષભાઈ સંઘવીએ 2013ના આંકડાનો ઉલ્લેખ કરતાં જણાવ્યું કે તે સમયે દેશના 182 જિલ્લાઓ નક્સલી હિંસાની ચપેટમાં હતા. તેમણે કહ્યું કે UPA સરકારનો આંતરિક સુરક્ષાનો રેકોર્ડ પોતે જ ઘણું કહી જાય છે. આ સમગ્ર મુદ્દે તેમણે ચિદંબરમના નિવેદનના સંદર્ભમાં કોંગ્રેસની નીતિઓ પર રાજકીય પ્રહાર કર્યો છે.

આ પણ વાંચોઃ Dahod: સ્લેબ ભરતી વખતે અચાનક તૂટી પડી લિફ્ટ, 3 શ્રમિક ગંભીર રીતે ઈજાગ્રસ્ત, જવાબદારો સામે કાર્યવાહી માગ