જીગીશ દોશી અને હિતેન વસંતે સંભાળી નવી જવાબદારી
GCCIની નવી ટીમમાં જીગીશ દોશીની સિનિયર વાઈસ પ્રેસિડન્ટ તરીકે નિમણૂક કરવામાં આવી છે, જ્યારે હિતેન વસંતે વાઈસ પ્રેસિડેન્ટ પદની જવાબદારી સંભાળી છે. નવા હોદ્દેદારોના સન્માન સાથે ચેમ્બરની આગામી કાર્યયોજનાને લઈને પણ ચર્ચા કરવામાં આવી હતી. ઉદ્યોગ અને વેપાર ક્ષેત્રના પ્રતિનિધિઓએ નવી ટીમથી ગુજરાતના ઔદ્યોગિક વિકાસને વધુ ગતિ મળશે તેવી આશા વ્યક્ત કરી હતી.
મુખ્યમંત્રીનો નવી ટીમને સંદેશ
સમારોહને સંબોધતા મુખ્યમંત્રી ભૂપેન્દ્રભાઈ પટેલે GCCIના નવા પ્રમુખ રાજેશ ગાંધી અને તેમની સમગ્ર ટીમને અભિનંદન પાઠવ્યા હતા. તેમણે જણાવ્યું હતું કે વડાપ્રધાનના સૌનો સાથ, સૌનો વિકાસના મંત્રને અનુસરીને આગળ વધવામાં આવે તો દરેક જવાબદારી સફળતાપૂર્વક નિભાવી શકાય છે. ગુજરાતે વેપાર અને ઉદ્યોગ ક્ષેત્રે દેશ-વિદેશમાં પોતાની નવી ઓળખ ઉભી કરી છે અને GCCIની નવી ટીમ આ દિશામાં વધુ અસરકારક કામગીરી કરશે તેવી સરકારને આશા છે.
ઔદ્યોગિક વિકાસમાં GCCIનું મહત્વપૂર્ણ યોગદાન
ભૂપેન્દ્રભાઈ પટેલે કહ્યું હતું કે રાજ્યના ઔદ્યોગિક વિકાસમાં GCCIનો વિશેષ ફાળો રહ્યો છે. ખાસ કરીને વાઇબ્રન્ટ ગુજરાત સમિટને સફળ બનાવવા માટે ચેમ્બરે મહત્વપૂર્ણ ભૂમિકા ભજવી છે. તેમણે ઉમેર્યું હતું કે ગુજરાતમાં રોકાણ અને ઉદ્યોગોને પ્રોત્સાહન આપવાની પ્રક્રિયામાં GCCI હંમેશાં સરકારનો મજબૂત ભાગીદાર રહ્યો છે.
MSME માટે નવી ઉદ્યોગ નીતિમાં વિશેષ પ્રોત્સાહન
મુખ્યમંત્રીએ રાજ્યની નવી ઉદ્યોગ નીતિનો ઉલ્લેખ કરતાં જણાવ્યું હતું કે હવે MSME ક્ષેત્રને પણ મોટા ઉદ્યોગોની સમકક્ષ વિશેષ પ્રોત્સાહન આપવામાં આવી રહ્યું છે. નાના અને મધ્યમ ઉદ્યોગો ગુજરાતના આર્થિક વિકાસનો મહત્વપૂર્ણ આધારસ્તંભ છે અને સરકાર તેમને વધુ સક્ષમ બનાવવા માટે પ્રતિબદ્ધ છે.
વિકસિત ભારત 2047 માટે સૌએ સાથે આગળ વધવું પડશે
તેમણે પોતાના સંબોધનમાં વડાપ્રધાન નરેન્દ્રભાઈ મોદીના નેતૃત્વ હેઠળ દેશની પહેલી હાઈડ્રોજન ટ્રેન શરૂ થવાની અને ગુજરાતમાં ત્રણ સેમીકન્ડક્ટર પ્લાન્ટના ઉદ્ઘાટન જેવી ઉપલબ્ધિઓનો પણ ઉલ્લેખ કર્યો હતો. અંતમાં તેમણે કહ્યું હતું કે વિકસિત ભારત 2047ના લક્ષ્યને સાકાર કરવા માટે સરકાર, ઉદ્યોગ અને વેપાર જગતને સાથે મળીને આગળ વધવું પડશે અને રાજ્ય સરકાર આ પ્રયાસોમાં હંમેશાં ઉદ્યોગજગતની સાથે રહેશે.
આ પણ વાંચોઃHeadline 6 PM: બપોરના 3 થી 6 સાંજના વાગ્યા સુધીની પળેપળની અપડેટ્સ, જાણો એક ક્લિકમાં
