Kutch : જલિયાણ પ્રોટીન કંપનીમાં ભીષણ આગ, ઓઈલ ટેન્ક ફાટતા મચી અફરાતફરી

• Kutch ના ભચાઉમાં કંપનીના બોઈલરમાં ભીષણ આગ!
• વોન્ધ પાસે જલિયાણ પ્રોટીન પ્રાઇવેટ લિમિટેડમાં બની ઘટના
• આગને કારણે કંપનીમાં રહેલું વિશાળ ઓઈલ ટેન્ક ફાટ્યું
• ભચાઉ અને ખાનગી કંપનીઓના ફાયર ફાઈટરો દ્વારા કાર્યવાહી
• સતત 4 કલાકની ભારે જહેમત બાદ આગ પર મેળવાયો કાબૂ
• અકસ્માતમાં કોઈ જાનહાની નહીં, લાખોનું નુકસાન થયાની ભીતિ

કચ્છ (Kutch) જિલ્લાના ભચાઉ (Bhachau) તાલુકાના વોન્ધ (Vondh) ગામ નજીક આવેલી એક ખાનગી કંપનીમાં આગની ગંભીર ઘટના બની છે. જલિયાણ પ્રોટીન પ્રાઇવેટ લિમિટેડ (Jaliyan Protein Private Limited) નામની કંપનીના બોઈલર વિભાગમાં અચાનક આગ ફાટી નીકળી હતી. આગની તીવ્રતા એટલી વધારે હતી કે જોતજોતામાં કંપનીના પરિસરમાં રહેલું ઓઈલ ટેન્ક (Oil Tank) પણ બ્લાસ્ટ સાથે ફાટ્યું હતું, જેના કારણે આસપાસના વિસ્તારમાં ભયનો માહોલ જોવા મળ્યો હતો.

Kutch : બે ખાનગી કંપનીઓના ફાયર ફાઈટરોની મદદ

આગ લાગવાની જાણ થતા જ સ્થાનિક તંત્ર અને ફાયર વિભાગની ટીમો ઘટનાસ્થળે દોડી ગઈ હતી. ભચાઉ ફાયર ફાઈટર (Bhachau Fire Brigade) ઉપરાંત નજીકની અન્ય બે ખાનગી કંપનીઓના ફાયર ફાઈટરોની મદદ લેવામાં આવી હતી. આગ એટલી વિકરાળ હતી કે ઓઈલ હોવાને કારણે તેને બુઝાવવામાં ભારે મુશ્કેલી પડી હતી. સતત ચાર કલાકની ભારે જહેમત અને પાણીનો મારો ચલાવ્યા બાદ અંતે આગ પર કાબૂ મેળવવામાં સફળતા મળી હતી.

સમગ્ર બનાવમાં કોઈ જાનહાની નહીં

રાહતની વાત એ છે કે આ સમગ્ર બનાવમાં કોઈ જાનહાની નોંધાઈ નથી. આગ લાગી ત્યારે પ્લાન્ટમાં હાજર કામદારો સમયસૂચકતા વાપરીને સુરક્ષિત બહાર નીકળી ગયા હતા. જોકે, બોઈલર અને ઓઈલ ટેન્ક ફાટવાના કારણે કંપનીને લાખો રૂપિયાનું નુકસાન થયું હોવાનો અંદાજ છે. હાલમાં પોલીસ અને એફએસએલની ટીમ દ્વારા આગ લાગવાનું ચોક્કસ કારણ જાણવા માટે તપાસ હાથ ધરવામાં આવી છે.

આ પણ વાંચો : યુદ્ધ પર Donald Trump ની મોટી તૈયારી!, વર્ષ 2027 માટે $1.5 ટ્રિલિયનનું રેકોર્ડ સંરક્ષણ બજેટ જાહેર