Gandhinagar: ભારે વરસાદની સ્થિતિને ધ્યાને રાખીને DyCM હર્ષભાઈ સંઘવીની અધ્યક્ષતામાં કરાઈ સમીક્ષા

ગ્રાઉન્ડ ઝીરોની સ્થિતિનો તાગ મેળવાયો

વીડિયો કોન્ફરન્સના માધ્યમથી સુરત, નવસારી, વલસાડ, અમરેલી, જુનાગઢ, ડાંગ, તાપી, ગીર સોમનાથ સહિતના પ્રભાવિત જિલ્લાઓના કલેક્ટર, પોલીસ અધિક્ષક, જિલ્લા વિકાસ અધિકારી અને મ્યુનિસિપલ કમિશનર સાથે સીધો સંવાદ સાધીને નાયબ મુખ્યમંત્રીએ ગ્રાઉન્ડ ઝીરોની સ્થિતિનો તાગ મેળવ્યો હતો.

સુરક્ષા એ રાજ્ય સરકારની સર્વોચ્ચ પ્રાથમિકતા

બેઠકમાં સ્પષ્ટ સૂચના આપવામાં આવી છે કે, નાગરિકોની સુરક્ષા એ રાજ્ય સરકારની સર્વોચ્ચ પ્રાથમિકતા છે. વહીવટી તંત્રને કોઈપણ કટોકટીની સ્થિતિને પહોંચી વળવા માટે 24x7 કાર્યરત રહેવા અને કંટ્રોલ રૂમને સતત એક્ટિવ રાખવા આદેશ આપવામાં આવ્યા છે. નીચાણવાળા અને જોખમી વિસ્તારોમાં આપત્તિ વ્યવસ્થાપન માટે જરૂરિયાત મુજબ એન.ડી.આર.એફ (NDRF) અને એસ.ડી.આર.એફ (SDRF) ની ટીમોને ત્વરિત તૈનાત કરવા નિર્દેશ અપાયા છે.

નાગરિકોને સમયસર સુરક્ષિત સ્થળે ખસેડવા તાકીદ

સ્થળાંતરની પ્રક્રિયા અંગે  નાયબ મુખ્યમંત્રીએ જણાવ્યું હતું કે, જે વિસ્તારોમાં જળ ભરાવની સ્થિતિ સર્જાય તેવી શક્યતા હોય, ત્યાંથી નાગરિકોને સમયસર અને સુરક્ષિત રીતે આશ્રયસ્થાનોમાં ખસેડવા અને ત્યાં ભોજન, પાણી તેમજ પ્રાથમિક તબીબી સુવિધાઓ  સમયસર મળી રહે તે સુનિશ્ચિત કરવું. ભારે વરસાદ દરમિયાન જનજીવન ખોરવાય નહીં તે માટે રોડ-રસ્તા, વીજળી પુરવઠો  અને સંદેશાવ્યવહારની વ્યવસ્થા પર સતત મોનિટરિંગ કરવા તંત્રને તાકીદ કરવામાં આવી છે. રાજ્ય સરકાર પરિસ્થિતિ પર સતત નજર રાખી રહી છે અને કોઈપણ પ્રકારની જાનહાનિ ટાળવા માટે ત્વરિત પ્રતિસાદ આપવા માટે સંપૂર્ણ સજ્જ છે.

આ પણ વાંચોઃ Gandhinagar News: ચોમાસાને લઈને તંત્ર એલર્ટ, વેધર વોચ ગ્રૂપની મહત્વની બેઠક યોજાઈ