Gir Somnath: સુલતાનપુરમાં અતિવૃષ્ટિમાં ફસાયેલા 4 લોકોનું SDRF દ્વારા સફળ રેસક્યૂ

4 વ્યક્તિઓને પાણીમાંથી હેમખેમ બહાર કાઢ્યા

ઘટનાની વિગત મુજબ, અડધી રાત્રે ગામના નીચાણવાળા વિસ્તારોમાં વરસાદી પાણી ફરી વળ્યા હતા. આ પાણી ઘરોમાં ઘૂસી જતાં ૪ વ્યક્તિઓ ફસાયા હોવાની જાણ વહીવટીતંત્રને થતાં જ ત્વરિત પ્રતિસાદ આપવામાં આવ્યો હતો. પરિસ્થિતિની ગંભીરતાને ધ્યાનમાં રાખીને મામલતદાર કચેરીના સ્ટાફ અને SDRF ની ટીમ દ્વારા સંયુક્ત ઓપરેશન હાથ ધરવામાં આવ્યું હતું. સતર્ક ટીમોએ ભારે જહેમત બાદ તમામ 4 વ્યક્તિઓને પાણીમાંથી હેમખેમ બહાર કાઢ્યા હતા.

SDRF ની ટીમો સંપૂર્ણ એલર્ટ

જિલ્લામાં સતત વરસી રહેલા વરસાદને પગલે SDRF ની ટીમો સંપૂર્ણ એલર્ટ (Alert) મોડ પર છે અને વહીવટીતંત્ર સાથે સતત સંકલન (Coordination) સાધીને બચાવ કામગીરી કરી રહી છે. સુરક્ષિત રીતે બહાર કાઢવામાં આવેલા આ તમામ નાગરિકોને હાલ નજીકની પ્રાથમિક શાળા સુલતાનપુર ખાતે સ્થળાંતરિત કરવામાં આવ્યા છે. શાળા ખાતે તેમના માટે રહેવા અને સૂવાની પૂરતી વ્યવસ્થા કરવામાં આવી છે, જેથી તેમને કોઈ મુશ્કેલી ન પડે.

આ પણ વાંચોઃ Ahmedabad માં પ્રિ-મોન્સૂન કામગીરીની પોલ ખુલી, ગોતામાં નવો બનેલો રોડ બેસી ગયો